NEEG TXAWV TSIAJ TXHU VIM LAWV TXAWJ SAU NTAWV, KOS DUAB, TSIM TEJ UB TEJ NO, THIAB XAV TXOG LUB NEEJ. Tibneeg kheev nug li no: Lub qab ntuj khwb thiab tibneeg tshwm sim los li cas? Ua cas ho muaj neeg? Lub neej tom hauv ntej yuav zoo li cas?

Ib txhia xyeej tsis nug tej lus ntawd, vim lawv xav tias tsis muaj leejtwg paub txog tej ntawd. Muaj dua lwm cov hais tias tsis tas nug vim txhua yam yeej yog txia los xwb. Tus yawg Viyees Plhauvee (William Provine) uas tshawb txog keeb kwm thiab tej yam ciaj sia hais tias: “Tsis muaj ib tug vajtswv nyob qhovtwg.” Nws ntseeg tias: “Tsis muaj ib tug uas rhawv kevcai kom paub cais qhov zoo qhov phem, thiab lub neej no yeej tsis muaj ntsiab rau.”

Muaj coob tus tsis xav li yawg ntawd. Lawv pom tias muaj kevcai tswj tej hnub qub saum nruab ntug, mas txhua lub nyias kiv raws nyias kab. Lawv qhuas txog tej uas lawv pom hauv lub qab ntuj khwb no, lawv thiaj nrhiav kev los tsim ntau yam raws li tej ntawd. Tsis tas li ntawd, lawv pom tias txhua yam puag ncig peb nyuaj totaub heev, yuav tsum muaj ib tug uas ntse tshaj tibneeg los tsim thiaj muaj tau.

Thaum kawg cov uas ntseeg tias ib puas tsav yam txia los, ib txhia thiaj hloov lawv txojkev xav. Cia peb kawm txog 2 tug qauv.

TUS KWS KHO HLWB, ALEXI MANAU (ALEXEI MARNOV). Alexi hais tias: “Hauv kuv cov tsev kawm ntawv, cov xibhwb qhia tias tsis muaj Vajtswv thiab txhua yam txia los xwb. Peb xav tias cov uas ntseeg Vajtswv tsis paub lawv thiaj ntseeg.” Tiamsis xyoo 1990, Alexi pib hloov nws txojkev xav.

Nws hais tias: “Kuv ib txwm xav kawm seb vim li cas thiaj muaj tej ub tej no, xws li neeg lub hlwb. Kuv pom tias muaj tseeb li luag tej tau hais tiag, tsis muaj ib yam kawm nyuaj tshaj tibneeg lub hlwb. Lub hlwb cim tau ntau yam, tiamsis ua cas neeg ho nyob ib vuag xwb? Ua cas tsis muaj qab hau li? Kuv thiaj xav tias: ‘Ua cas ho muaj tibneeg? Lub neej no puas muaj hauv paus hauv ntsis?’ Kuv xav txhij xav txhua, kuv thiaj ntseeg tias yuav tsum muaj ib tug Tswv Tsim.”

Tej uas Alexi xav txog ua rau nws xav kawm Vajlugkub. Nws tus pojniam yog ib tug kws kho mob uas ntseeg tias tsis muaj Vajtswv. Tiamsis nws lam kawm Vajlugkub los qhia tias nws tus txiv ntseeg yuam kev lawm. Nkawd kawm ntev loo, nkawd mam li pom tias yeej muaj Vajtswv tiag. Nimno nkawd paub Vajtswv lub ntsiab rau noob neej lawm.

TUS TSHAWB TXUJCI, HUANPI YEES (HUABI YIN). Tau ntau xyoo, Huanpi yog ib tug tshawb txujci uas kawm txog lub hnub.

Huanpi hais tias: “Thaum peb cov uas tshawb txujci kawm txog lub ntiajteb lossis lub qab ntuj khwb, peb pom tias txhua yam muaj chaw txawb chaw rau vim muaj kevcai tswj. Kuv thiaj xav tias, ‘Ua cas ho muaj tej kevcai ntawd? Ib yam li thaum yus rauv taws, yus yuav tsum ua zoo saib tsam hluavtaws cig hlob dhau. Kuv xav tias, lub hnub tej nplaim taws cig hlob ua luaj, leejtwg ho yog tus tswj?’ Ntev mus kuv mam pom tias yuav tsum muaj raws li phau Vajlugkub tau hais: ‘Chiv keeb thaum ub Vajtswv tsim lub ntuj thiab lub ntiajteb.’”​—Chiv Keeb 1:1.

Kev tshawb txujci yeej pab kom peb totaub ntau yam, Alexi thiab Huanpi nkawd thiaj kawm tau txog lub hlwb thiab lub hnub seb ua haujlwm li cas. Tiamsis thaum Alexi thiab Huanpi kawm phau Vajlugkub, nkawd tseem totaub tob tshaj ntawd. Nimno nkawd paub tias lub ntuj lub teb pib li cas, ua cas ho muaj kevcai tswj txhua yam, thiab lub ntsiab rau noob neej yog dabtsi.

Phau Vajlugkub qhia li no txog lub ntiajteb: “[Vajtswv] muab lub ntiajteb tsim ruaj khov, nws tsis tsim nyob do cuas, nws tsim kom muaj neeg nyob.” (Yaxaya 45:18) Vajtswv tsim lub ntiajteb muaj hauv paus hauv ntsis. Hauv zaj tom ntej peb yuav kawm txog qhov ntawd, thiab kawm seb peb muaj kev cia siab li cas.