Cov uas tshawb txujci kawm txog dabtsi xwb? Muaj ib phau ntawv piav tias lawv kawm txog txhua yam uas ciaj sia, kawm txog lub ntiajteb, thiab lub hnub lub hli. Lawv tsom thiab ntsuas tej no ib qeb zuj zus seb ua haujlwm li cas, luaj li cas, ntev li cas, xwv lawv thiaj paub txog lub qab ntuj khwb. Lawv tshawb nrhiav tsheej hli tsheej xyoo, ua rau ib txhia kawg tswvyim tas. Ntau zaus tej uas lawv fawb tau yeej pab tau coob leej ntau tus. Ho pab tau li cas?

Muaj ib lub koom haum nyob sab Yus Luv tau muab yas thiab cov ntaub ruaj ruaj los ua ib co raj nqus dej. Cov raj no lim tau kab mob thiab tej dej kua av tibsi. Xyoo 2010 muaj av qeeg loj heev nyob tebchaws Haiti. Cov twj zoo li no lim dej zoo heev rau sawvdaws tau haus.

Cov tub txawg tub ntse kuj tsim tau tej tshuab xa xov uas ncig saum nruab ntug hu ua hnub qub nyeg (satellite). Cov hnub qub nyeg no pab tau peb li cas? Muaj cov tshuab no peb thiaj muaj tej twj taw kev hu ua Global Positioning System (GPS). Thaum xub thawj yog tsim los rau cov tub rog siv xwb. Tiamsis nimno pab qhia kev rau neeg tsav tsheb, tsav dav hlau, thiab tsav nkoj tibsi. Kuj pab tau cov uas plob hav zoov hav tsuag thiab taug kev ua si pem tej roob. Twb yog muaj cov tub txawg tub ntse tsim tej no, thiaj tsis nyuaj ncig teb ncig chaw.

Niaj hnub no peb muaj tej xov tooj ntawm tes, koos pis tawj (computer), thiab Is Taws Nej. Cov kws kho mob hajyam txawj kho dua lawm. Peb kuj tau caij dav hlau mus ncig teb ncig chaw lawm thiab. Twb yog cov tub txawg tub ntse tawm tswvyim, sawvdaws thiaj tau lub neej yoojyim dua.

Cov tub txawg tub ntse nyiam tshawb nrhiav kom hajyam paub txog txhua yam nyob puag ncig peb. Muaj ib co keeb uas xub pib hu ua atom. Muaj tsheej qas txhiab qas vam lub keeb sib tuav sib lo thiaj puab tau ib puas tsav yam. Ib co tub txawg tub ntse nyiam tshawb nrhiav kom lawv paub zoo tias tej keeb ntawd ua haujlwm li cas. Muaj dua ib co tub txawg tub ntse ho tshawb seb thaum chiv keeb lub qab ntuj khwb no xeeb li cas los. Thaum lawv kawm ntxiv txog tej yam uas peb qhov muag pom tsis tau, ua rau ib txhia khav tias yog muaj Vajtswv tiag ces lawv yuav tsum nrhiav tau Nws xwb.

Ib txhia tub txawg tub ntse tsis ntseeg tias muaj Vajtswv. Tus yawg Amir D. Aczel hais tias, ib txhia txhob txwm tshawb tej pov thawj los twm tias tsis muaj Vajtswv. Muaj dua ib tug yawg nto moo heev tshawb txog lub ntiajteb tej zog nchav, tau cav tias tsis muaj ib qho pov thawj twg qhia tias muaj ib tug vajtswv uas tswj lub qab ntuj khwb no. Nws thiaj ntseeg tias tsis muaj vajtswv tiag. Muaj dua lwm cov thuam tias tej txujci hauv phau Vajlugkub tsuas yog sau los dag ntxias xwb. *

