Indi gid malikawan nga makaeksperiensia ang imo kabataan sang kapaslawan kon indi nila mahimo ang isa ka butang. Ano ang mahimo mo para indi sila maluyahan?

•  Ang dapat mo mahibaluan

•  Ang puede mo himuon

 Tanan kita makaeksperiensia gid sang kapaslawan. Ang Biblia nagasiling nga “kita tanan nagakasandad.” (Santiago 3:2) Nagakasandad man ang mga bata. Pero ang kapaslawan may maayo nga epekto kay makabulig ini sa kabataan nga maatubang ang mabudlay nga sitwasyon. Ini nga ikasarang indi awtomatiko nga matigayon sang mga bata pero matun-an nila ini. “Naobserbahan namon sang akon bana nga maayo gid ang epekto kon matun-an sang kabataan kon paano atubangon ang kapaslawan imbes nga balewalaon lang ini,” siling sang iloy nga si Laura. “Matun-an nila nga magpadayon bisan pa napaslawan sila.”

 Madamo nga kabataan ang indi kabalo sang ila himuon kon mapaslawan sila. Ang iban nga kabataan indi kabalo sang ila himuon kon mapaslawan sila kay ginapabatyag sila sang ila mga ginikanan nga wala sila sing sala. Halimbawa, kon manubo ang grado sang ila bata, basulon dayon sang pila ka ginikanan ang maestra ukon maestro. Kon nag-away ang ila bata kag ang iya abyan, basulon dayon sang ginikanan ang abyan.

 Kon amo sini, paano makatuon ang bata nga may salabton sia sa iya sala kon ginapabatyag sia sang iya mga ginikanan nga wala sia sing sala?

•   Tudlui ang imo kabataan nga may resulta ang ila ginahimo.

   Ang Biblia nagasiling: “Kon ano ang ginasab-ug sang tawo, ini man ang iya anihon.”—Galacia 6:7.

   Ang bisan ano nga ginahimo naton may resulta gid. Kon may naguba, kinahanglan kay-uhon. Kon may sala, may malain nga resulta. Dapat mabal-an ini sang mga bata kag mabatyagan nila nga may salabton sila kon makasala sila. Gani indi pagbasula ang iban ukon pagbalewalaon ang sala sang imo bata. Kundi, pabay-i nga maeksperiensiahan nila ang resulta sang ila sala nga nagakabagay sa ila edad. Dapat maintiendihan sang bata nga kon may nahimo sia nga sala, may malain gid ini nga resulta.

•   Buligi ang imo kabataan nga mangita sing solusyon.

   Prinsipio sa Biblia: “Bisan pa mapukan sing makapito ang matarong magabangon sia gihapon.”—Hulubaton 24:16.

   Maluyahan gid man ang isa kon mapaslawan sia. Pero may paglaum pa. Buligi ang imo bata nga mangita sing solusyon imbes nga basulon niya ang iban sa natabo. Halimbawa, kon na-failure sa eksam ang imo bata, buligi sia nga indi maluyahan kag palig-una sia nga magtuon sing maayo. (Hulubaton 20:4) Kon nag-away ang imo bata nga babayi kag ang iya abyan, buligi sia nga mangayo sing pasaylo bisan pa indi sia ang may sala.—Roma 12:18; 2 Timoteo 2:24.

•   Tudlui ang imo kabataan nga batunon nila nga may limitasyon sila.

   Prinsipio sa Biblia: “Ginasilingan ko ang tagsatagsa sa inyo nga indi kamo magpakataas sa inyo kaugalingon.”—Roma 12:3.

   Kon silingan mo ang imo bata nga sia “ang pinakamaayo” sa tanan, indi ina matuod kag indi gid ina makabulig sa iya. Kay bisan ang mga bata nga maalam sa eskwelahan indi man maka-perfect sa tanan nga tion. Kag bisan ang mga bata nga sagad sa pila ka sports wala man nagadaug pirme. Ang mga bata nga nagabaton nga may limitasyon sila, sa masami indi sila maluyahan kon mapaslawan.

   Ang Biblia nagasiling nga ang mga kabudlayan makabulig sa aton nga mangin mabakod kag makabatas. (Santiago 1:2-4) Gani bisan pa makapaluya ang kapaslawan, buligi ang imo kabataan nga mangin positibo gihapon.

   Kinahanglan sang panikasog kag tion para matudluan ang kabataan nga mangin mabakod. Pero makabulig gid ini sa ila kon mag-adulto na sila. “Ang mga tin-edyer nga nakahibalo sang himuon kon may problema sa masami wala nagahimo sang katuntuhan kon nabudlayan sila,” siling sang libro nga Letting Go With Love and Confidence. “Sa masami, kabalo sila sang ila himuon kon may matabo nga wala ginapaabot.” Makabulig gid ini sa ila kon adulto na sila.

 Tip: Mangin maayo nga halimbawa. Tandai nga ang pag-atubang mo sa kapaslawan makabulig gid sa imo kabataan nga maatubang man nila ang ila kapaslawan.