ABRIL 23, 2024
RUSSIA

Nagapasalamat nga Nagaalagad kay Jehova

I-PLAY

Sa indi madugay, ipahibalo sang Pervomayskiy District Court of Izhevsk sa Udmurtian Republic ang desisyon sini sa kaso nanday Brother Yevgeniy Stefanidin kag Brother Aleksandr Votyakov. Wala pa sing ginsiling ang piskal kon ano nga sentensia ang gusto niya sa sini nga kaso.

Impormasyon Parte sa Ila

Yevgeniy Stefanidin

Natawo: 1989 (Izhevsk)

Biograpiya: Nagaobra sia sa commercial real estate

Nagdaku si Yevgeniy nga isa ka Saksi ni Jehova. Sang pulo ka tuig ang iya edad, napatay ang iya lola. Mas nagsuod pa gid sia kay Jehova bangod sa paglaum sang pagkabanhaw. Nabawtismuhan sia sang 2006

Napangasawa niya si Marina sang 2011. May isa sila ka bata nga babayi

Na-diagnose si Yevgeniy nga may cancer sang 2022

Ang Iya Ginsiling

Ano ang nakabulig sa imo nga magpabilin nga positibo bisan pa ginahingabot ka?

Kon ginapamensar ko ang madamo nga maayo nga butang nga naeksperiensiahan ko kada adlaw, mas malipayon ako. Ginadumdom ko man nga bisan pa ginatugutan ni Jehova nga hingabuton ako, indi sia ang ginhalinan sini. Malapit niya na lang dulaon ang tanan nga inhustisya nga ginahimo sa iya matutom nga mga alagad. Importante man nga mangin mainunungon kay Jehova kag sa akon mga kauturan. May sister nga nagsiling sa akon sadto: “Kanami gid sang imo yuhum. Kon makita ko nga positibo ka bisan pa sang imo sitwasyon, nagapabakod ini sa akon kag wala na ako nahadlok.” Nagapasalamat gid ako nga bahin ako sang pamilya ni Jehova.

Aleksandr Votyakov

Natawo: 1973 (Izhevsk)

Biograpiya: Nagaobra sia sa konstruksion

Napangasawa niya si Liliya sang 1995

Nanamian sia sa positibo nga pagbag-o sang iya asawa sang nangin isa ini ka Saksi ni Jehova. Nabawtismuhan si Aleksandr sang 2006

Ang Iya Ginsiling

Ano ang importante nga leksion nga natun-an mo sa sini nga eksperiensia?

Natun-an ko nga importante nga magsalig kay Jehova kag indi gid magduhaduha nga buligan niya ako. Halos anom ka bulan ako nga gin-house arrest kag wala gid ako sang trabaho. Sa sina man nga tion, may malala nga masakit ang akon asawa. Pero nakita gid namon kon paano kami ginbuligan ni Jehova. Gin-atipan kami sang amon mga kauturan. Nagdayaw gid ang amon indi Saksi nga mga paryente kon paano kami naatipan sing maayo. Bangod naeksperiensiahan ko gid ang bulig ni Jehova, mas nagapasalamat ako nga ginaalagad ko sia.

Pareho kay Aleksandr kag Yevgeniy, ginakabig man naton nga isa ka daku nga pribilehiyo nga ‘maghimo sing sagrado nga pag-alagad nga wala sing kahadlok’ para kay Jehova sa bilog naton nga kabuhi.—Lucas 1:74, 75.

Time Line

Abril 14, 2021

Gin-raid sang mga pulis ang balay ni Yevgeniy
Disiembre 13, 2022

Ginsugdan ang kaso kanday Aleksandr kag Yevgeniy
Disiembre 14, 2022

Gin-raid sang mga pulis ang ila mga balay. Gindala si Aleksandr sa isa ka temporary detention facility. Ginbutangan sang restriksion ang pagbiyahe ni Yevgeniy
Disiembre 15, 2022

Ginpagua si Aleksandr sa temporary detention pero gin-house arrest sia
Hunyo 9, 2023

Wala na gin-house arrest si Aleksandr pero ginbutangan sang restriksion ang iya pagbiyahe
Agosto 17, 2023

Ginsugdan ang hearing

Basi Manamian Ka Man

NEWS RELEASE

Ara sa Prisuhan Bangod sa Ila Pagtuo—Russia

Ang mga Saksi ni Jehova sa Russia ginapriso bangod sa ila pagtuo. Hibalua ang ila kasaysayan, kag puede ka man maka-print sang listahan sang tanan nga napriso nga Saksi.

NEWS RELEASE