Bangod sang teknolohiya subong, ginapaabot sang imo ginaubrahan, mga kaupod, ukon mga kliyente nga 24 oras sa bilog nga semana ukon 24-7 nga makontak ka nila. Amo nga mabudlay balansehon ang obra kag ang iban nga aspekto sang aton kabuhi, lakip ang kaangtanan naton sa aton bana ukon asawa.

•  Ang dapat mo mahibaluan

•  Mga tip sa pagbalanse sang obra kag iban nga aspekto sang kabuhi

•  Kon ano ang ginasiling sang iban nga mag-asawa

•  Bulig kon mag-istoryahanay kamo

•   Maagaw sang obra ang imo tion sa imo bana ukon asawa tungod sa teknolohiya. Pamatyag mo obligado ka nga sabton ang kada tawag, e-mail, ukon text bisan indi na oras sang imo obra.

   “Daw imposible na subong nga sa tapos sang obra mapuli ka sa inyo balay dayon maghinguyang sing tion sa imo pamilya bangod sang mga e-mail kag tawag sa obra. Sa amo, mapabay-an mo ang imo bana ukon asawa.”—Jeanette.

•   Para mabalanse ang obra kag ang pamilya, dapat may himuon ka gid. Kon wala, sigurado nga makuha sang imo obra ang imo tion sa pamilya.

   “Sa masami, ang una mo nga mapabay-an amo ang imo bana ukon asawa kay pensar mo, ‘Maintiendihan man niya ’ko na. Pasensiahon niya ’ko. Sa sunod mabawi lang ’ko sa iya.’”—Holly.

•   Unaha ang inyo pag-asawahay. Ang Biblia nagsiling: “Indi dapat bulagon sang tawo ang gin-isa sang Dios.” (Mateo 19:6, Ang Pulong sang Dios) Kon indi ka gani magsugot nga “bulagon” sang tawo sa imo bana ukon asawa, ngaa masugot ka nga himuon ini sang imo obra?

   “May pila ka kliyente nga abi nila kay ginabayaran ka nila, bisan ano oras makontak ka nila. Bangod prioridad ko ang akon asawa, ginasilingan ko sila nga indi ako puede kon day off ko, makontak lang ako sa ila.”—Mark.

   Pamangkuta ang imo kaugalingon: ‘Ginapakita ko bala sa akon ginahimo nga mas importante ang akon bana ukon asawa sangsa akon obra?’

•   Pangindii ang obra kon kinahanglanon. Ang Biblia nagsiling: “Ang kaalam yara sa mga maugdang.” (Hulubaton 11:2) Kon maugdang ka ukon ginakilala mo ang imo limitasyon, pangindian ukon ihatag mo ang obra sa iban.

   “Tubero ako, gani kon may magpaobra kag hilingagawon, pero indi ko masarangan tapuson sa tion nga luyag niya, ginapatigayon ko sia sa iban.”—Christopher.

   Pamangkuta ang imo kaugalingon: ‘Handa ko bala pangindian ang dugang nga obra kon magbatyag man lang ang akon bana ukon asawa nga ginabalewala ko sia? Nabatyagan bala sang akon bana ukon asawa nga handa ko himuon ina para sa iya?’

•   Mag-iskedyul nga duha lang kamo. Ang Biblia nagsiling: “May tion sa tagsa ka butang.” (Manugwali 3:1) Kon sobra kasako sa obra, importante gid nga mag-iskedyul sing tion para sa inyo nga duha.

   “Sa masami, kon tuman kami kasako, nagaiskedyul kami nga duha sing tion nga wala sing makatublag sa amon, bisan simple lang nga panyapon ukon pagdayandayan sa higad baybay.”—Deborah.

   Pamangkuta ang imo kaugalingon: ‘Nagaiskedyul bala ako sing tion nga wala sing makatublag sa akon upod sa akon bana ukon asawa? Kon ‘huo’ ang akon sabat, maugyon bala ang akon bana ukon asawa?’

•   I-off ang mga gadyet. Ang Biblia nagsiling: ‘Pat-ura ninyo ang mas importante nga mga butang.’ (Filipos 1:10) Puede mo ayhan ma-off ang imo mga gadyet agod indi ka matublag sang imo obra?

   “Ginatinguhaan ko gid nga mag-untat obra sa akon gintalana nga tion. Kon mag-abot na ina nga tion, gina-off ko ang notification sang akon phone.”—Jeremy.

   Pamangkuta ang imo kaugalingon: ‘Wala ko bala gina-off ang akon gadyet kay basi manawag ang akon ulubrahan ukon kliyente? Ano ang masiling sang akon bana ukon asawa parte sa sini?’

•   Mangin rasonable. Ang Biblia nagsiling: “Ipakita sa tanan nga tawo ang inyo pagkamakatarunganon.” (Filipos 4:5) Ang matuod, indi malikawan kon kaisa nga maapektuhan sang obra ang inyo pag-asawahay. Halimbawa, basi ang obra sang imo bana ukon asawa nagakinahanglan nga makontak sia bisan tapos na ang iya obra. Kon amo, mangin rasonable sa ginapaabot mo sa imo bana ukon asawa.

   “May diutay nga negosyo ang akon bana, kag bisan tapos na ang oras sang iya obra masami nga gulpi na lang may ipahingagaw sa iya. Naugot ako kon kaisa, pero bangod bastante man ang iya tion para sa akon, OK lang a.”—Beverly.

   Pamangkuta ang imo kaugalingon: ‘Nagapakita bala ako sang konsiderasyon sa obra sang akon bana ukon asawa, kag wala nagapaabot sang sobra nga tion sa iya? Ano ang masiling sang akon bana ukon asawa parte sa sini?’

 Una, binagbinaga ang masunod nga mga pamangkot nga ikaw lang. Dayon, istoryahi ninyo nga mag-asawa ang inyo mga sabat.

•   Nagreklamo na bala ang imo bana ukon asawa nga ginadala mo ang imo obra sa inyo balay? Kon huo, ugyon ka bala sa iya?

•   Diin nga bahin sang pagbalanse sang obra kag iban nga aspekto sang kabuhi ang sa banta mo mapauswag pa ninyo nga duha?

•   Nagahunahuna ka bala nga daw indi mabilin sang imo bana ukon asawa ang iya obra “sa ulubrahan”? Kon huo, ano ang imo rason?

•   Ano ang gusto mo nga bag-uhon sang imo bana ukon asawa parte sa pagbalanse sang obra kag iban nga aspekto sang inyo kabuhi?