Bilang bahin sang ila amot para sa matuod nga pagsimba, ang mga Israelinhon sang una ginsugo nga maghatag sang ikanapulo, a ukon diesmos, sang ila kita kada tuig. Ang Dios nagsiling sa ila: “Ihatag gid ninyo kada tuig ang ikanapulo sang tanan nga patubas sang inyo binhi sa uma.”—Deuteronomio 14:22.

 Ang sugo nga maghatag sing ikanapulo bahin sang Mosaikong Kasuguan, ang kasuguan nga ginhatag sang Dios sa mga Israelinhon sang una. Wala na ginapatuman sa mga Cristiano ang Mosaikong Kasuguan, gani indi na sila obligado nga maghatag sing ikanapulo. (Colosas 2:13, 14) Kundi, ang kada Cristiano makahatag sang iya amot “suno sa ginpamat-od niya sa iya tagipusuon, indi sing paganot ukon napilitan, kay ginahigugma sang Dios ang nagahatag sing malipayon.”—2 Corinto 9:7.

•  Ang Paghatag sing Ikanapulo Base sa Biblia—Ang “Daan nga Katipan”

•  Ang Paghatag sing Ikanapulo Base sa Biblia—Ang “Bag-ong Katipan”

 Makapila ka beses nga ginsambit ang paghatag sing ikanapulo sa seksion sang Biblia nga ginatawag, Daan nga Katipan. Ang kalabanan sini natabo sa tapos mahatag sa pungsod sang Israel ang Mosaikong Kasuguan paagi kay Moises. Pero, may duha ka halimbawa nga natabo sa tion antes ginhatag ina nga sugo.

Antes sang Mosaikong Kasuguan

 Ang una nga tawo nga narekord nga naghatag sing ikanapulo amo si Abram, ukon Abraham. (Genesis 14:18-20; Hebreo 7:4) Ginapakita sang rekord nga ang paghatag sing ikanapulo ni Abram makaisa lang kag ginhatag niya ini sa hari kag saserdote sang Salem. Wala na sing mabasa sa Biblia nga si Abraham ukon ang iya mga anak naghatag liwat sing ikanapulo.

 Ang ikaduha nga tawo nga ginsambit sa Biblia nga naghatag sing ikanapulo amo si Jacob, ang apo ni Abraham. Nagpanaad si Jacob nga kon pakamaayuhon sia sang Dios, ihatag niya sa Dios ang “ikanapulo sang tanan nga butang” nga nabaton niya. (Genesis 28:20-22) Suno sa pila ka iskolar sang Biblia, mahimo naghatag si Jacob sing ikanapulo paagi sa paghalad sang mga sapat. Gintuman gid ni Jacob ang iya panaad, pero wala niya ginsugo ang iya pamilya nga himuon man ini.

Sa Idalom sang Mosaikong Kasuguan

 Ginsugo ang mga Israelinhon sang una nga maghatag sing ikanapulo para suportahan ang ila mga hilikuton para sa pagsimba.

•   Ang ikanapulo nagasuporta sa mga Levinhon kag sa mga saserdote, nga bug-os tion nga nagaalagad, bangod wala sila sing kaugalingon nga duta nga kultibahon. (Numeros 18:20, 21) Ang mga Levinhon nga indi saserdote nagabaton sang ikanapulo halin sa katawhan kag nagahatag sang pinakamaayo nga “ikanapulo nga bahin halin sa ikanapulo” sa mga saserdote.—Numeros 18:26-29.

•   Maathag nga ginapatuman man nga makaduha maghatag sing ikanapulo kada tuig. Nakabenepisyo gid sa sini ang mga Levinhon kag mga indi Levinhon nga katawhan. (Deuteronomio 14:22, 23) Ginagamit ini sang mga Israelinhon nga pamilya sa mga pinasahi nga kapiestahan, kag sa pila ka tuig, ginahatag ini sa mga imol gid katama para sa ila mga kinahanglanon.—Deuteronomio 14:28, 29; 26:12.

 Paano mabal-an kon ano ang ikanapulo? Ang mga Israelinhon nagapain sang ikanapulo nga bahin sang patubas sang ila duta kada tuig. (Levitico 27:30) Kon kuarta ang ila ihatag imbes nga patubas bilang ikanapulo, dugangan nila ini sing 20 porsiento. (Levitico 27:31) Ginsugo man sila nga ihatag ang “ikanapulo nga bahin sang mga baka kag mga karnero.”—Levitico 27:32.

