ZAJ KAWM 01
Phau Vajlugkub Pab Tau Koj Li Cas?
Coob leej ntau tus yeej xav paub seb yuav muaj dab tsi tshwm sim rau yav tom hauv ntej thiab vim li cas tib neeg thiaj raug kev txom nyem, kev ploj kev tuag. Yeej muaj ntau yam uas peb txhawj txog hauv peb lub neej tsis hais kev khwv noj khwv haus los sis yuav ua li cas peb tsev neeg thiaj muaj kev kaj siab. Phau Vajlugkub yuav qhia peb txog tej yam no thiab tseem yuav pab tau peb lub neej. Koj puas xav tias phau Vajlugkub pab tau koj thiab?
1. Phau Vajlugkub qhia peb txog tej yam twg?
Phau Vajlugkub qhia txog tej yam tseem ceeb xws li: Ua li cas thiaj muaj tib neeg? Peb yug los ua dab tsi? Ua cas cov neeg zoo ho raug kev txom nyem? Thaum tib neeg tag sim neej ua li cas rau lawv lawm xwb? Vim li cas ho muaj kev tsov kev rog ntau ua luaj? Yav tom ntej yuav muaj li cas rau lub ntiaj teb? Phau Vajlugkub yuav pab peb to taub txog tej yam no. Coob leej ntau tus zoo siab tias lawv twb paub txog tej no lawm.
2. Phau Vajlugkub pab kom peb qab siab ua neej li cas?
Phau Vajlugkub tsav tswv yim zoo rau peb ua neej, xws li tsev neeg yuav ua li cas thiaj muaj taus kev zoo siab, peb yuav ua li cas thiaj thev dhau kev nyuaj siab, thiab yuav ua li cas peb thiaj xav ua peb txoj hauj lwm. Yog koj kawm phau ntawv no koj yuav paub txog tej no thiab ntau yam ntxiv. Tsis tas li ntawd koj yuav pom tias Vajtswv Txoj Lus txhua nqe “qhuab ntuas . . . thiab qhia kom sawvdaws paub ua lub neej ncaj ncees.”—2 Timautes 3:16.
Phau ntawv no pab peb to taub phau Vajlugkub. Yog li peb xav txhawb kom koj nyeem tej nqe Vajlugkub hauv phau ntawv no es muab piv rau tej uas koj twb ib txwm paub lawm.
KAWM NTXIV
Kawm seb phau Vajlugkub pab tau lwm tus li cas lawm, yuav ua li cas koj thiaj xav nyeem phau Vajlugkub thiab vim li cas peb yuav tsum cia lwm tus pab peb to taub phau Vajlugkub.
3. Phau Vajlugkub coj tau peb txoj hau kev
Phau Vajlugkub zoo li lub teeb tsom kom pom kev uas pab kom peb txawj txiav txim siab thiab pab kom peb pom tias yuav muaj li cas yav tom hauv ntej.
Nyeem Phau Ntawv Nkauj 119:105 thiab tham txog ob lo lus no:
-
Tus sau zaj nkauj no hais li cas txog Vajtswv Txoj Lus?
-
Koj ho xav li cas txog phau Vajlugkub?
4. Phau Vajlugkub qhia txog tej uas peb xav paub
Muaj ib tug poj niam pom tias phau Vajlugkub pab tau nws nkag siab ntau yam uas nws xav paub txog tau ntau lub xyoo los lawm. Saib zaj YEEB YAJ KIAB thiab tham txog ob lo lus no.
-
Tus poj niam hauv zaj yeeb yaj kiab no xav paub txog dab tsi?
-
Thaum nws kawm phau Vajlugkub ho pab tau nws li cas?
Phau Vajlugkub qhia tias yog peb xav paub txog yam twg los yeej meem nug. Nyeem Mathais 7:7 thiab tham txog lo lus no:
-
Koj xav paub txog dab tsi?
5. Koj yeej yuav xav nyeem phau Vajlugkub
Coob leej ntau tus xav nyeem phau Vajlugkub rau qhov lawv pom tias yeej pab tau lawv tiag. Saib zaj YEEB YAJ KIAB thiab tham txog ob lo lus no.
-
Cov hluas hauv zaj yeeb yaj kiab no hais li cas txog kev nyeem ntaub nyeem ntawv?
-
Vim li cas lawv ho xav nyeem phau Vajlugkub?
Phau Vajlugkub nplig tau peb thiab pab kom peb muaj kev cia siab. Nyeem Loos 15:4 thiab tham txog lo lus no:
-
Koj puas xav paub txog tej lus cog tseg hauv phau Vajlugkub?
6. Cia lwm tus pab koj to taub phau Vajlugkub
Ib txhia xav nyeem phau Vajlugkub heev tiam sis lawv pom tias yog lwm tus pab lawv, lawv yuav nkag siab dua. Nyeem Tes Haujlwm 8:26-31 thiab tham txog lo lus no:
-
Yuav ua li cas peb thiaj to taub phau Vajlugkub?—Saib nqe 30 thiab 31.
Muaj ib tug pab tus txiv neej Ethi-aupias nws thiaj nkag siab Vajtswv Txoj Lus. Niaj hnub no los coob leej pom tias lawv to taub phau Vajlugkub zoo dua yog muaj lwm tus pab lawv.
IB TXHIA HAIS TIAS: “Kev kawm Vajlugkub tsis muaj qab hau thiab nkim sij hawm xwb.”
-
Koj xav li cas? Vim li cas koj xav li ntawd?
KOJ KAWM TAU DAB TSI
Phau Vajlugkub pab tau peb lub neej, pab peb muaj kev cia siab, nplig tau peb thiab qhia txog tej yam tseem ceeb uas peb xav paub.
Rov Tham Dua
-
Phau Vajlugkub pab tau peb li cas?
-
Phau Vajlugkub qhia txog tej yam twg?
-
Koj xav paub txog dab tsi hauv phau Vajlugkub?
TSHAWB NTXIV
Kawm seb phau Vajlugkub pab tau peb li cas niaj hnub nim no.
“Tej Tswv Yim Hauv Phau Vajlugkub Kav Txhua Tiam Neeg” (Phau Tsom Faj Phau 1 Xyoo 2018)
Saib seb phau Vajlugkub pab tau ib tug txiv neej uas muaj kev txom nyem siab thaum yau los li cas.
Kawm seb phau Vajlugkub pab tau lub cuab lub yig li cas.
“12 Lub Ntsiab Uas Txhawb Lub Cuab Lub Yig” (Tsim Dheev! Phau 2 Xyoo 2018)
Kawm seb phau Vajlugkub qhia tias leej twg yog tus kav lub qab ntuj no.
Tej Yam No Yuav Pab Tau Koj Thiab
TEJ UAS COOB TUS NUG TXOG
Kev Kawm Vajlugkub Nrog Yehauvas Cov Tim Khawv Zoo Li Cas?
Yehauvas Cov Tim Khawv qhia Vajlugkub dawb xwb. Koj xav siv phau Vajlugkub twg los kawm los yeej tau. Koj yeej caw tau tag nrho koj tsev neeg thiab koj tej phooj ywg tuaj nrog koj kawm.
