Lau vara neganai, egu tama sina be Spain ena notwest kahanai gunika hanua maragina ta ladana Galicia ai idia noho. Edia natudia iboudiai be 8, lau be namba 4. Egu famili be idia noho namonamo. Unai neganai, Spain ai, emai kara be famili ta amo natuna ta be katolik pris eiava nun ena sikuli ai do ia lao. Emai famili lalonai ai toi be unai sikuli dekenai ai lao.

Egu mauri lagani be 13 neganai, egu kakana lau bamona bona nun sikuli ai lau vareai, unai be e Madrid siti dekenai . Unai gabu ai nun taudia be idia hebamo lasi. Idia hetura heheni lasi, to nega ibounai taravatu idia badinai, idia guriguri bona idia be kara auka taudia. Daba momokani, ai noga bona guriguri rumana lalonai ai hebou gau haida ai laloa dobu totona, to gau ta lau laloa diba lasi. Gabeai dubu anedia ai abia bona Mass ai karaia, to ibounai be Latin gado ai idia hereva dainai, lau laloparara lasi. Unai dainai lau mamia Dirava be lau amo ia daudau bamona. Dina ibounai taravatu idia atoa regerege do ai karaia lasi. Egu kakana lau hedavari neganai, ai hereva diba lasi do ai gwauraia gauna tamona be, “Maria helagana hanamoa.” Nun edia taravatu be ai aniani murinai, 30 minutes sibona ai herevahereva diba. Egu famili ida lau noho neganai egu mauri be idau momokani. Lau be hegeregere sibona lau noho bamona bona nega momo lau taitai.

Ena be lau mamia lau be Dirava kahirakahira lasi, to egu lagani be 17 neganai egu gwauhamata lau karaia. Nun edia gaukara lau karaia, to sibona lau nanadaia, Dirava ese lau ia abia hidi inai gaukara lau karaia totona eiava lasi? Nun idia gwau, daradara taudia be hel lahina dekenai do idia lao! To lau daradara noho. Lau diba Iesu Keriso be sibona ia noho lasi, to ia bisi bada herea taunimanima ia durua totona. (Mataio 4:23-25) Egu lagani be 20 neganai, lau laloa nun gaukara lau karaia ena badina be lasi. Nun gunalaia hahinena ta ia gwau bema lau daradara, namona be unai gabu lau rakatania. Reana ia gari dika nun ma haida lau hahekwakwanaia. Unai dainai dubu lau rakatania.

Egu ruma dekenai lau giroa lao neganai egu tama sina be unai idia lalopararalaia. Emai hanua lalonai gaukara be lasi dainai, egu tadina dekenai lau lao, ia be Germany ai ia noho. Ia be Spain refiuji komiunis orea ena memba ta. Unai taudia huanai lau noho dainai lau gari lasi, badina idia be edia gaukara taudia bona hahine taudia totona idia hereva. Unai dainai Komiunis lau vareai bona unai orea ena memba ta lau adavaia. Lau laloa gaukara namona ta lau karaia badina pepapepa lau hariharilaia bona protest lau karaia.

To, daudau lasi murinai lau lalohekwarahi. Lau davaria komiunis taudia be idia gwauraia herevana idia badinaia lasi. Lagani 1971 ai, emai orea ai memero matamatadia ese Frankfurt ai Spanish Consulate idia gabua neganai, lau daradara bada. Unai bamona idia karaia badina Spain lalonai gavamani taudia edia kara be namo lasi. To lau laloa unai be dala kererena.

Egu natuna ginigunana ia vara neganai, egu adavana lau hamaoroa Komiunis hebou dekenai do lau lao lou lasi. Lau lalohisihisi badina egu turadia be lau bona egu beibi idia vadivadi henia lasi. Mauri ena anina lau laloa. Taunimanima edia kara lau hanamoa toho be mai anina bada, a?

Lagani 1976 ai, Spain Witnes taudia rua be emai iduara dekenai idia pidipidi bona Baibel pablikesien haida lau abia. Idia giroa mai neganai, hisihisi, taunimanima ibounai be hegeregere lasi bona kara gageva totona henanadai momo lau henia. Lau hoa, badina egu henanadai ibounai be Baibel amo idia haerelaia. Mai moale ida Baibel stadi lau abia dae.

Matamanai lau dibaia hereva momokanidia lau moalelaia sibona. To gabeai, egu adavana ida Iehova ena Witnes taudia edia Kingdom Hall dekenai hebou ai lao neganai, lau laloparara lau dibaia gaudia lau laloa bada be namo. Unai neganai emai natudia be rua. Witnes taudia ese ai idia abia lao hebou dekenai bona emai natudia naria totona ai idia durua. Witnes taudia be egu tura namodia ai idia lao.

To, tomadiho totona lau do daradara noho. Bona egu lalona lau hadaia Spain ai egu famili do lau lao vadivadi henia. Egu vavana be pris bona ia ura lasi Baibel lau stadilaia. To egu hanua Witnes taudia ese lau idia durua bada. Egu henanadai ibounai be Baibel amo idia haerelaia, Germany dekenai idia noho Witnes taudia ese idia karaia hegeregerena. Egu lalona lau hadaia Germany dekenai do lau giroa lao neganai, egu Baibel stadi do lau karaia lou. Ena be egu adavana be Baibel stadilaia karana ia rakatania, to egu gwauhamata hegeregerena egu stadi lau karaia noho. Lagani 1978 ai, bapatiso lau abia bona Iehova ena Witnes ta ai lau lao.

Baibel dekenai, lau abia diba maorona dainai hari egu mauri be mai ena anina. Hegeregere, 1 Petero 3:1-4 ese hahine ia hagoadaia, ‘Edia adavadia henunai do idia noho’ bona idia “hemataurai ” bona “lalomanau” idia hahedinaraia be namo, badina ‘Dirava ena matanai unai be mai anina bada.’ Unai hakaua herevadia ese lau ia durua headava hahine bona sinana ena gaukara lau karaia namonamo totona.

Hari, lau be Witnes ta bona lagani 35 ia hanaia vadaeni. Lau moale bada badina lau be tadikaka bona taihu ida Dirava lau hesiai henia. Danu, egu natudia 5 amo 4 be unai bamona idia karaia noho.