Lus faj lem yog tej lus uas Vajtswv tshoov kom tib neeg hais. Phau Vajlugkub qhia tias ‘Vajtswv lub hwj huam dawb huv tshoov neeg lub siab kom lawv qhia Vajtswv txoj lus xwb.’ (2 Petus 1:20, 21) Cov cev Vajtswv lus yog cov uas muab Vajtswv tej lus coj mus qhia rau lwm tus.​—Tes Haujlwm 3:18.

Vajtswv qhia nws txoj lus li cas rau cov uas cev nws lus?

 Vajtswv siv ntau txoj kev los qhia:

•   Sau ntawv qhia. Vajtswv tau ua li no thaum nws muab 10 Txoj Kev Cai rau Mauxes.​—Khiav Dim 31:18.

•   Siv cov tub txib saum ntuj los qhia. Xws li, Vajtswv txib ib tug tub txib saum ntuj los qhia Mauxes seb nws yuav hais li cas rau Falaus. (Khiav Dim 3:2-4, 10) Yog tias tej lus ntawd tseem ceeb, Vajtswv hais kom muab sau cia. Xws li thaum Vajtswv hais rau Mauxes tias: ‘Cia li sau tej lus no tseg, rau qhov tej lus uas kuv cog tseg rau koj thiab cov Ixayees puav leej hais raws li tej lus no.’​—Khiav Dim 34:27. a

•   Ua yog toog. Muaj qee zaus Vajtswv cia cov cev lus ua yog toog pom, lawv yeej rua muag pliav. (Yaxayas 1:1; Hanpakus 1:1) Muaj tej zaj lawv pom tseeb cuag li lawv nyob hauv zaj ntawd. (Lukas 9:28-36; Tshwmsim 1:10-17) Muaj tej thaum lawv nyuam qhuav qi muag xwb twb ua yog toog lawm. ( Tes Haujlwm 10:10, 11; 22:17-21) Vajtswv kuj cev nws txoj lus hauv npau suav thiab.​—Daniyees 7:1; Tes Haujlwm 16:9, 10.

•   Tshoov siab. Muaj tej thaum Vajtswv yuav tshoov cov cev nws lus kom xav raws li nws lub siab nyiam lawv thiaj paub tias yuav hais li cas. Phau Vajlugkub hais tias, “Vajtswv Txojlus txhua zaj puavleej yog Vajtswv tshoov neeg lub siab kom neeg sau.” Lo lus “Vajtswv tshoov” lus Kilis kuj txhais tias “Vajtswv tshuab pa rau.” (2 Timautes 3:16) Vajtswv siv Nws lub hwj huam los qhia cov cev Vajtswv lus paub txog nws txoj kev xav. Yog li ntawd, txawm lawv yuav xaiv hais cov lus zoo li cas los, tej lus lawv hais yeej yog Vajtswv tej lus.​—2 Xamuyees 23:1, 2.

Lus faj lem puas yog qhia txog lub neej yav tom hauv ntej nkaus xwb?

 Txawm tias ntau zaj lus faj lem hais txog lub neeg yav tom hauv ntej los, qee zaj kuj tsis hais li ntawd thiab. Xws li yav thaud, cov cev Vajtswv lus ib sij ceeb toom rau cov Ixayees ib zaug txog lawv tej kev txhaum. Tej lus ceeb toom ntawd qhia tias yog cov Ixayees mloog Vajtswv lus ces lawv yuav tau koob hmoov. Tiam sis yog lawv tsis mloog ces lawv yuav raug kev puas tsuaj. (Yelemis 25:4-6) Cov Ixayees txiav txim siab li cas, lawv lub neej pem suab yuav mus raws li ntawd.​—2 Kevcai 30:19, 20.

Tej lus faj lem hauv phau Vajlugkub uas tsis yog hais txog yav tom hauv ntej

•   Muaj ib zaug cov Ixayees thov kom Yehauvas pab lawv. Vajtswv thiaj txib ib tug cev nws lus tuaj hais rau lawv tias Nws yuav tsis pab lawv rau qhov lawv tsis mloog Nws lus.​—Cov Thawjtswj 6:6-10.

•   Thaum Yexus ntsib tus poj niam Xamalis, nws qhia tau tus poj niam ntawd lub neej yav nram ntej vim Vajtswv twb qhia rau Yexus paub lawm. Tus poj niam ntawd thiaj paub tias Yexus yog tus cev Vajtswv lus txawm Yexus twb tsis tau qhia txog yav tom hauv ntej li.​—Yauhas 4:17-19.

•   Thaum Yexus hais nws rooj plaub, nws cov yeeb ncuab muab nws qhov muag npog thiab hais tias: “Cia li cev Vajtswv lus. Saib leejtwg ntaus koj?” Lawv tsis tau hais kom Yexus cev lus txog yav tom hauv ntej, tiam sis hais kom nws twv saib leej twg ntaus nws xwb.​—Luka 22:63, 64.