Sang Abril 6, 2024, gindedikar ang bag-o nga mga pasilidad sang branch sa Buenos Aires, Argentina. Si Brother Jeffrey Winder, isa ka miembro sang Nagadumala nga Hubon, ang nagpamulongpulong para sa dedikasyon. Halos 500 ka kauturan ang nag-attend sa programa para sa dedikasyon sa tatlo ka auditorium sa bag-o nga mga bilding sa Bethel. May 5,844 man nga nag-tie in sa programa paagi sa videoconference halin sa isa ka Assembly Hall sa malapit nga siudad sang Ezeiza. Pagkasunod nga adlaw, may ginhiwat nga espesyal nga miting sa Assembly Hall nga gin-transmit sa tanan nga kongregasyon sa Argentina kag Uruguay, kag may kabilugan nga 181,643 nga nag-attend.

May ginhimo nga kahimusan para ma-tour sang mga bisita ang bag-o nga mga pasilidad sang branch, ma-enjoy ang pagpakig-upod sa iban, kag makapartisipar sa iban pa nga espesyal nga activity. Lakip sa ila ang sobra 230 ka kauturan halin sa 25 ka pungsod. Si Brother Sergio Spaccasassi, nga nagaalagad na subong sa Ecuador, nakabulig sa konstruksion sang bag-o nga branch sa Argentina. Amo ini ang iya ginsiling parte sa daku nga internasyonal nga grupo nga nag-attend sa dedikasyon: “Ginagamit ni Jehova ang espesyal nga mga okasyon pareho sini para mangin suod pa gid kita bilang isa ka pamilya nga nagasimba sa iya.”

Si Brother Juan Carlos Nigro, isa ka miembro sang Branch Committee sa Argentina, nagsiling: “Nakita namon kon paano gingiyahan kag ginpakamaayo ni Jehova ini nga proyekto halin sang ginsugdan ini. Sia ang naghatag sining matahom nga pasilidad nga nagapadungog sa iya ngalan.”

Nagapasalamat kita kay Jehova sa sining bag-o nga pasilidad sa Bethel upod sa aton mga kauturan sa Argentina kay “ginhimo niya nga matahom ang tanan nga butang sa tagsa ka tion sini.”—Manugwali 3:11.