Ano ang Hitsura sang Yawa?

I-PLAY

Ang sabat sang Biblia

Ang Yawa isa ka indi makita nga espiritu nga persona, buot silingon indi makita ang iya pisikal nga hitsura.—Efeso 6:11, 12.

Suno sa popular nga paglaragway, ang hitsura sang Yawa daw pareho sang kanding. May sungay, ikog, kag nagakapot sing pitchfork ukon daku nga tinidor. May nagsiling nga amo sini ang paglaragway sang mga pintor mga isa ka libo na ka tuig sadto nga mahimo naimpluwensiahan sang himuhimo nga mga istorya kag dumaan nga mitolohiya.

Kon Paano Ginlaragway sang Biblia ang Yawa

Ang Biblia naggamit sing mga palaanggiran para ilaragway ang Yawa. Makabulig ini nga mahibaluan naton indi ang hitsura kundi ang iya personalidad. Amo sini ang pila ka pagpaanggid sang Biblia:

Isa ka anghel sang kapawa. Nagapakunokuno sia nga maayo para magpati ang mga tawo sa iya mga panudlo sa baylo nga patihan ang panudlo sang Dios.—2 Corinto 11:14.
Isa ka nagangurob nga leon. Mapintas niya nga ginaatake ang mga sumilimba sang Dios.—1 Pedro 5:8.
Isa ka daku nga dragon. Makahaladlok sia, gamhanan, kag makahalalit.—Bugna 12:9.

Mga bersikulo sa Biblia parte sa Yawa

2 Corinto 11:14: “Si Satanas mismo nagapakunokuno nga anghel sang kapawa.”

Buot silingon: Nagapakunokuno si Satanas nga maayo para patalangon ang mga tawo nga sundon ang iya panudlo sa baylo sang panudlo sang Dios.
Efeso 6:11: “Isuklob ang kompleto nga hinganib halin sa Dios agod makatindog kamo sing malig-on batok sa tuso nga mga pahito sang Yawa.”

Buot silingon: Nagahimo ang Yawa sing mga paagi para indi pagtumanon sang mga tawo ang Dios.
Santiago 4:7: “Magpasakop kamo sa Dios; apang pamatuki ang Yawa, kag magapalagyo sia sa inyo.”

Buot silingon: Mapierde sang isa ka tawo si Satanas paagi sa pagtuman sa Dios sa baylo sang Yawa.
1 Pedro 5:8: “Ang inyo kaaway, ang Yawa, nagaluyong subong sang nagangurob nga leon, nga nagapangita sing tulukbon.”

Buot silingon: Ginadumtan sang Yawa ang mga nagatuman sa Dios kag gusto niya nga gub-on ang ila pagpakig-abyan sa Dios.