Lau be Rome ena taona ai lau vara bona tubu daekau, unuseniai momo be moni gaukara namodia idia abia lasi. Mauri be ia auka. Egu sinana korikorina lau diba lasi, bona egu tamana be lau ida ia noho momo lasi. Lau be mauri aukana amo lau tubu daekau.

Egu mauri lagani be 10 neganai, lau henaohenao. Egu mauri lagani be 12 neganai, ruma amo lau heau boio. Nega ta egu tamana ese pulisi edia hedkwota amo lau ia udaia bona ai giroa lou ruma. Nega momo taunimanima ida lau hepapahuahu, bona taunimanima ibounai dekenai lau badu bona idia lau dagedage henia. Egu mauri lagani be 14 neganai, ruma lau rakatania momokani. Drag lau abia bona dala ai lao noho. Lau be mahuta gabuna lasi dainai, motuka ta ena galasi do lau makohia bena lalonai do lau noho ela bona daba momokani. Bena do lau lao ranu gabuna do lau tahua unai amo lau digu diba.

Henaohenao karana dekenai lau manada dainai, taunimanima edia baege lau henao bona hanuaboi ai taunimanima edia flats eiava ruma badadia lalonai lao vareai bona edia kohu lau henaoa. Egu ladana namona ia dika bena daudau lasi murinai, momo idia diba raskol oreana ta lau bamoa, bona banika amo moni lau henaoa matamaia. Lau be dagedage tauna ai lau lao dainai raskol orea lalonai lau idia matauraia. Gabu ibounai lau lao neganai egu ipidi lau abia, bona lau mahuta neganai egu pilo henunai lau atoa. Bona dagedage karadia, drag abia, henaohenao, hereva dikadia, bona matabodaga maurina lau noholaia. Polisi taudia be hanaihanai lau idia tahua. Nega momo polisi taudia ese lau idia abia bona lagani momo dibura ai lau noho bona nega haida lau heau boio.

Nega ta dibura amo lau idia ruhaia bona egu lalona lau hadaia egu aunty ta​—egu sinana ena tadina, do lau vadivadi henia. Lau diba lasi egu aunty bona ena natuna mero bona kekeni be Iehova ena Witnes taudia ai idia lao. Bena lau idia invait Witnes taudia edia hebou ai do ai lao. Lau ura idia karaia gauna lau itaia dainai, egu lalona lau hadaia idia ida lau lao. Kingdom Hall dekenai ai ginidae neganai, egu aunty lau hamaoroa lau be iduara ena raka vareai gabunai do lau helai, unai amo idia vareai bona raka lasi taudia lau itaia diba. Oibe, egu ipidi lau abia danu.

Unai hebou ese lau ia durua bada. Lau laloatao, unai nega ai lau laloa lau be planeti ma ta ai lao noho. Lau be moale bona kiri toana idia hahedinaraia taudia ese mai lalokau ida lau idia welkam henia. Witnes taudia ese lau idia kara namo henia bona edia toana amo unai lau itaia, unai do lau laloa boio lasi. Lau manadalaia mauri dalana amo Unai be idau momokani!

Witnes taudia ida Baibel lau stadilaia matamaia. Lau dibaia gaudia amo lau laloparara egu mauri dalana lau haidaua momokani be namo. Aonega Herevadia 13:20 ena sisiba herevana lau badinaia: “Aonega taudia ida ia raka tauna be do ia aonega, to kavakava taudia ia bamoa tauna be dika do ia davaria.” Lau laloparara raskol ena orea lau rakatania be namo. Ia auka unai lau karaia totona, to Iehova ena heduru dainai lau kwalimu.

Danu, lau hegoeva namonamo. Lau gaukara goada kuku ania karana lau hadokoa bona drag lau rakatania. Egu huina latana lau utua, egu earring lau negea, bona hereva dika gwauraia karana lau hadokoa. Bona egu kara ta ta lau biagua matamaia.

Lau be duahiduahi bona stadi karana lau moalelaia diba lasi, unai dainai lau hekwarahi bada Baibel lau stadilaia totona. To lau gaukara goada dainai, metairametaira Iehova lau lalokau henia matamaia bona egu lalomamina ese lau ia kota henia. Nega momo lau laloa lau karaia kara dikadia dainai Iehova ese egu dika do ia gwauatao lasi. Unai bamona nega ai, King Davida ese kara dika badadia ia karaia murinai, Iehova ese ena dika ia gwauataoa karana ena siavarai duahia karana ese lau ia hagoadaia.—2 Samuela 11:1–12:13.

Lau dekenai hekwakwanai ma ta be lau gari ruma ta ruma ta ai lau abia dae gaudia lau gwauraia. (Mataio 28:19, 20) Lau gari dika haroro gaukara ai guna lau hahisia o dagedage henia tauna ta lau davaria! To metairametaira egu gari karana lau hanaia. Lau moale badina ma haida lau durua iseda guba Tamana idia dibaia totona. Ia be ita ibounai iseda dika ia gwauatao.

Iehova dibaia karana ese lau ia gimaia! Egu tura gunadia momo be idia mase, haida be dibura ai idia noho, to lau be mauri namona lau moalelaia bona vaira nega ena helaro lau naria noho. Lau ese manau bona kamonai karana lau dibaia bona badu haraga karana lau biagua. Unai dainai, taunimanima ibounai lau tura henia namonamo diba. Lau be kekeni namona ta Carmen lau adavaia. Ai ruaosi be mai moale ida ma haida ai durua Baibel idia dibaia totona.

Oh, bona hari mai momokani ida lau gaukara, ena be banika ai gaukara haida totona lau lao, to lau henaohenao lasi, lau hagoevaia!