Ang Babilonia nga Daku, nga mabasa sa libro sang Bugna, amo ang kabilugan nga grupo sang butig nga mga relihion sa kalibutan, nga wala ginabaton sang Dios. a (Bugna 14:8; 17:5; 18:21) Bisan indi palareho ini nga mga relihion, ginapahilayo sini tanan ang mga tawo sa pagsimba sa matuod nga Dios, si Jehova.​—Deuteronomio 4:​35.

Mga paagi para makilala ang Babilonia nga Daku

1.   Ang Babilonia nga Daku isa ka simbulo. Ginalaragway sia sang Biblia nga “isa ka babayi” kag “dakung makihilawason nga babayi,” nga ang iya ngalan “isa ka misteryo: ‘Babilonia nga Daku.’” (Bugna 17:​1, 3, 5) Ang libro sang Bugna ginapresentar “paagi sa mga tanda,” gani rasonable isiling nga ang Babilonia nga Daku isa ka simbulo, indi literal nga babayi. (Bugna 1:1) Dugang pa, “nagapungko [sia] sa ibabaw sang madamo nga tubig,” nga “nagarepresentar sa mga katawhan, mga kadam-an, mga pungsod kag mga hambal.” (Bugna 17:​1, 15) Indi ini mahimo sang literal nga babayi.

2.   Ginarepresentar sang Babilonia nga Daku ang isa ka internasyonal nga organisasyon. Gintawag sia nga “daku nga siudad nga may ginharian sa mga hari sang duta.” (Bugna 17:18) Gani, bilog nga kalibutan ang iya kasangkaron kag impluwensia.

3.   Ang Babilonia nga Daku isa ka relihioso nga organisasyon, indi pulitikal ukon komersial. Ang Babilonia sang una isa gid ka relihioso nga siudad, kay bantog ini sa “pagpaniwtiw” kag “binabaylan.” (Isaias 47:​1, 12, 13; Jeremias 50:​1, 2, 38) Makita pa gani didto ang butig nga relihion nga nagapamatok sa matuod nga Dios, si Jehova. (Genesis 10:​8, 9; 11:​2-4, 8) Ang mga manuggahom sang Babilonia arogante nga naghimo sa ila kaugalingon nga labaw kay Jehova kag mas importante sangsa pagsimba sa iya. (Isaias 14:​4, 13, 14; Daniel 5:​2-4, 23) Ang Babilonia nga Daku kilala man sa iya “espiritistiko nga mga buhat.” Ginapakita sini nga isa sia ka relihioso nga organisasyon.​—Bugna 18:23.

    Ang Babilonia nga Daku indi pulitikal nga organisasyon, bangod “ang mga hari sang duta” nagalalaw sa iya kalaglagan. (Bugna 17:​1, 2; 18:9) Indi man sia komersial nga organisasyon, kay indi sia ang ginapatuhuyan sang Biblia nga “mga negosyante sa duta.”​—Bugna 18:11, 15.

4.   Ang Babilonia nga Daku nagakabagay gid sa pagrepresentar sa butig nga relihion. Imbes nga tudluan ang mga tawo nga mangin malapit sa matuod nga Dios nga si Jehova, ginatudluan sang butig nga relihion ang mga tawo nga magsimba sa iban nga dios. Ginatawag ini sang Biblia nga “espirituwal nga pagpakighilawas.” (Levitico 20:6; Exodo 34:15, 16) Ang mga pagpati parte sa Trinidad kag imortal nga kalag kag ang paggamit sang mga imahen sa pagsimba naghalin pa sa Babilonia sang una kag padayon nga ginahimo sang butig nga relihion. Ginasamuan man sini nga mga relihion ang ila pagsimba sang gugma sa kalibutan. Ini nga pagluib ginatawag sang Biblia nga espirituwal nga pagpanghilahi.​—Santiago 4:4.

    Ang manggad sang butig nga relihion kag ang ila pagpakitakita sini nagasantu gid sa paglaragway sang Biblia sa Babilonia nga Daku, nga “napanaptan sing purpura kag eskarlata” kag “napunihan sing bulawan kag malahalon nga mga bato kag perlas.” (Bugna 17:4) Ang Babilonia nga Daku amo ang ginhalinan sang “makangilil-ad nga mga butang sang duta,” ukon mga panudlo kag mga buhat nga nagapakahuya sa Dios. (Bugna 17:5) Ang mga miembro sang butig nga relihion amo ang “mga katawhan, mga kadam-an, mga pungsod kag mga hambal” nga nagasuporta sa Babilonia nga Daku.​—Bugna 17:15.

 Ang Babilonia nga Daku amo ang balasulon sang kamatayon “sang tanan nga ginpatay sa duta.” (Bugna 18:24) Sa bilog nga kasaysayan, wala lang gindabukan sang butig nga relihion ang mga inaway kag terorismo, kundi wala man nila gintudluan ang mga tawo sang kamatuoran parte kay Jehova, ang Dios sang gugma. (1 Juan 4:8) Isa ini ka rason sang grabe nga pagpinatyanay. Gani, kon gusto sang isa nga malipay ang Dios sa iya, kinahanglan niya ‘maggua,’ ukon magpain, sa butig nga relihion.​—Bugna 18:4; 2 Corinto 6:​14-​17.