Ano ang Ginasiling sang Biblia Parte sa mga Dinosaur?
Ang sabat sang Biblia
Ang Biblia wala nagsambit sing direkta parte sa mga dinosaur. Pero nagsiling ini nga “gintuga [sang Dios] ang tanan nga butang,” gani posible gid nga lakip ang mga dinosaur sa mga butang nga gintuga niya. a (Bugna 4:11) Bisan pa wala ginsambit sang Biblia ang mga dinosaur, nagsiling ini parte sa grupo sang mga sapat nga mahimo nagalakip sa ila:
“Dalagku nga mga tinuga sa dagat.”—Genesis 1:21.
“Lainlain nga sahi sang iban pa nga nagakamang nga mga sapat sa duta.”—Genesis 1:25.
“Ilahas nga mga sapat sa duta.”—Genesis 1:25.
Ang mga dinosaur bala nagtuhaw halin sa iban nga sapat?
Base sa mga rekord sang fossil, ang mga dinosaur gulpi nga nagluntad imbes nga nagtuhaw sing amat-amat paagi sa ebolusyon. Sibu gid ini sa ginasiling sang Biblia nga gintuga sang Dios ang tanan nga sapat. Halimbawa, ang Salmo 146:6 nagsiling nga ang Dios amo “ang Isa nga naghimo sang langit kag duta, sang dagat, kag sang tanan nga yara sa sini.”
San-o nagkabuhi ang mga dinosaur?
Ang Biblia nagsiling nga ang mga sapat sa dagat kag sa duta gintuga sang ikalima kag ikan-om nga adlaw, ukon tion sang pagpanuga. b (Genesis 1:20-25, 31) Gani ginapakita sang Biblia nga nagkabuhi kag nagluntad ang mga dinosaur sa sulod sang malawig nga tion.
Ang Behemot kag ang Leviatan bala mga dinosaur?
Indi. Ini nga mga sapat nga ginsambit sa libro sang Job indi masiguro kon ano gid, pero ginapatihan sang kalabanan nga ang Behemot amo ang hippopotamus kag ang Leviatan amo ang buaya. Ini nga pagpati nagasanto man sa paglaragway sang Biblia sa ila. (Job 40:15-23; 41:1, 14-17, 31) Kon ano man ini, ang “Behemot” kag ang “Leviatan” indi ang mga sapat nga dinosaur. Ginsilingan sang Dios si Job nga panilagan ini nga mga sapat, kag madugay na nga napapas ang mga dinosaur sang nagkabuhi sing malawig si Job.—Job 40:16; 41:8.
Ano ang natabo sa mga dinosaur?
Ang Biblia wala sing ginasiling parte sa pagkapapas sang mga dinosaur. Pero nagsiling ini nga gintuga ang tanan nga butang ‘bangod sa kabubut-on sang Dios.’ Gani may katuyuan gid ang Dios sa pagtuga sa mga dinosaur. (Bugna 4:11) Sang natuman na ini nga katuyuan, gintugutan sang Dios nga mapapas ang mga dinosaur.
a Ginapamatud-an sang mga rekord sang fossil nga may mga dinosaur sang una. Ginapakita sang mga fossil nga may panahon nga tama kadamo ang mga dinosaur, kag sarisari ang ila hitsura kag kadakuon.
b Sa Biblia, ang tinaga nga “adlaw” mahimo magpatuhoy sa hut-ong sang tion nga nagalawig sing linibo ka tuig.—Genesis 1:31; 2:1-4; Hebreo 4:4, 11.
Basi Manamian Ka Man
SABAT SA MGA PAMANGKOT SA BIBLIA
Nagaugyon Bala ang Siensia sa Biblia?
May mga sayop bala sa Biblia kon parte sa siensia?
IMPORTANTE NGA MGA PANUDLO
Gintuga Bala ang Uniberso?
Ang ginasiling sang Biblia parte sa pagpanuga ginapatihan sang madamo nga indi matuod ukon para sa ila sugidsugid lang ini. Mapatihan gid bala ang ginasiling sang Biblia?
IMPORTANTE NGA MGA PANUDLO SANG BIBLIA
Ngaa Gintuga sang Dios ang Duta?
Kanami gid sang pagtuga sang Dios sang aton duta. Insaktuhan lang ang distansia sini sa adlaw, hustuhan ang paghilay sini kag insaktuhan man ang kadasigon sang pagtiyog sini. Ngaa nagpangabudlay gid ang Dios sa pagtuga sang duta?
MAGMATA!
Ang Wala Masugid nga Kasaysayan sang Pagpanuga
Ang kasaysayan bala sang Biblia parte sa pagpanuga nagaugyon sa mga kamatuoran sang siensia?
PARTE SA AMON
Mag-request nga Kadtuan Ka
Istoryahi ninyo ang isa ka pamangkot sa Biblia, ukon ang dugang nga impormasyon parte sa mga Saksi ni Jehova.