 Tej uas cov tub txawg tub ntse tshawb tau los puas txaus ntseeg? Puas yog lawv twb paub txhij paub txhua, es lawv thiaj muab qhia tawm rau sawvdaws? Tsis yog. Cov tub txawg tub ntse yeej kawm deb heev lawm, tiamsis muaj coob tus lees hlo tias tshuav ntau yam uas lawv tu ncua. Muaj tej yam uas lawv yeej paub tsis meej txog. Ib tug yawg hu ua Steven Weinberg uas tau txais lub npe nto moo Nobel Peace, hais tias hauv lub ntiajteb no muaj ntau yam ntau tsav uas neeg kawm tsis txhij. Muaj dua ib tug xibhwb qhia ntawv hu ua Martin Rees uas tshawb fawb txog cov hnub qub hais tias, muaj ntau yam uas noob neej yeej yuav tsis nkag siab ib zaug li. Yeej muaj tseeb li ntawd tiag. Tseem nyuaj heev rau neeg tshawb nrhiav txog tibneeg tej noob ntsha lossis cell, thiab tej hnub qub saum nruab ntug. Xav txog cov ntsiab me nram no:

• Muaj ib co tub txawg tub ntse kawm txog txhua yam uas ciaj sia. Lawv tshawb fawb txog tej noob ntsha ntawm neeg lub cev. Txawm li ntawd los lawv tsis paub meej tias yog vim li cas tej noob ntawd ho txawj sib faib, txawj tsim tej plhaus thees (protein) thiab txawj txuas zog lwm qhov los.

• Lub plawv ntiajteb zoo ib yam li lub hlau nplaum uas rub kom txhua yam nyob ruaj hauv ntiajteb no. Lub zog ntawd hu ua gravity. Cov tub txawg tub ntse tshawb fawb txog lub zog ntawd tiamsis ua rau lawv xav tsis thoob. Lawv tsis paub xyov yog vim li cas thiaj rub tau peb thiab rub tau lub hli kiv puag ncig lub ntiajteb.

• Muaj ib co tub txawg tub ntse tshawb fawb seb ib puas tsav yam rhawv li cas los. Lawv xam tias 95 feem pua ntawm tej uas nyob saum nruab ntug yog tej uas lawv tsis muaj cuab kav paub txog. Neeg tsis muaj ib yam twj uas yuav ntsuas tau tej ntawd.

Muaj ntau yam uas cov tub txawg tub ntse xav tsis thoob. Ib tug thiaj sau li no: “Peb yeej kawm tau ntau yam, tiamsis peb tu ncua lawm ntau kawg rau qhov tshuav ntau yam uas peb tsis tau paub txog. Kuv xav mas, tes haujlwm tshawb txujci yeej ua rau yus yimhuab xav kawm ntxiv xwb, tsis yog lam qhia li yus siab xav.”

Puas yog txojkev tshawb txujci qhia ntxaws dua phau Vajlugkub? Puas tsim nyog peb ntseeg tias muaj Vajtswv? Ua tib zoo xav li no: Cov tub txawg tub ntse muaj tej twj uas muaj zog heev, tiamsis lawv tseem tu ncua ntau yam. Ua li lawv puas muaj cai qhia txog tej uas lawv tsis tau paub? Lawv puas muaj cai thuam tias tsis muaj Vajtswv? Muaj ib phau ntawv uas sau txog keeb kwm thiab kev tshawb fawb txog tej hnub qub, xaus lus li no: “Neeg twb kawm txog lub hnub lub hli, tej hnub qub tau 4,000 xyoo lawm. Txawm li ntawd los, nimno peb paub tsis ntau ntawm cov neeg Npanpiloo txheej thaum ub xwb.”

Yehauvas Cov Timkhawv yeej tsis thuam lwm tus txojkev ntseeg. Peb tsuas txhawb kom sawvdaws coj li nqe Vajlugkub no xwb: “Cia li ua lub siab mos siab muag tshwm los rau sawvdaws.” (Filipi 4:5) Peb xav kom txhua leej txhua tus ua siab mos siab muag kawm, thiab ua tib zoo ntsuas seb kev tshawb txujci thiab phau Vajlugkub sib thooj li cas.