 Para mabal-an ang ikanapulo sang ila kasapatan, ginapain sang mga Israelinhon ang ikanapulo nga sapat nga magua sa toril. Suno sa Kasuguan, indi nila pagtan-awon ukon pag-islan ining ginpain nga mga sapat, ukon indi man nila ini puede bayluhan sang kuarta. (Levitico 27:32, 33) Pero, ang ikaduha nga ikanapulo nga gamiton para sa mga kapiestahan kada tuig puede bayluhan sang kuarta. Mas kombeniente ini sa mga Israelinhon nga malayo pa ang ginalakbay para magtambong sa mga kapiestahan.—Deuteronomio 14:25, 26.

  San-o nagahatag sing ikanapulo ang mga Israelinhon? Ang mga Israelinhon nagahatag sing ikanapulo kada tuig. (Deuteronomio 14:22) Pero, wala ini ginahimo sa kada ikapito nga tuig. Ina nga tuig, adlaw nga inugpahuway, ukon tuig nga inugpahuway kay wala sing himuon nga pagsab-ug ukon pag-ani ang mga Israelinhon. (Levitico 25:4, 5) Bangod sini, wala sing ihatag nga ikanapulo sa tion sang tig-alani. Sa kada ikatlo kag ikan-om nga tuig sang ikapito nga tuig nga Adlaw nga Inugpahuway, ginahatag sang mga Israelinhon ang ikaduha nga ikanapulo sa mga imol kag sa mga Levinhon.—Deuteronomio 14:28, 29.

 Ano ang silot kon indi makahatag sing ikanapulo? Wala sing may ginsambit sa Mosaikong Kasuguan nga silot kon ang isa indi maghatag sing ikanapulo. Ang mga Israelinhon nagahatag sing ikanapulo indi bangod nahadlok sila nga silutan, kundi para sa ila, amo ini ang dapat himuon. Dapat isiling sang mga Israelinhon sa atubangan sang Dios nga naghatag sila sing ikanapulo kag pangabayon ang iya pagpakamaayo bangod sini. (Deuteronomio 26:12-15) Ginatamod sang Dios nga pagpangawat sa iya ang indi paghatag sing ikanapulo.—Malaquias 3:8, 9.

 Kabug-atan bala ang paghatag sing ikanapulo? Indi. Nagpromisa ang Dios sa mga Israelinhon nga kon maghatag sila sing ikanapulo, ibubo niya ang iya mga pagpakamaayo tubtob wala na sing kulang. (Malaquias 3:10) Sang wala naghatag sing ikanapulo ang mga Israelinhon, nag-antos sila. Wala sila ginpakamaayo sang Dios kag wala man sila makabenepisyo sa pag-alagad sang mga saserdote kag mga Levinhon kay wala na nila ini ginasuportahan.—Nehemias 13:10; Malaquias 3:7.

 Sang diri si Jesus sa duta, ginapatuman gihapon ang ikanapulo sa mga sumilimba sang Dios. Pero, gindula ini sa tapos mapatay si Jesus.

Sang panahon ni Jesus

 Mabasa sa Bag-ong Katipan nga ang mga Israelinhon padayon nga nagahatag sing ikanapulo sang ari si Jesus sa duta. Ginkilala ni Jesus nga obligado sila sa paghatag sing ikanapulo, pero ginpakamalaut niya ang mga lider sang relihion nga estrikto gid nga nagahatag sing ikanapulo pero ‘ginapatumbayaan nila ang mas importante nga mga sugo sang Kasuguan may kaangtanan sa katarungan, kaluoy, kag katutom.’—Mateo 23:23.

Sa tapos mapatay si Jesus

 Wala na ginapatuman ang paghatag sing ikanapulo sa tapos mapatay si Jesus. Paagi sa paghalad ni Jesus sang iya kabuhi, ginpanas ukon gindula sini ang Mosaikong Kasuguan, lakip na ang ‘sugo nga mangolekta sang mga ikanapulo.’—Hebreo 7:5, 18; Efeso 2:13-15; Colosas 2:13, 14.