Ang Biblia nagasiling nga kabubut-on sang Dios nga ang mga tawo “maglikaw sa seksuwal nga imoralidad.” (1 Tesalonica 4:3) Sa Biblia, ang termino nga seksuwal nga imoralidad nagalakip sang pagpanghilahi, homoseksuwal nga mga buhat, kag pagpakig-sex sang lalaki kag babayi nga indi mag-asawa.

•  Ngaa importante sa Dios nga magpakasal ang lalaki kag babayi antes sila mag-upod?

•  Ano naman ang masiling sa pag-live-in antes sang kasal para mahibaluan kon bala bagay gid ang isa ka lalaki kag babayi?

•  Paano mapabakod sang mag-asawa ang ila pag-updanay?

•   Ang Dios ang naghimo sang kahimusan sa pag-asawahay. Amo ini ang ginhimo niya sang ginhiusa niya ang una nga lalaki kag babayi. (Genesis 2:22-24) Wala niya gintuyo nga mag-upod ang lalaki kag babayi nga wala makasal.

•   Nahibaluan sang Dios ang pinakamaayo para sa mga tawo. Tuyo niya nga ang pag-asawahay mangin permanente nga pag-upod sang lalaki kag babayi nga magahatag sang kaayuhan kag proteksion sa tanan nga miembro sang pamilya. Pamensari ini nga halimbawa. Pareho sa instruksion halin sa manufacturer nga nagatudlo sa imo kon paano i-assemble ang isa ka muebles, ang instruksion sang Dios nagatudlo man sa aton kon paano mangin malipayon ang pamilya. Ang mga instruksion sang Dios pirme gid makahatag sang kaayuhan sa mga nagasunod sa sini.—Isaias 48:17, 18.

•   Ang pag-sex nga wala makasal may malain gid nga mga resulta. Halimbawa, nagaresulta ini sa wala sa plano nga pagbusong, mga balatian nga ginapalaton paagi sa pagpakig-sex, kag problema sa emosyon.

•   Ginahatagan sang Dios ang lalaki kag babayi sing ikasarang sa pagpanganak paagi sa pag-sex. Para sa Dios, sagrado ang kabuhi, kag ang ikasarang sa pagpanganak isa ka hamili nga regalo. Gusto sang Dios nga pabaloran naton ina nga regalo paagi sa pagsunod sa iya kahimusan sa pag-asawahay.—Hebreo 13:4.

 Ang sekreto sang malipayon nga pag-asawahay indi amo ang pag-live-in anay nga wala sing commitment. Kundi ang sekreto, amo ang katutom sang lalaki kag babayi sa isa kag isa kag ang ila pagbuligay sa pagsolbar sa mga problema. a Ang kasal nagapabakod sang katutom sa isa kag isa.—Mateo 19:6.

 Wala sing perpekto nga pag-asawahay. Pero mapabakod sang mag-asawa ang ila pag-updanay paagi sa pagsunod sang mga laygay sa Biblia. Ari ang pila ka halimbawa:

•   Unaha ang kaayuhan sang imo asawa ukon bana sangsa imo kaugalingon.—1 Corinto 7:3-5; Filipos 2:3, 4.

•   Palanggaa kag respetuha ninyo ang kada isa.—Efeso 5:25, 33.

•   Pamensari anay ang imo ihambal.—Hulubaton 12:18.

•   Mangin mapinasensiahon kag handa sa pagpatawad.—Colosas 3:13, 14.