1. Diin naton mabal-an ang parte sa palaabuton?

NAKATAN-AW ka na bala sang mga balita sa telebisyon kag dayon nagpamangkot ka, ‘Ano na lang ang matabo sa kalibutan?’ Hinali nga nagakatabo ang mga trahedya kag wala ini ginapaabot, amo nga wala sing makabalo kon ano ang matabo buas. (Santiago 4:14) Pero nabal-an ni Jehova ang matabo sa palaabuton. (Isaias 46:10) Madugay na nga gintagna sang iya Pulong, ang Biblia, indi lamang ang malain nga mga butang nga nagakatabo subong kundi ang makalilipay man nga mga butang nga malapit na lang matabo.

2, 3. Ano ang ginpamangkot kay Jesus sang iya mga disipulo, kag ano ang iya sabat?

² Naghambal si Jesucristo parte sa Ginharian sang Dios, nga magadula sing kalautan kag magahimo sa duta nga isa ka paraiso. (Lucas 4:43) Gusto mabal-an sang mga tawo kon san-o magakari ukon magaabot ang Ginharian. Namangkot pa gani kay Jesus ang iya mga disipulo: “Ano bala ang tanda sang imo presensia kag sang hingapusan sang  sistema sang mga butang?” (Mateo 24:3) Bilang sabat, ginsilingan sila ni Jesus nga si Jehova nga Dios lamang ang nakabalo kon san-o gid maabot ang katapusan sining sistema sang mga butang. (Mateo 24:36) Pero gintagna ni Jesus ang mga butang nga matabo sa duta antes paluntaron sang Ginharian ang matuod nga paghidait kag seguridad sa mga tawo. Ang iya gintagna nagakatabo na subong!

³ Antes naton usisaon ang mga ebidensia nga nagakabuhi na kita sa “hingapusan sang sistema sang mga butang,” binagbinagon anay naton sing makadali ang isa ka inaway nga wala gid sing tawo nga nakakita. Natabo ini sa indi makita nga lugar sang mga espiritu, kag ang resulta sini nakaapektar sa aton.

4, 5. (a) Ano ang natabo sa langit sang nangin Hari na si Jesus? (b) Suno sa Bugna 12:12, ano ang resulta sang inaway sa langit?

⁴ Sa nagligad nga kapitulo sini nga libro, ginpaathag nga si Jesucristo nangin Hari sa langit sang tuig 1914. (Basaha ang Daniel 7:13, 14.) Sa tapos mabaton ni Jesus ang gahom sa Ginharian, naghulag sia. “Nagdabdab ang inaway sa langit,” siling sang Biblia. “Si Miguel [nga isa pa ka ngalan ni Jesus] kag ang iya mga anghel nagpakig-away sa dragon [si Satanas nga Yawa] kag ang dragon kag ang mga anghel sini nagpakig-away sa ila.” * Si Satanas kag ang iya malaut nga mga anghel, ukon mga demonyo, napierde sa sina nga inaway. Gintabog sila sa langit kag gintagbong sa duta. Ang matutom nga mga anghel sang Dios nagkalipay kay gintagbong na si Satanas kag ang iya mga demonyo. Pero, indi maeksperiensiahan sang mga tawo ini nga kalipay. Ang Biblia nagtagna: “Makaluluoy ang duta . . . bangod ang Yawa nagpanaug sa inyo, nga may  daku nga kaakig, kay nahibaluan niya nga malip-ot na lamang ang iya tion.”—Bugna 12:7, 9, 12.

⁵ Palihug hunahunaa ang mangin resulta sang inaway sa langit. Bangod sa kaakig ni Satanas, nangin makaluluoy ang mga yara sa duta. Matun-an mo nga nagakabuhi na kita sa sining makaluluoy nga kahimtangan. Pero indi ini magdugay—‘malip-ot lamang’ ini nga tion. Bisan si Satanas nakabalo sini. Ini nga tion gintawag sang Biblia nga “katapusan nga mga adlaw.” (2 Timoteo 3:1) Malipay gid kita kay sa indi madugay dulaon na sang Dios ang impluwensia sang Yawa sa duta! Usisaon naton ang mga butang nga gintagna sa Biblia nga nagakatabo subong. Ebidensia ini nga nagakabuhi kita sa katapusan nga mga adlaw kag sa indi madugay ihatag sang Ginharian sang Dios ang wala katapusan nga mga pagpakamaayo sa mga nagahigugma kay Jehova. Una, usisaon naton ang apat ka bahin sang tanda nga suno kay Jesus matabo sa aton panahon.

