Ang “libro sang kabuhi,” nga ginatawag man “linukot sang kabuhi” ukon “tolon-an nga handumanan,” may mga ngalan sang mga tawo nga magabaton sang kabuhi nga walay katapusan. (Bugna 3:5; 20:12; Malaquias 3:16) Ginapili sang Dios ini nga mga ngalan base sa pagtuo kag pagkamatinumanon sa iya sang isa ka tawo.

 Ang tagsa ka matutom nga alagad sang Dios ara sa iya memorya, nga daw pareho lang nga ginasulat ang ila ngalan sa libro, sugod pa sang “pagtukod sa kalibutan.” (Bugna 17:8) Ang ngalan sang matutom nga si Abel mahimo amo ang una nga nasulat sa libro sang kabuhi. (Hebreo 11:4) Pero indi lamang ini listahan sang mga ngalan kay ang libro sang kabuhi nagapakita nga si Jehova mahigugmaon nga Dios nga ‘nakakilala sang mga natungod sa iya.’​—2 Timoteo 2:19; 1 Juan 4:8.

Puede bala mapanas ang mga ngalan sa “libro sang kabuhi”?

 Huo. Ginsilingan sang Dios ang indi matinumanon nga mga Israelinhon: “Kon sin-o ang nakasala sa akon, ang iya ngalan amo ang akon panason sa akon libro.” (Exodo 32:33, Ang Pulong sang Dios) Pero kon mangin matutom kita, indi kita pagpanason sa “linukot sang kabuhi.”​—Bugna 20:12.