Sa tion sining COVID-19 nga pandemic, gin-adjust sang mga kauturan ang ila pamaagi sa pagsugid sa iban sang makalilipay nga mensahe sang Biblia. Imbes nga makig-istorya sa mga tawo sa publiko ukon magpamalaybalay, masami nga ginasugid nila ang mensahe paagi sa telepono kag mga sulat. a Madamo nga tawo ang nalipay sa ila panikasog kag makita gid ang pagpakamaayo ni Jehova sa ila ginahimo. (Hulubaton 16:3, 4) Binagbinaga ang pila ka eksperiensia halin sa isa ka pungsod.

 Antes sang pandemic, regular nga ginakadtuan ni Helen ang isa ka hoben nga babayi kag ginatanyagan sia nga tun-an ang Biblia upod sa iya. Pirme ini ginabalibaran sang babayi. Bisan pa sini, isa ka adlaw antes magsugod ang lockdown bangod sa COVID-19, ginhatagan sia ni Helen sang Biblia kag sang libro nga Ano ang Ginatudlo sang Biblia sa Aton? Sa tion sang lockdown, gintanyagan liwat ni Helen ang babayi sang pagtuon sa Biblia. Ginpaathag niya nga himuon nila ini paagi sa telepono. Nagpasugot ang babayi. Nanamian gid sia sa ila pag-Bible study kag wala madugay ginsilingan niya si Helen kon puede sila maka-Bible study kada adlaw! Nagtambong man sia sa Cristianong mga miting sing regular paagi sa telepono. Dugang pa, ginaaplikar niya ang mga panudlo sang Biblia sa iya kabuhi kag ginasugid man niya sa iban ang iya natun-an.

 Bilang bahin sang ila personal nga ministeryo, ginsulatan sang mga Saksi sa isa ka kongregasyon ang mga pulis sa ila lugar. Gindayaw nila ang mga pulis kag ginpasalamatan sa ila importante nga serbisyo sa komunidad. Nakibot gid ang mga pulis. Ang isa ka pulis nagsiling sa isa ka gulang sa kongregasyon nga si Jefferson, “Abi ko indi gusto sang mga Saksi ni Jehova ang mga pulis.” Ginpaathag ni Jefferson nga indi ina matuod. Nalipay gid ang mga pulis sa sining positibo nga mga sulat amo nga ginpatapik nila ini sa entrance sang police station. “Basi makabulig ini para tamdon man kami sing positibo sang iban,” siling sang isa pa ka pulis.

 Si Edna kag si Ednalyn pareho nga regular payunir. b Indi sila maka-attend sa miting sa kongregasyon paagi sa videoconference kay wala sila sang internet sa ila balay. Gani gintawgan nila sa telepono ang ila indi Saksi nga kaingod kon puede sila maka-connect sa iya Wi-Fi kag maamot lang sila sa balayran. Nagpasugot ang ila kaingod nga mag-connect sila kag siling niya indi na sila magbayad. Sang gin-agda sia ni Edna kag ni Ednalyn nga magtambong sa miting, nag-attend sia. Subong, ining ila kaingod upod sa iya bata kag duha ka apo nga babayi naga-Bible study na upod sa mga Saksi kag regular man nga naga-attend sa Cristianong mga miting.

 Gin-agda sang lokal nga mga kauturan ang ila mga kaingod, kaupod sa trabaho, kag ang iban pa nga mag-attend sa isa ka pamulongpulong publiko nga hiwaton paagi sa videoconference. Si Ellaine, nga nagaobra sa ospital sa ila lugar, nagapangalag-ag nga agdahon ang iya mga kaupod sa trabaho. Nagapensar sia nga negatibo ang panan-aw sang pila ka doktor sa mga Saksi. Bisan pa sini, gin-agda niya paagi sa text ang mga doktor sa ospital. Nagaduhaduha gid si Ellaine nga agdahon ang isa ka mag-asawa nga doktor. Pero ginhunahuna niya ini kag nagpangamuyo, dayon gin-agda niya sila paagi sa text. Ang asawa nagsabat: “Gusto mo nga maentra ako sa inyo relihion?” Nagsabat si Ellaine nga ang bisan sin-o puede maka-attend sa miting, indi lang mga Saksi ni Jehova. Pagkaaga, nakibot gid si Ellaine kay temprano pa nag-connect ang mag-asawa sa miting! Sia nagsiling: “Antes matapos ang miting, gin-teksan ako sang asawa: ‘Amo ini ang una nga bes nga nag-attend ako sa miting sang mga Saksi ni Jehova. Nanamian gid ako kag nalipay. Salamat sa pag-agda sa amon.’”

 Gin-agda ni Ellaine ang 20 ka doktor sa miting kag nalipay gid sia nga 16 ang nag-attend. Pareho kay apostol Pablo, si Ellaine nakasiling man: “Nalipay ako nga ‘nagtipon ako sang kaisog’ agod masugid ‘ang maayong balita sang Dios’ sa akon mga kaupod sa trabaho.”—1 Tesalonica 2:2.

 Mabudlay gid ang pandemic para sa aton tanan. Pero ang aton mga kauturan sa sini nga pungsod kag sa bisan diin nga lugar padayon nga nangin malipayon kag positibo paagi sa paghimo sang ila masarangan para lugpayan kag buligan ang iban.—Binuhatan 20:35.