ANG tagbalay ukon balaynon nga damang sa Amerika (Parasteatoda tepidariorum) nagapagua sang lawa nga mapilit kon sa dingding pero indi tanto kapilit kon sa duta, amo nga madakop sini ang iya kalan-on nga nagakamang. Paano makahimo ang damang sini nga sahi sang lawa?

Binagbinaga: Ginapapilit sang damang ang iya lawa sa dingding, kisame, ukon sa iban pa nga duog paagi sa paghimo sang tuman kapilit nga tumpok sang lawa nga ginatawag scaffolding disc, nga indi mahukas bisan bungguan sang nagalupad niya nga kalan-on. Pero nadiskobrehan sang mga researcher sa University of Akron, sa Ohio, U.S.A., nga ang lawa nga yara sa duta nga ginatawag gumfoot disc, tuhay gid sing desinyo ukon pagkahuman. Bangod pila lang ka lawa ang nagatapik sa duta sa gumfoot disc kon ikumparar sa scaffolding disc, mahapos ini mahukas kon maagyan sang iya kalan-on.

Suno sa isa ka report halin sa University of Akron, ang mga researcher nga nakadiskobre sining makatilingala nga lawa “nagadesinyo sang inugpapilit nga gin-ilog sa desinyo nga makita sa lawa sang tagbalay.” Nagalaum ang mga sientipiko nga makahimo sila sang inugpapilit nga puede magamit subong ordinaryo nga bendahe kag sa pagkay-o sang nabali nga tul-an.

Ano sa banta mo? Ang ikasarang bala sang tagbalay nga makahimo sang lawa nga lainlain ang kapilit resulta sang ebolusyon? Ukon gindesinyo ini?