Si Daiane isa sa mga Saksi ni Jehova kag bug-os tion nga ebanghelisador sa Brazil. Isa ka adlaw, samtang nagapanaksi sia paagi sa telepono, naistorya niya ang bataon nga mag-asawa nga interesado magtuon sa Biblia. Ginsilingan nila si Daiane nga masaylo sila sa malayo nga lugar nga wala sing kuryente ukon Internet. Kag wala sing mga Saksi ni Jehova nga nagaistar didto. Para mapadayon nila ang ila pag-Bible study, ginhatag sang mag-asawa ang numero sang publiko nga telepono sa ila lugar, kag may ginkasugtan sila nga tatlo kon ano nga adlaw kag oras sila maistoryahanay.

 Suno sa adlaw kag oras nga ila ginkasugtan, nagtawag si Daiane sa publiko nga telepono kag nagsabat ang mag-asawa! Sa sulod sang masunod nga duha ka semana, tatlo pa ka beses nga naka-Bible study sila upod kay Daiane paagi sa telepono.

 Pero pagkatapos sina, wala na niya naistorya ang mag-asawa sa telepono. Bisan pa sini, nagpadayon si Daiane sa pagtawag sa telepono sing tatlo ka beses kada semana, kag ginapanaksihan niya ang bisan sin-o nga makasabat. Bilang resulta, nakasugod si Daiane sa pag-Bible study sa pila ka tawo sa sina nga lugar.

 Isa ka adlaw, samtang naga-Bible study si Daiane kag ang iya bana sa isa ka pamatan-on nga lalaki paagi sa telepono, nabatian sang isa ka lider sang simbahan sa sina nga lugar ang ila pag-istoryahanay. Nagtupad sia sa pamatan-on nga lalaki para mas mabatian niya ang ila pag-istoryahanay. Dayon gin-istorya niya si Daiane kag ang bana sini. Nanamian gid sia sa iya nabatian kag gusto man niya nga magpa-Bible study!

 Wala madugay, si Daiane kag ang iya bana may anom na ka Bible study paagi sa telepono sa sina nga lugar, kag lakip sa ila ang lider sang simbahan. Ang pila ka Bible study nakatambong na sa Cristianong mga miting paagi sa pag-tie-in sa sina man nga publiko nga telepono. Ang isa sa ila naghimo pa gani sang pulungkuan para mapungkuan sang mga naga-study.

 Nalipay gid si Daiane kag ang iya bana sa sining kahigayunan nga mabantala ang mensahe sang Ginharian sa sining malayo nga lugar. Siling ni Daiane, “Ginasigurado gid ni Jehova nga mabatian sang bisan sin-o ang maayong balita, bisan pa nagaistar sia sa malayo nga lugar.”