Ang kini ukon remora isa ka sahi sang isda nga makasarang magtapik sa iban nga sapat sa dagat. Mahapos man sini makakas ang iya kaugalingon sa ginatapikan sini. Kag kon maghalin na ini, indi niya mahalitan ang iya ginatapikan. Gusto gid sang mga researcher nga tun-an ining ikasarang sang kini.

 Binagbinaga: Ang kini makatapik sa pagi, bagis, pawikan, balyena, kag iban pa nga sapat sa dagat, bisan pa mahining ukon magaras ang panit ukon shell nga tapikan sini. Mga parasite kag mga bilin nga pagkaon sang ginatapikan sini ang ginakaon sang kini. Bangod nagatapik ang kini sa iban nga sapat sa dagat, halos indi na sini kinahanglan maglangoy kag maproteksionan pa ini sa mga sapat sa dagat nga gusto magkaon sa ila. Gintun-an sang mga researcher ang suction disc sang kini. Gusto nila mabal-an kon paano makatapik sing hugot ini nga isda sa sarisari nga klase sang panit nga indi man mahalitan ang ginatapikan sini.

 Mga kini nga nagaupod-upod sa butanding

 Ara sa ulo sang kini ang korte oval nga suction disc sini. Madamol kag mahumok ang palibot nga kilid sang disc, gani hugot gid katama ang pagtapik sini. Sa sulod sang disc, may mga kudolkudol nga nagaraya. Sa kada kudolkudol, may magagmay kag manipis katama nga mga bukog. Kon magtindog ining mga kudolkudol, nagasag-id ang mga bukog sa panit sang ginatapikan sang kini amo nga may ara ini sing friction. Bangod sa suction kag friction, indi makakas ang kini bisan ano pa kadasig maglangoy ukon bisan magliko gulpi ang sapat sa dagat nga ginatapikan sini.

 Bilib gid ang mga scientist sa pagkadesinyo sang suction disc sa ulo sang kini, gani gin-ilog man nila ini. Naghimo sila sang korte oval nga device nga makatapik man sa sarisari nga mga butang. Sang gintestingan nila nga paluson ini nga device, indi ini madali mapalos bisan pa pila ka gatos ka beses sangsa kabug-aton sang device ang puersa nga gingamit nila.

 Madamo sing puede gamitan ang teknolohiya nga gin-ilog sa suction disc sa ulo sang kini. Puede ini gamiton para sa research tag sa mga sapat sa dagat kag kon nagatuon sila sa madalom katama nga parte sang dagat. Mahimo man ini gamiton kon nagatakod sang mga suga ukon mga gamit sa bahin sang taytay ukon barko nga nagasalop sa tubig.

 Ano sa banta mo? Ang suction sa ulo sang kini resulta bala sang ebolusyon? Ukon gindesinyo ini?