SANG mga 1910, nagsaylo ang akon mga ginikanan sa Canada halin sa Tbilisi, Georgia, kag nag-istar sila sa isa ka gamay nga balay sa uma malapit sa Pelly, Saskatchewan, sa nakatundan nga Canada. Natawo ako sang 1928, kag ako ang kinagot sa anom ka kabataan. Napatay si Tatay anom ka bulan antes ako matawo, kag napatay si Nanay sang lapsag pa ako. Wala magdugay, napatay ang akon magulang nga si Lucy sang 17 anyos sia. Gani si Tiyoy Nick amo ang nag-atipan sa amon nga mag-ulutod.

Isa ka bes, sang gamay pa ako, nakita sang akon pamilya nga ginabutong ko ang ikog sang isa ka kabayo nga lalaki sa uma. Bangod sa kakulba nga basi sipaon ako sang kabayo, ginsinggitan nila ako, pero wala ako sing reaksion. Nagatalikod ako sa ila, kag wala ko mabatian ang ila singgit. Maayo lang kay wala ako maano, pero didto nahibaluan sang akon pamilya nga bungol ako.

Ang isa ka abyan sang amon pamilya nagpanugda nga paeskwelahon ako sa eskwelahan sang mga bungol kag apa, gani gin-enroll ako ni Tiyoy Nick sa eskwelahan sa Saskatoon, Saskatchewan. Ginpaistar ako malayo sa akon pamilya, kag bangod lima lang ako ka tuig sadto, hinadlukan ako. Mabisita ko lang sila kon piesta opisyal kag bakasyon. Sang ulihi, natun-an ko ang sign language kag nalipay ako maghampang upod sa iban nga kabataan.

Sang 1939, ang akon magulang nga si Marion nakapamana kay Bill Danylchuck, kag ginsapupo nila kami sang akon utod nga babayi nga si Frances. Sila ang una sa amon pamilya nga nagtuon sa mga Saksi ni Jehova. Kon bakasyon, ginatinguhaan gid nila nga ipaambit sa akon ang ila natun-an sa Biblia. Indi mahapos ang pagkomunikar sa ila, kay indi sila kahibalo sang sign language. Pero nakita nila nga  interesado gid ako parte kay Jehova. Nahangpan ko nga ang ila ginahimo nabase sa Biblia, gani nagaupod ako sa ila pagbantala. Wala magdugay, gusto ko na magpabawtismo. Sang Septiembre 5, 1941, ginbawtismuhan ako ni Manong Bill sa dram nga salsalon nga ang tubig halin sa bubon. Grabe katugnaw sang tubig!

Pagpauli ko sa amon balay sang bakasyon sang 1946, nagtambong kami sa kombension sa Cleveland, Ohio, U.S.A. Sang una nga adlaw, bulosbulos ang akon mga utod nga babayi sa pagsulat sang mga punto sang programa para masundan ko ini. Pero sang ikaduha nga adlaw, nalipay gid ako sang mahibaluan ko nga may ara gali didto mga apa kag interpreter sang sign language. Nanamian gid ako sang programa, kag nalipay gid ako nga nahangpan ko na sing maayo ang kamatuoran sa Biblia!

Bag-o lang sadto matapos ang Bug-os Kalibutan nga Inaway II kag mabaskog ang nasyonalismo. Pagbalik ko halin sa kombension, determinado ako nga manindugan sa akon pagtuo sa eskwelahan. Gani wala na ako nagasaludo sa bandera, nagapakigbahin sa pungsudnon nga ambahanon, nagaentra sa mga selebrasyon kon piesta opisyal, kag nagatambong sa misa. Wala nalipay sa sini ang mga nagaobra sa eskwelahan, kag ginpahog nila ako kag nagbinutig para magbag-o ang akon pensar. Natalupangdan ini sang akon mga kaeskwela, gani nakapanaksi ako sa ila. Ang akon mga kaeskwela nga sanday Larry Androsoff, Norman Dittrick, kag Emil Schneider nagbaton sang kamatuoran, kag matutom sila nga nagaalagad kay Jehova asta subong.

Kon nagakadto ako sa iban nga siudad, ginatinguhaan ko gid nga makapanaksi sa mga apa. Halimbawa, sa Montreal, nagkadto ako sa lugar nga ginatipunan sang mga apa. Napanaksihan ko didto ang pamatan-on nga si Eddie Tager nga miembro sang isa ka grupo sang mga apa. Nagpakig-upod sia sa kongregasyon sang sign language sa Laval, Quebec, asta sa iya kamatayon sang nagligad nga tuig. Nakilala ko man ang pamatan-on nga si Juan Ardanez. Pareho sa mga taga-Berea sang una, nag-research sia para masigurado kon bala matuod gid ang ginasiling sang Biblia. (Binu. 17:10, 11) Ginbaton man niya ang kamatuoran kag matutom sia nga nag-alagad bilang gulang sa Ottawa, Ontario, tubtob sa iya kamatayon.

Sang 1950, nagsaylo ako sa Vancouver. Gusto ko gid panaksihan ang mga apa, pero indi ko malipatan ang akon eksperiensia sang napanaksihan ko sa dalan ang isa ka babayi nga indi apa nga si Chris Spicer. Ginbaton niya ang suskripsion sang magasin kag gusto niya nga makilala ko ang iya bana nga si Gary. Gani nagkadto ako sa ila balay, kag malawig ang amon pag-istoryahanay bisan pa ginasulat lang  namon ini. Wala na kami magkitaay sugod sadto. Pero mga pila ka tuig ang nagligad, nakibot ako sang ginbugno nila ako sa kombension sa Toronto, Ontario. Bawtismuhan si Gary sadto nga adlaw. Ining makapalig-on nga eksperiensia nagpahanumdom sa akon nga importante nga padayon nga magbantala bangod wala kita makahibalo kon diin ukon san-o magatubo ang kamatuoran.

