Koj xav li cas xwb thaum koj hnov luag hais tias: “Hnub kawg los ze lawm!” Qhov no puas ua rau koj xav tias lub ntiajteb yuav puas tsuaj, lossis ua rau koj xav txog ib tug xibhwb hauv xov tooj cua uas tabtom tshaj tawm tias tus Cawm Seej yuav coj cov neeg zoo mus saum ntuj ceeb tsheej thiab muab cov neeg phem pov rau hauv ntuj tawg? Thaum tibneeg hnov txog hnub kawg, muaj ib txhia ntshai heev tiamsis lwm cov ho xav tias tsis txaus ntseeg lossis yog tso dag xwb.

Phau Vajlugkub yeej qhia tias: “Lub sijhawm kawg [hnub kawg] yuav los txog.” (Mathai 24:14) Phau Vajlugkub kuj muab hnub ntawd hu ua “Amakedoo” thiab “hnub loj kawg uas Vajtswv . . . teem cia.” (Qhia Tshwm 16:14, 16) Hais txog hnub kawg, tej kev ntseeg nyias qhia lawm nyias ib yam. Tej lawv qhia ua rau tibneeg ntshai heev thiab xav tsis thoob li. Tiamsis phau Vajlugkub qhia meej tias hnub kawg zoo li cas thiab tsis zoo li cas. Thiab Vajtswv Txojlus qhia meej tias hnub kawg los ze lawm. Qhov tseem ceeb tshaj mas yog phau Vajlugkub qhia tias peb yuav tau ua li cas thiaj dim hnub ntawd! Ua ntej no, cia peb kawm seb tibneeg to taub yuam kev li cas txog hnub kawg thiab hnub ntawd yog dabtsi. Thaum hais txog hnub kawg, phau Vajlugkub hais li cas xwb?

1. TSIS YOG LUB NTIAJTEB YUAV KUB HNYIAB.

   Phau Vajlugkub hais tias: “Koj txawb lub ntiajteb rau saum tej taw tiag, thiaj tsis ua zog ib txhis li.” (Ntawv Nkauj 104:⁠5) Tseem tshuav lwm nqe Vajlugkub uas qhia meej rau peb tias Vajtswv yuav tsis rhuav tshem lub ntiajteb lossis cia lub ntiajteb raug luag rhuav tshem ib zaug li!​—Laj Lim Tswvyim 1:4; Yaxaya 45:18.

2. TSIS YOG YUAV LOS THAUM TWG ES TSIS PAUB.

   Phau Vajlugkub qhia tias Vajtswv twb muab hnub kawg teem cia lawm. Malakau 13:32, 33 hais li no: “Tiamsis hnub ntawd thiab teev ntawd tsis muaj leejtwg paub, txawm yog cov tubtxib saum ntuj thiab leej Tub kuj tsis paub tsuas yog leej Txiv tib leeg paub xwb. Nej yuav tsum ceev faj zov tos, rau qhov nej tsis paub lub sijhawm ntawd los txog thaum twg.” Peb paub meej tias Vajtswv uas yog “leej Txiv” twb muab “lub sijhawm ntawd” teem cia lawm.

3. TSIS YOG TIBNEEG UA THIAB TSIS YOG POB ZEB POOB SAUM NTUJ LOS.

   Hnub kawg yuav pib li cas? Qhia Tshwm 19:11 hais tias: “Kuv pom rooj ntug ceeb tsheej qheb ua ciav muaj ib tug nees dawb. Tus uas caij tus nees ntawd lub npe hu ua Ncaj thiab Tseeb.” Nqe 19 hais ntxiv tias: “Thiab kuv pom tus tsiaj thiab tej vajntxwv hauv ntiajteb thiab lawv cov tub rog tuaj txoos ua ke yuav ua rog rau tus uas caij nees thiab nws cov tub rog.” (Qhia Tshwm 19:11-21) Txawm cov lus no yog lus piv txwv xwb los, peb yeej paub meej tias hnub kawg yuav los li no: Vajtswv yuav xa nws pab tub rog uas yog cov tubtxib saum ntuj los rhuav tshem nws cov yeeb ncuab.

1. YOG HNUB KAWG RAU TEJ TSEEM FWV UAS PAB TSIS TAU TIBNEEG.

   Phau Vajlugkub hais tias: “Vajtswv ntuj yuav tsa dua ib lub tebchaws [tseem fwv] uas tsis muaj ib hnub uas ua kom puam tsuaj li, lossis qhov uas kav lub tebchaws ntawd yuav tsis poob rau lwm haiv neeg. Lub tebchaws ntawd yuav ua rau tej tebchaws tawg ntsoog ntxaws ua tej dwb daim yaj tag, thiab lub tebchaws ntawd yuav nyob ruaj khov mus ib txhis.” (Daniyee 2:44) Zoo li tau hais nyob rau lub ntsiab 3 tas los lawd, “tej vajntxwv hauv ntiajteb thiab lawv cov tub rog” uas tau “tuaj txoos ua ke yuav ua rog rau tus uas caij nees thiab nws cov tub rog” yuav raug rhuav tshem.​—Qhia Tshwm 19:19.