6, 7. Paano nagakatuman subong ang ginsiling ni Jesus parte sa mga inaway kag kakulang sa pagkaon?

⁶ “Magailinaway ang mga pungsod kag subong man ang mga ginharian.”  (Mateo 24:7) Minilyon ka tawo ang napatay sa mga inaway sang nagligad nga isa ka gatos ka tuig. Ang isa ka British nga manunulat sang kasaysayan nagsulat: “Ang ika-20 nga siglo ang pinakamadugo sa rekord sang kasaysayan. . . . Isa ini ka siglo nga halos wala sing untat ang mga inaway, kay ilisipon lang kag malip-ot ang mga tion nga wala sing nagakatabo nga organisado nga inaway.” Ang isa ka report sang Worldwatch Institute nagasiling: “Tatlo ka pilo nga mas madamo nga tawo ang nabiktima sa inaway sang [ika-20] nga siglo sangsa tanan nga inaway halin sang nahauna nga siglo AD asta sang 1899.” Sobra 100 milyones ka tawo na ang napatay sa mga inaway halin sang 1914. Bisan pa mahimo nga bal-an naton kon daw ano kasakit mapatyan sang isa ka pinalangga bangod sa inaway, indi gid naton maimadyin ang pag-antos kag kasakit sang minilyon ka tawo nga napatyan sang ila pinalangga.

⁷ “May kakulang sa pagkaon.” (Mateo 24:7) Ang mga researcher nagsiling nga nagdugang gid ang ginapatubas nga pagkaon sang nagligad nga 30 ka tuig. Pero kulang gihapon ang pagkaon bangod madamo ang wala sing inugbakal ukon wala sing duta nga matamnan. Sa nagauswag pa lang nga mga pungsod, sobra isa ka bilyon ka  tawo ang nagamantenir lamang sa kita nga isa ka dolyar kada adlaw ukon manubo pa sa sini. Ang kalabanan sa ila pirme nagakagutman. Suno sa World Health Organization, malnutrisyon ang panguna nga rason sang kamatayon sang sobra lima ka milyon ka kabataan kada tuig.

8, 9. Ano ang nagapakita nga nagmatuod ang tagna ni Jesus parte sa mga linog kag mga balatian?

⁸ “May mabaskog nga mga linog.” (Lucas 21:11) Suno sa U.S. Geological Survey, mga 19 ka mabaskog nga linog ang ginapaabot kada tuig. Grabe gid ang kabaskugon sini amo nga maguba sini ang mga bilding kag mapalitik ang duta. Kag sa aberids, may mga linog kada tuig nga ang kabaskugon puede makarumpag sang mga bilding. Suno sa mga rekord, sobra duha ka milyon ang napatay sa linog halin sang 1900. Ang isa ka rekord nagasiling: “Gamay lang ang nabulig sang pag-uswag sang teknolohiya para mabuhinan ang kadamuon sang nagkalamatay.”

⁹ “May . . . mga balatian.” (Lucas 21:11) Bisan pa sang pag-uswag sang medisina, ang daan kag bag-o nga mga balatian nagahalit sa mga tawo. Ang isa ka report nagasiling nga 20 ka kilala nga balatian—pati ang TB, malaria, kag kolera—ang mas nag-uso pa  gid sang nagligad nga mga dekada, kag may pila ka balatian nga mas mabudlay na gid bulngon. Ang matuod, mga 30 ka bag-o nga balatian ang nagtuhaw. Ang iban sini wala pa sing bulong kag makamamatay.

