Isa lang ka bes nga ginsambit sa Biblia ang tattoo ukon pika. Mabasa ini sa Levitico 19:28 nga nagasiling: “Dili . . . magbutang sing bisan ano nga pika sa inyo.” Ginhatag sang Dios ini nga sugo sa pungsod sang Israel, para mangin tuhay sila sa mga tawo sa palibot nila nga nagamarka sa ila panit sang mga ngalan ukon simbulo sang ila mga dios. (Deuteronomio 14:2) Ang mga Cristiano wala nalakip sa Kasuguan nga ginhatag sa Israel, pero ang prinsipio sa sini dapat binagbinagon sing serioso.

Puede bala magpa-tattoo ang isa ka Cristiano?

 Ang masunod nga mga teksto makabulig sa imo sa pagdesisyon:

•   “Ang mga babayi magpamuni . . . nga may kaugdang.” (1 Timoteo 2:9) Ini nga prinsipio naaplikar sa mga lalaki kag babayi. Dapat respetuhon naton ang balatyagon sang iban kag indi magkuha sing atension sang mga tawo.

•   Ang iban gusto magpakilala kon sin-o gid sila ukon mangin independiente, samtang ang iban naman nagapa-tattoo para pamatud-an nga mahimo nila kon ano ang ila gusto sa ila lawas. Pero ang Biblia nagalaygay sa mga Cristiano: “Ipresentar ninyo ang inyo lawas nga isa ka halad nga buhi, balaan, kalahamut-an sa Dios, isa ka sagrado nga pag-alagad lakip ang inyo ikasarang sa pagpangatarungan.” (Roma 12:1) Gamita ang imo “ikasarang sa pagpangatarungan” sa pagbinagbinag kon ngaa gusto mo magpa-tattoo. Kon gusto mo lang magsunod sa uso ukon magpamiembro sa isa ka grupo, dumduma nga mahimo magbag-o ang imo hunahuna sa ulihi pero ang tattoo permanente. Ang pag-usisa sa imo mga motibo makabulig sa imo nga maghimo sing husto nga desisyon.—Hulubaton 4:7.

•   “Kon magplano ka sing maayo kag magmapisan, sigurado nga magauswag ka. Kon magpadasodaso ka, sigurado nga magaimol ka.” (Hulubaton 21:5, Ang Pulong sang Dios) Ang mga nagapa-tattoo masami nga nagapadasudaso lang sa ila desisyon, pero may epekto ini sa ulihi sa ila relasyon sa iban kag sa pagpangita sing trabaho. Isa pa, mahal ang tattoo kag masakit ini kon ipakakas. Ginapakita sang research kag sang nagauswag nga negosyo sang pagpakakas sang mga tattoo nga madamo sa mga nagpa-tattoo ang nagsiling nga kuntani wala nila ini ginhimo.