Sang ulihi, nagbalik ako sa Saskatoon. Nakilala ko didto ang isa ka iloy kag gusto niya nga tudluan ko sa Biblia ang iya kapid nga bata nga mga apa, nga sanday Jean kag Joan Rothenberger, nga mga estudyante sa gin-eskwelahan ko sang una. Wala magdugay, ginapaambit na sining duha ka dalagita sa ila mga klasmeyt ang ila natun-an. Lima sa ila klase ang nangin Saksi ni Jehova. Ang isa amo si Eunice Colin. Nakilala ko na sadto si Eunice sang katapusan ko nga tuig sa eskwelahan. Ginhatagan niya ako sadto sing dulse kag ginpamangkot niya ako kon puede kami mangin abyan. Nangin importante sia nga bahin sang akon kabuhi sang ulihi. Nangin asawa ko sia!

Sang nahibaluan sang iloy ni Eunice nga nagatuon sia sang Biblia, ginpangabay niya ang prinsipal nga kumbinsihon si Eunice nga untatan ang pagtuon. Bisan pa ginkuha sang prinsipal ang iya mga ginagamit sa pagtuon, matutom gihapon si Eunice kay Jehova. Sang gusto na niya magpabawtismo, ginsilingan sia sang iya mga ginikanan, “Kon gusto mo mangin Saksi ni Jehova, maglayas ka diri!” Sang 17 anyos si Eunice, naghalin sia sa ila balay, kag ginsapupo sia sang isa ka pamilya nga Saksi. Nagpadayon sia sa pagtuon kag nabawtismuhan. Sang ginkasal kami sang 1960, wala nagtambong ang iya mga ginikanan. Pero pagligad sang mga tinuig, amat-amat nga ginrespeto nila ang amon mga ginapatihan kag nagdayaw sila kon paano namon ginpadaku ang amon kabataan.

Apa kami nga mag-asawa, pero indi apa ang amon pito ka anak nga lalaki. Mabudlay ini, pero ginsigurado namon nga makahibalo sila sang sign language para makakomunikar kami sing maayo sa ila kag matudluan sila sang kamatuoran. Daku gid ang nabulig sang mga kauturan sa kongregasyon. Halimbawa, may ginsulat ang isa ka ginikanan nga nagasugid sa amon nga ang isa namon ka bata nagpamuyayaw sa Kingdom Hall. Naatipan ini namon dayon. Ang amon apat ka anak nga sanday James, Jerry, Nicholas, kag Steven, matutom nga nagaalagad kay Jehova upod ang ila asawa kag pamilya. Gulang sila nga apat. Si Nicholas kag ang iya asawa, nga si Deborah, nagabulig sa pag-translate sang sign language sa sanga sa Britanya. Si Steven naman kag ang iya asawa, nga si Shannan, mga miembro sang sign-language translation team sa sanga sa Estados Unidos.

Isa ka bulan antes sang amon ika-40 nga anibersaryo sa kasal, napatay si Eunice bangod sa kanser. Ang iya pagtuo sa pagkabanhaw nakabulig sa iya nga mangin mabakod sa mabudlay nga kahimtangan. Ginapaabot ko gid ang tion nga makita sia liwat.

Sang Pebrero 2012, natumba ako kag nagliw-as ang akon tul-an lapit sa balikawang, gani kinahanglan ko ang bulig. Gani nagsaylo ako sa akon anak kag sa iya asawa. Nagapakig-upod kami subong sa Calgary Sign-Language Congregation, kag gulang ako gihapon. Ang matuod, amo ini ang una nga tion nga nagpakig-upod ako sa sign language nga kongregasyon. Daw katingalahan no? Paano ko napabakod ang akon espirituwalidad samtang nagapakig-upod ako sa Ingles nga kongregasyon sugod sang 1946? Gintuman gid ni Jehova ang iya promisa nga atipanon niya ang kabataan nga wala sing amay. (Sal. 10:14) Nagapasalamat gid ako sa panikasog sang mga nagakomunikar sa akon paagi sa pagsulat, sang mga nagtuon sing sign language, kag sang mga nag-interpret para sa akon.

Sa tuod lang, may mga tion nga naluyahan ako sing buot kag gusto ko na mangampo bangod indi ko mahangpan kon ano ang ginahambalan, kag kon daw pamatyag ko ginapabay-an ang mga apa. Pero sa sini nga mga tion, ginahunahuna ko ang ginsiling ni Pedro kay Jesus: “Ginuo, kay sin-o kami makadto? Ikaw ang may pinamulong sang kabuhi nga wala sing katapusan.” (Juan 6:66-68) Pareho sa madamo nga apa nga kauturan nga madugay na sa kamatuoran, natun-an ko nga maghulat kay Jehova kag sa iya organisasyon, kag nakabenepisyo gid ako! Subong, madamo gid ang espirituwal nga pagkaon sa akon lenguahe, kag malipayon gid ako sa mga miting kag kombension sa ASL. Malipayon gid ako sa pag-alagad kay Jehova, ang aton gamhanan nga Dios.