10. Ano nga mga batasan nga gintagna sa 2 Timoteo 3:1-5 ang nakita mo sa mga tawo subong?

¹⁰ Luwas sa pila ka dalagku nga hitabo sa kalibutan, gintagna man sang Biblia nga mangin tanda sang katapusan nga mga adlaw ang pagbag-o sa katilingban sang tawo. Ginsugid ni apostol Pablo kon ano ang mangin batasan sang kalabanan nga tawo. Aton mabasa: “Sa katapusan nga mga adlaw magaabot ang makahalanguyos nga mga tion nga mabudlay atubangon.” (Basaha ang 2 Timoteo 3:1-5.) Si Pablo nagsiling nga ang mga tawo mangin

• mahigugmaon sa kaugalingon

• mahigugmaon sa kuarta

• indi matinumanon sa mga ginikanan

• indi mainunungon

• indi mapinalanggaon

• wala sing pagpugong sa kaugalingon

•   mabangis

• mahigugmaon sa kinasadya sa baylo nga mahigugmaon sa Dios

• daw diosnon kon tulukon apang wala sing impluwensia ang gahom sini sa ila kabuhi

11. Suno sa Salmo 92:7, ano ang matabo sa mga malauton?

¹¹ Amo na bala sini ang mga tawo sa inyo lugar? Sigurado nga amo gid. Bisan diin, may mga tawo nga malain sing batasan. Ginapakita sini nga magahulag na ang Dios sa indi madugay, kay ang Biblia nagasiling: “Kon ang malauton magtubo kaangay sang mga gamhon kag ang tanan nga makasasala maglambo, ini agod pagalaglagon sila sing dayon.”—Salmo 92:7.

12, 13. Sa sining “tion sang katapusan,” paano nangin bugana ang “matuod nga ihibalo”?

¹² Puno gid sing kagamo ang katapusan nga mga adlaw, subong sang gintagna sang Biblia. Pero sa sining magamo nga kalibutan, may maayo nga mga butang nga nagakatabo sa mga sumilimba ni Jehova.

¹³ “Ang matuod nga ihibalo magabugana,” siling sang tagna sang libro sang Daniel sa Biblia. San-o ini matabo? Sa “tion sang katapusan.” (Daniel 12:4) Ginbuligan ni Jehova nga mag-uswag ang paghangop sa Biblia sang mga nagahandum gid sa pag-alagad sa iya, ilabi na sugod sang 1914. Nangin mas maathag sa ila ang bilidhon nga mga kamatuoran parte sa ngalan kag katuyuan sang Dios, halad-gawad ni Jesucristo, kahimtangan sang mga patay, kag pagkabanhaw. Natun-an man sang mga sumilimba ni Jehova kon ano ang pagkabuhi nga makapaayo sa ila kag makadayaw sa Dios. Nangin maathag man sa ila kon ano ang himuon sang Ginharian sang Dios kag kon paano  sini kay-uhon ang sitwasyon sang duta. Ano ang ginhimo nila sa sini nga ihibalo? Ini nga pamangkot magadala sa aton sa isa pa ka tagna nga nagakatuman sa sining katapusan nga mga adlaw.

14. Daw ano ka lapnag ang pagbantala sang maayong balita sang Ginharian subong, kag sin-o ang nagabantala sini?

¹⁴ “Ining maayong balita sang Ginharian ibantala sa bug-os nga duta,” siling ni Jesucristo sa iya tagna parte sa “hingapusan sang sistema sang mga butang.” (Basaha ang Mateo 24:3, 14.) Sa bilog nga duta, ang maayong balita sang Ginharian—kon ano ang Ginharian, kon ano ang himuon sini, kag kon paano naton matigayon ang mga pagpakamaayo sini—ginabantala sa sobra 230 ka kadutaan kag sa ginatos ka lenguahe. Minilyon ka Saksi ni Jehova ang mapisan gid sa pagbantala sang maayong balita sang Ginharian. Halin sila “sa tanan nga pungsod kag tribo kag katawhan kag hambal.” (Bugna 7:9) Nagahiwat ang mga Saksi sing wala bayad nga pagtuon sa Biblia sa mga puluy-an sang minilyon ka tawo nga gusto makabalo kon ano gid ang ginatudlo sang Biblia. Dalayawon gid ini nga katumanan sang tagna, labi na bangod gintagna ni Jesus nga ang matuod nga mga Cristiano “dumtan . . . sang tanan nga tawo”!—Lucas 21:17.

15. (a) Nagapati ka bala nga nagakabuhi kita sa katapusan nga mga adlaw, kag ngaa? (b) Ano ang kahulugan sang “katapusan” para sa mga nagapamatok kay Jehova kag sa mga nagapasakop sa paggahom sang Ginharian sang Dios?

