Maayo gid magtinlo sang ila lawas ang anta nga mga kuring. Kon nagabugtaw, ginagamit nila ang mga 24 porsiento sang ila tion para matinluan ang ila lawas. Mahimo nila ini sing maayo bangod sang pagkadesinyo sang ila dila.

 Binagbinaga: Ang dila sang kuring naputos sang 290 ka papilla. Magagmay ini nga mga tul-an sa dila sang kuring nga nagahilay pasulod sa baba sini, kag pareho ini katig-a sa imo kuko. May giha ang kada isa sini para makakuha dayon sang laway ang dila pagsulod sini sa baba sang kuring. Kon ginadilapan sang kuring ang balahibo sini, malab-ot sang mga papilla ang idalom sang balahibo kag malawayan pati ang panit sang kuring.

 Mga 48 ka mililitro nga laway kada adlaw ang magamit sang kuring para lawayan ang panit kag balahibo sini. Makakuha sing higko ang laway kay may dala ini nga mga enzyme. Kag kon nagaamat-amat mala ang laway ginapabugnaw sini ang mga 25 porsiento sang lawas sang kuring. Importante ini katama kay diutay lang ang guluwaan sang balhas sa panit sang kuring.

 Kon maagyan sang isa ka papilla ang gumon nga balahibo sang kuring nagasang-it ini kag ginabutong ang gumon para magtadlong. Manami man ang pamatyag sang kuring kon ginadilapan sini ang ila lawas, posible bangod sa mga papilla kon makatandog ang punta sini sa ila panit. Naghimo sang hairbrush ang mga researcher para ilugon ang desinyo sang dila sang kuring. Mas diutay nga puersa ang kinahanglan kon ginahusay ini nga hairbrush sangsa ordinaryo nga hairbrush, kag madali pa ini tinluan. Matadlong man sini ang gumon nga buhok. Nagapati ang mga researcher nga ang dila sang kuring makabulig nga makadesinyo sila sang mas maayo nga paagi para matinluan ang mga balahibuon kag nagaginumon nga mga butang. Magamit man ini para maaplay sing mas maayo ang lotion ukon bulong para sa panit nga balahibuon.

 Ano sa banta mo? Ang dila sang kuring resulta bala sang ebolusyon? Ukon gindesinyo ini?