“Gani, magpaubos kamo sa idalom sang gamhanan nga kamot sang Dios, agod bayawon niya kamo sa gintalana nga tion, samtang ginatugyan ninyo sa iya ang tanan ninyo nga kabalaka, kay nagaulikid sia sa inyo.”—1 Pedro 5:6, 7, Bag-ong Kalibutan nga Badbad.

 “Gani magpaubos kamo sa idalom sang gamhanan nga kamot sang Dios, agod nga bayawon niya kamo sa iya nagakaigo nga tion. Itugyan ninyo sa iya ang tanan ninyo nga mga palaligban, kay nagakabalaka sia sa inyo.—1 Pedro 5:6, 7, Maayong Balita nga Biblia.

 Paagi sa ginsiling ni apostol Pedro sa sini nga teksto, ginpasalig niya ang mga Cristiano nga makapangamuyo sila sa Dios parte sa ila mga problema kag kabalaka. Nanamian ang Dios sa mga tawo nga mapainubuson, kag padyaan gid niya sila.

 “Magpaubos kamo sa idalom sang gamhanan nga kamot sang Dios.” Sa Biblia, ang kamot sang Dios masami nga nagapatuhoy sa iya gahom sa pagluwas kag pag-amlig. (Exodo 3:19; Deuteronomio 26:8; Esdras 8:22) Ang mga Cristiano nagapaubos sa gamhanan nga kamot sang Dios kon magsalig sila sa iya. Nahibaluan nila nga may mga limitasyon sila kag indi nila masarangan ang mga pagtilaw sa ila lang kaugalingon nga pagtinguha. (Hulubaton 3:5, 6; Filipos 4:13) Nagasalig sila nga may gahom ang Dios para buligan sila sa tion nga kinahanglan gid nila kag sa pinakamaayo nga paagi.—Isaias 41:10.

 “Agod bayawon niya kamo sa gintalana nga tion.” Ang mga mapinasensiahon nga nagabatas sang mga pagtilaw makasalig nga bayawon sila sang Dios sa ulihi, ukon padyaan sila. Indi sia magtugot nga tilawan sing sigesige ang iya mga sumilimba ukon sing sobra sa ila masarangan. (1 Corinto 10:13) Pero, kon padayon sila nga maghimo sing maayo, sigurado gid nga padyaan sila sang Dios “sa nagakaigo nga tion.”—Galacia 6:9.

 “Samtang ginatugyan ninyo sa iya ang tanan ninyo nga kabalaka, kay nagaulikid sia sa inyo.” Matugyan ukon mahaboy, sang mga Cristiano ang tanan nila nga kabalaka sa Dios paagi sa pagpangamuyo sa iya. Ang isa ka reperensia nagsiling: “Ang verb nga ihaboy nagapahangop sang pagpamuersa para iwaslik ang isa ka butang palayo sa aton. Buot silingon, hungod ini nga ginahimo.” Kon nahaboy na sang isa ka Cristiano ang iya mga kabalaka sa Dios, mabuhinan na ini kag maeksperiensiahan na niya ang ginatawag sang Biblia nga “paghidait sang Dios.” (Filipos 4:6, 7) Sigurado sia nga gusto sia buligan sang Dios bangod nabal-an niya nga nagaulikid sa iya ang Dios kag gamiton Niya ang Iya daku nga gahom para alay-ayon sia.—Salmo 37:5; 55:22.

 Ang kapitulo 5 amo ang katapusan nga kapitulo sang una nga sulat ni apostol Pedro sa mga Cristiano. (1 Pedro 1:1) Pareho subong, ang mga sumulunod sang Cristo sadto nag-atubang man sang sarisari nga mga pagtilaw sa ila pagtuo nga mahimo amo ang rason kon ngaa nagakabalaka gid sila. (1 Pedro 1:6, 7) Bangod nahibaluan ni Pedro ang ila mga kabudlayan, ginpadal-an sila ni Pedro sang makapalig-on nga sulat sang mga 62-64 C.E.—1 Pedro 5:12.

 Gintapos ni Pedro ang iya sulat paagi sa makapalig-on nga pahanumdom para sa mga nagaatubang sing mga pagtilaw bangod sa ila pagtuo. Kon mangin mapainubuson sila kag magsalig sa Dios, makasalig sila nga buligan sila sang Dios nga mangin malig-on. (1 Pedro 5:5-10) Ang ginhambal ni Pedro makapalig-on man sa mga Cristiano nga ginahingabot subong.

 Tan-awa ining malip-ot nga video para mahibaluan mo ang sumaryo sang nahauna nga sulat ni Pedro.