¹⁵ Madamo gid nga tagna sang Biblia ang nagakatuman subong, gani indi bala nga nagaugyon ka nga nagakabuhi kita sa katapusan nga mga adlaw? Kon mabantala na ang maayong balita sa kasangkaron nga gusto ni Jehova, “ang katapusan” sigurado nga magaabot. (Mateo 24:14) “Ang katapusan” nagakahulugan sang tion nga dulaon na  sang Dios ang kalautan sa duta. Gamiton ni Jehova si Jesus kag ang gamhanan nga mga anghel para laglagon ang tanan nga hungod nga nagapamatok sa Iya. (2 Tesalonica 1:6-9) Indi na mapatalang ni Satanas kag sang iya mga demonyo ang mga pungsod. Pagkatapos sini, ang Ginharian sang Dios magapaulan sing mga pagpakamaayo sa tanan nga nagapasakop sa matarong nga paggahom sini.—Bugna 20:1-3; 21:3-5.

16. Ano ang maalamon mo nga himuon?

¹⁶ Bangod malapit na malaglag ang sistema ni Satanas, dapat naton pamangkuton ang aton kaugalingon, ‘Ano ang dapat ko himuon?’ Maalamon nga sigehon mo ang pagtuon parte kay Jehova kag sa iya mga ginapatuman sa aton. (Juan 17:3) Tun-i sing maayo ang Biblia. Ugalia ang regular nga pagpakig-upod sa iban nga nagatinguha sa paghimo sang kabubut-on ni Jehova. (Basaha ang Hebreo 10:24, 25.) Kilalaha si Jehova nga Dios paagi sa pagtuon sa iya Pulong, kag himua ang kinahanglanon nga mga pagbag-o sa imo kabuhi para malipay sa imo ang Dios.—Santiago 4:8.

17. Ngaa makibot ang kalabanan nga tawo sa kalaglagan sang mga malauton?

¹⁷ Gintagna ni Jesus nga indi pagsapakon sang kalabanan nga tawo ang ebidensia nga nagakabuhi kita sa katapusan nga mga adlaw. Ang kalaglagan sang mga malauton magaabot sing hinali kag wala ginapaabot. Pareho sang kawatan sa kagab-ihon, kibuton sini ang kalabanan nga tawo. (Basaha ang 1 Tesalonica 5:2.) Si Jesus nagpaandam: “Ang presensia sang Anak sang tawo kaangay sang adlaw ni Noe. Kay kaangay sang panahon sang wala pa ang Baha, ang mga tawo nagakaon kag nagainom, nagapangasawa kag nagapamana, tubtob sa adlaw nga nagsulod si Noe sa arka, kag wala gid sila magtalupangod tubtob nga nag-abot ang Baha kag nag-anod sa ila tanan,  kaangay man sini ang matabo sa presensia sang Anak sang tawo.”—Mateo 24:37-39.

18. Ano nga paandam ni Jesus ang dapat naton seriosohon?

¹⁸ Gani, ginsilingan ni Jesus ang mga nagapamati sa iya: “Mag-andam kamo nga ang inyo tagipusuon indi gid mabug-atan sang sobra nga pagkaon kag sobra nga pag-inom kag mga kabalaka sa kabuhi, kag ina nga adlaw magaabot sa inyo sing hinali subong sang siod. Kay magaabot ini sa tanan nga nagaistar sa bug-os nga duta. Gani, magpadayon kamo nga nagamata kag nagaampo sa tanan nga tion agod magmadinalag-on kamo sa pagpalagyo sa sining tanan nga butang nga mahanabo kag sa pagtindog [nga nahamut-an] sa atubangan sang Anak sang tawo.” (Lucas 21:34-36) Maalamon nga seriosohon ang ginsiling ni Jesus. Ngaa? Bangod ang mga nahamut-an ni Jehova nga Dios kag sang “Anak sang tawo,” nga si Jesucristo, may paglaum nga maluwas sa kalaglagan sang sistema sang mga butang ni Satanas kag magkabuhi asta san-o sa matahom nga bag-o nga kalibutan nga malapit na gid!—Juan 3:16; 2 Pedro 3:13.