Ang moderno nga organisasyon sang mga Saksi ni Jehova nagsugod sang hingapusan sang ika-19 nga siglo. Sadto nga tion, ginsugdan sang isa ka gamay nga grupo sang mga estudyante sa Biblia nga nagaistar sa Pittsburgh, Pennsylvania, sa Estados Unidos, ang isa ka sistematiko nga pagtuon sa Biblia. Ginkomparar nila ang mga doktrina nga ginatudlo sang mga relihion sa ginatudlo sang Biblia. Dayon, ginbalhag nila ang ila natun-an sa mga libro, pamantalaan, kag dyurnal nga ginatawag subong Ang Lalantawan—Nagabantala sang Ginharian ni Jehova.

 Nalakip sa sining sinsero nga mga estudyante sang Biblia si Charles Taze Russell. Bisan pa si Russell ang nanguna sa pagtudlo sa Biblia sadto nga tion kag ang una nga editor sang Ang Lalantawan, indi sia founder sang isa ka bag-o nga relihion. Tulumuron ni Russell kag sang mga Estudyante sang Biblia, ang pagtawag sa ila grupo sadto, ang pagpalapnag sang panudlo ni Jesucristo kag pag-ilog sa kongregasyon sang unang siglo nga mga Cristiano. Si Jesus ang Tagtukod sang Cristianismo, gani para sa amon sia ang founder sang amon organisasyon.—Colosas 1:18-20.