NYOB rau hauv teb chaws Idaunixias (Indonesia), muaj peb tug muam nyob rau ntawm ib lub me nyuam pov txwv hu ua Xenias Npexos (Sangir Besar). Tau ob peb xyoos dhau los lawm, lawv mus ua hauj lwm nyob rau ntawm ntug dej hiav txwv. Muaj coob leej ntau tus yeej ib txwm pom lawv tshaj tawm txoj xov zoo rau tib neeg tiam sis zaum no ho pom lawv ua dua ib txoj hauj lwm txawv dua txhia zaus.

Thaum xub thawj, cov muam taug kev hauv dej mus nrhiav tej lub pob zeb loj loj ces muab nqa los rau ntawm ntug. Cov pob zeb ntawd loj luaj nkaus li ib lub dib liab. Tom qab ntawd lawv xuas rauj tsoo cov pob zeb ntawd kom tawg ib nyuag me zog lub qe ces lawv mam li khaws cov pob zeb uas lawv muab tsoo ntawd rau hauv ib lub thoob yas nqa nce ib tug taw ntaiv mus rau saum lawv tsev. Txuas ntxiv ntawd, lawv muab cov pob zeb ntim rau hauv ib lub hnab tsaj xwv luag thiaj muab thauj tau coj mus pua kev.

Peb tug muam ntawd ib tug npe hu ua Haudas (Hulda). Nws muaj sij hawm ntau me ntsis ces nws kuj mus ua tau qhov hauj lwm no ntau zog. Dua li txhia zaus mas nws yeej muab cov nyiaj no los mus siv koob nws lub cuab lub yig tiam sis nws xav txuag ib qho nyiaj xwv nws thiaj yuav tau ib lub twj ntawm tes los saib lub twj JW Library^®. Haudas paub ntsoov hais tias cov yeeb yaj kiab thiab tej yam uas muaj nyob rau hauv lub twj no yuav pab tau nws tshaj tawm txoj xov zoo thiab yuav pab tau kom nws huab yam nkag siab Vajtswv Txoj Lus.

Haudas ua hauj lwm tsoo pob zeb li no ob txoos teev txhua txhua tag kis tau ib lub hlis ntau ces nws thiaj muaj nyiaj txaus los mus yuav ib lub twj ntawm tes.

Haudas hais tias, “Txawm kuv sab sab lim lim los thaum kuv tau lub twj ntawm tes los mus qhia txoj xov zoo thiab npaj rau tej kev sib txoos ces kuv twb tsis nco qab nkees li lawm.” Nws kuj hais tias lub twj no pab tau nws rau thaum muaj tus kab mob aws heev vim nws kuj txuas tau nrog rau lub koom txoos tej kev sib ntsib thiab qhia txoj xov zoo saum huab saum cua. Peb zoo siab kawg li uas Haudas ua tau raws li nws lub zeem muag.