Iesu ena Toana be Edena Bamona?
Baibel ena haere
Ita be Iesu ena vairana korikorina ita diba lasi, badina Baibel ese Iesu ena toana ia herevalaia lasi. Unai ese ia hamomokania Iesu ena toana be gau badana lasi. To, Baibel ena hereva haida ese ita ia durua Iesu ena toana ita piksaia totona.
Vairana: Iesu ena sisina be Israela hahinena, unai dainai ita gwau diba iena sinana ena toana ia abia. (Heberu 7:14) Ena toana be ma haida amo ia idau lasi. Nega ta hehuni dalanai, Iesu be Galilea amo ia lao Ierusalema bona taunimanima idia laloparara lasi unai be Iesu badina ena toana be idia bamona. (Ioane 7:10, 11) Danu, ena toana be ena hahediba taudia amo ia idau lasi. Laloatao Iuda Iskariote ese Iesu ia kisi henia karana amo, tuari taudia be ia idia diba bona idia dogoatao.—Mataio 26:47-49.
Huina ena lata: Ita gwau diba Iesu ena huina be ia lata lasi, badina Baibel ia gwau, “bema tau ta ena huina ia lata, unai be hemarai gauna.”—1 Korinto 11:14.
Besoso: Iesu be mai ena besoso. Ia be Israela taudia edia taravatu ia badinaia, ia gwau “namo lasi emui besoso ena toana umui hadikaia.” (Levitiko 19:27; Galatia 4:4) Danu, Baibel ese Iesu ena besoso idia veria kokia ia perovetalaia.—Isaia 50:6.
Tauanina: Baibel ia hahedinaraia Iesu be goada tauna. Iena haroro gaukara lalodiai, gabu daudau momo ia raka. (Mataio 9:35) Nega rua dubu helaga ia hagoevaia, moni senisia taudia edia teibolo ia hagirodia bona nega ta kwadia varona ida mamoe bona boromakau ia luludia. (Luka 19:45, 46; Ioane 2:14, 15) McClintock and Strong’s Cyclopedia ia gwau: “Iesu ena sivarai ibounai ese ia hahedinaraia iena tauanina be ia goeva bona ia be goada tauna.”—Volium 4, rau 884.
Vairana ena toana: Iesu be lalokau bona hebogahisi tauna, bona ita abia dae diba iena vairana toana ese unai ia hahedinaraia. (Mataio 11:28, 29) Taunimanima idauidau be ia dekenai idia lao, hahegoada bona heduru idia abia totona. (Luka 5:12, 13; 7:37, 38) Natudia danu be mai moale ida Iesu badinai idia helai.—Mataio 19:13-15; Mareko 9:35-37.
Taunimanima edia lalohadai kereredia
Kererena: Haida idia gwau Iesu be Africa tauna, badina Apokalupo bukana ia gwau iena huina be mamoe ena huina bamona bona ena aena be lahi badana lalonai ia diaridiari “auri” bamona.—Apokalupo 1:14, 15, Buka Helaga.
Diba maorona: Apokalupo bukana be “toa” dalanai idia torea. (Apokalupo 1:1) Apokalupo bukana ese Iesu ena huina bona aena be toa dalanai ia herevalaia, badina ia ese Iesu ena kara, mase amo ia toreisi lou murinai ia hahedinaraia. Iesu be tanobada ai ia do noho negana ena toana ia herevalaia lasi. Apokalupo 1:14 ia gwau, Iesu ena “kwarana bona huina be kurokuro, mamoe huina bamona bona sinou bamona” neganai, ia be ena kala ia herevalaia, bona ena toana ia herevalaia lasi. Ia hahedinaraia Iesu ena mauri lagani be bada dainai, ia be mai ena aonega bada.—Apokalupo 3:14.
Iesu ena aena be lahi badana lalonai ia diaridiari “auri” bamona. (Apokalupo 1:15) Danu, iena vairana be “dina bamona ia diaridiari.” (Apokalupo 1:16) Tanobada besena ta ena kopina ena kala be unai bamona lasi, unai dainai unai matahanai be toa sibona, ia hahedinaraia ia toreisi lou tauna, Iesu be “ta ese ia kahirakahira ia lao diba lasi diarina lalonai ia noho.”—1 Timoteo 6:16.
Kererena: Iesu be manoka bona goada lasi tauna.
Diba maorona: Iesu be tau goadana. Hegeregere, ia gari lasi bona mai edia tuari gaudia ida idia mai, ia idia dogoatao taudia dekenai ia sibona ia hahedinaraia. (Ioane 18:4-8) Iesu be tau goadana badina ia ese tulu idauidau ia gaukaralaia kapenta gaukara ia karaia totona.—Mareko 6:3.
Vadaeni, dahaka dainai Iesu ia hegeregere lasi ena hisihisi auna ia huaia totona? Bona dahaka dainai kara dika taudia rua idia do mase lasi, to Iesu ia mase guna? (Luka 23:26; Ioane 19:31-33) Iesu be hisihisi auna ai idia do kokoa kau lasi neganai, iena goada be ia ore momokani. Hanuaboi ibounai ia mahuta lasi, badina ia lalohisihisi bada. (Luka 22:42-44) Hanuaboi ai Iuda taudia ese idia kara auka henia, bona daba ai Roma taudia ese idia hahisia bada. (Mataio 26:67, 68; Ioane 19:1-3) Unai dainai Iesu ia mase haraga.
Kererena: Iesu be lalohisihisi tauna, ia moale lasi.
Diba maorona: Iesu be iena guba Tamana Iehova ena kara ia hahedinaraia goevagoeva, Baibel ia gwau ia be “moale Diravana.” (1 Timoteo 1:11; Ioane 14:9) Oibe, Iesu ese haida ia durua idia moale totona. (Mataio 5:3-9; Luka 11:28) Unai ese ia hamomokania hanaihanai Iesu ena vairana toana be moale ia hahedinaraia.
Reana Inai Danu Oi Ura
MAI ANINA BADA BAIBEL HADIBAIA HEREVADIA
Edena Bamona Ita Diba Baibel Ena Hereva be Momokani?
Bema Baibel be Dirava amo, Baibel be haida ese idia torea buka ibounai ia hereaia.
AI KARAIA GAUDIA
Vadivadi Totona Oi Noinoi
Baibel ena henanadai herevalaia, eiava Iehova ena Witnes taudia io diba namonamo.