2.   YOG HNUB KAWG RAU KEV TSOV KEV ROG, KEV LIMHIAM, THIAB KEV TSIS NCAJ NCEES.

   “[Vajtswv] ua rau kev ua rog tiaj tus mus thoob qab ntuj kawg.” (Ntawv Nkauj 46:9) “Cov uas siab ncaj yuav tau nyob hauv lub tebchaws, thiab cov uas ua siab dawb paug yuav tau nyob ruaj rau hauv. Tiamsis cov neeg limhiam yuav raug muab txiav tu hauv lub tebchaws, thiab cov neeg ntxeev ntxias yuav raug muab dob kiag cag.” (Paj Lug 2:21, 22) Vajtswv hais li no: “Saib maj, kuv tsim txhua yam dua tshiab.”​—Qhia Tshwm 21:4, 5.

3. YOG HNUB KAWG RAU TEJ KEV NSTEEG UAS PAB TSIS TAU TIBNEEG THIAB UA TSIS RAWS LI VAJTSWV SIAB NYIAM.

   Phau Vajlugkub hais li no: “Cov xibhwb cev Vajtswv lus tau cev tej lus dag, thiab cov pov thawj kuj kav raws li tej lus uas cov xibhwb cev dag ntawd. Thiab kuv haiv neeg kuj nyiam tej uas lawv ua no, tiamsis nej yuav ua li cas rau thaum txog hnub kawg?” (Yelemi 5:31) Yexus Khetos hais tias: “Thaum txog hnub ntawd yuav muaj neeg coob coob hais rau kuv tias, ‘Tus Tswv, tus Tswv, peb twb tuav koj lub npe cev koj tej lus thiab tuav koj lub npe ntiab dab tawm thiab tuav koj lub npe ua ntau yam txujci phimhwj los tsis yog?’ Thaum ntawd kuv yuav hais tseeb rau lawv tias, ‘Kuv tsis txeev paub nej kiag li. Cov niag neeg ua phem, cia li khiav ntawm kuv mus.’ ”​—Mathai 7:21-23.

4. YOG HNUB KAWG RAU COV NEEG UAS TXHAWB LUB QAB NTUJ NO TEJ KEV PHEM.

   Yexus Khetos hais tias: “Qhov uas txiav txim yog li no, vim txojkev kaj los rau hauv lub ntiajteb tiamsis neeg nyiam txojkev tsaus ntuj heev dua txojkev kaj vim tej uas lawv ua phem kawg.” (Yauhas 3:19) Phau Vajlugkub qhia tias lub sijhawm uas Nau-a nyob muaj ib qho xwm txheej loj kawg li los raug lub ntiajteb. “Lub ntiajteb uas nyob thaum ntawd thiaj raug dej nyab puam tsuaj. Vim Vajtswv tib los lus ntawd, lub ntuj thiab lub ntiajteb thiaj raug muab tu tseg cia rau hluavtaws, yog raug muab khaws cia rau hnub uas txiav txim rau cov neeg tsis hwm Vajtswv thiab ua kom puam tsuaj.”​—2 Petus 3:5-7.

Phau Vajlugkub muab “hnub uas txiav txim . . . thiab ua kom puam tsuaj” yuav los tom ntej no piv rau qhov xwm txheej loj uas tau los raug “lub ntiajteb” rau tiam Nau-a tseem ua neej nyob. Lub ntiajteb twg raug puam tsuaj? Lub ntiajteb av tsis yog lub uas raug puam tsuaj; tsuas yog “cov neeg tsis hwm Vajtswv” uas yog Vajtswv cov yeeb ncuab thiaj raug “puam tsuaj” xwb. Nyob rau Vajtswv “hnub uas txiav txim” yuav los tom ntej, cov uas yog Vajtswv cov yeeb ncuab kuj yuav raug kev puam tsuaj tib yam li ntawd thiab. Tiamsis cov uas yog Vajtswv cov phoojywg yuav dim ib yam li Nau-a thiab nws tsev neeg.​—Mathai 24:37-42.

Thaum Vajtswv muab tag nrho tej kev phem tshem tawm huvsi mus lawm, ntshe lub ntiajteb yuav zoo tshaj plaws li! Yog li ntawd, phau Vajlugkub txoj xov txog hnub kawg tsis yog ib txoj phem tiamsis yog ib txoj uas zoo heev. Txawm li ntawd los, tej zaum koj tseem xav li no: ‘Phau Vajlugkub puas qhia tias thaum twg hnub kawg mam li los? Puas tau los ze? Kuv yuav tau ua li cas kuv thiaj dim hnub ntawd?’