yeeshu isliye mara taaki insanon ko paapon ki maafi mile aur woh hamesha tak jeeyen. (romiyon 6:23; ifisiyon 1:7) yeeshu ki maut se yah saabit hua ki insan mushkil-se-mushkil haalaat mein bhi parmeshvar ka vafadar reh sakta hai.—ibraniyon 4:15.

gaur keejiye ki ek  vyakti ke jaan dene se ye sab kaise mumkin hua.

1. yeeshu hamare “paapon ki maafi” ke liye mara.—kulussiyon 1:14.

   jab pehle insan aadam ko banaya gaya tha to woh paripoorna tha yaani usmein koi paap nahin tha. lekin usne jaan-boojhkar parmeshvar ki aagya todi aur paap kiya. uski vajah se uske sabhi bachche bhi paapi ho gaye. bible mein bataya hai, “ek aadmi ke aagya todne se bahot log paapi thehre.”—romiyon 5:19.

   yeeshu bhi paripoorna tha magar usne kabhi paap nahin kiya. isliye woh ‘hamare paapon ke liye prayashchit ka balidan’ de sakta tha. (1 yuhanna 2:2; footnote) jaise aadam ke aagya na maanne se sabhi insan paapi ho gaye, vaise hi yeeshu ke balidan se un logon ko paapon se chhutkara milta hai jo us par vishvas karte hain.

   kehne ka matlab hai, aadam ne sab insanon ko paap ki gulami mein bech diya. lekin yeeshu ne khushi-khushi hamari khaatir apni jaan dekar hamein us gulami se chhudaya. isliye “agar koi paap kar baithe, to hamare liye ek madadgar hai jo pita ke paas hai yaani yeeshu maseeh jo nek hai.”—1 yuhanna 2:1.

2. yeeshu ne apni jaan di taaki “jo koi us par vishvas kare, woh naash na kiya jaaye balki hamesha ki zindagi paaye.”—yuhanna 3:16.

   aadam ko hamesha zinda rehne ke liye banaya gaya tha, lekin paap karne ki vajah se use maut ki saza mili. aadam ke zariye “paap duniya mein aaya aur paap se maut aayi aur is tarah maut sab insanon mein fail gayi kyonki sabne paap kiya.”—romiyon 5:12.

   lekin yeeshu ke jaan dene se hamein paapon se chhutkara milta hai. itna hi nahin, jo us par vishvas karte hain woh maut ki saza se bhi chhoot jaate hain. bible in baaton ka nichod is tarah deti hai, “jaise paap ne maut ke saath raja bankar raaj kiya, vaise hi maha-kripa bhi neki ke zariye raja bankar raaj kare jisse hamare prabhu yeeshu maseeh ke zariye hamesha ki zindagi mile.”—romiyon 5:21.

   maana ki aaj insanon ki zindagi bahot chhoti hai. lekin parmeshvar vaada karta hai ki woh nek logon ko hamesha ki zindagi dega aur jo mar chuke hain unhein bhi zinda karega taaki woh bhi yeeshu ki kurbani se milnevali aasheeshon ka faayda paayen.—bhajan 37:29; 1 kurinthiyon 15:22.

3. yeeshu ne ‘is had tak aagya maani ki usne maut bhi seh li’ aur yah saabit kiya ki ek insan mushkil-se-mushkil haalaat mein bhi parmeshvar ka vafadar reh sakta hai.—filippiyon 2:8.

   haalaanki aadam paripoorna tha, uske shareer aur dimag mein koi kami nahin thi, fir bhi usne parmeshvar ki aagya nahin maani. usne ek aisi cheez ka laalach kiya jo uski nahin thi. (utpatti 2:16, 17; 3:6) aage chalkar parmeshvar ke sabse bade dushman shaitan ne daava kiya ki insan parmeshvar ki aagya sirf apne swarth ke liye maanta hai. aur agar uski jaan par ban aaye to woh uski aagya hargiz nahin maanega. (ayyoob 2:4) yeeshu bhi paripoorna tha lekin usne parmeshvar ki aagya maani aur har haal mein uska vafadar raha, tab bhi jab use zillat-bhari aur dardnak maut di gayi. (ibraniyon 7:26) isse ek baat saaf ho gayi: insan mushkil-se-mushkil haalaat mein bhi parmeshvar ka vafadar reh sakta hai.

yeeshu ki maut se jude saval

• insanon ko paap aur maut se chhudane ke liye yeeshu ko ek dardnak maut kyon sehni padi? parmeshvar chahta to maut ko khatm kar sakta tha, to usne aisa kyon nahin kiya?

  parmeshvar ke kaanoon ke hisab se “paap jo mazdoori deta hai woh maut hai.” (romiyon 6:23) aadam ko bhi parmeshvar ne yah baat saaf-saaf batayi thi ki agar aadam uski aagya nahin maanega to saza ke taur par use maut di jaayegi. (utpatti 3:3) parmeshvar “jhooth nahin bol sakta” isliye jab aadam ne paap kiya to use uski saza mili. (titus 1:2) aadam ne apni aanevali santanon ko virasat mein na sirf paap diya balki paap ki mazdoori maut bhi di.

  haalaanki paapi insan maut ki saza ke laayak hain, lekin parmeshvar ne un par “bharpoor maha-kripa”  ki. (ifisiyon 1:7) unhein paap aur maut se chhudane ke liye, parmeshvar ne yeeshu ke paripoorna balidan ka intazam kiya. yah intazam na sirf uske nyay ke staron ke mutabik tha, balki uski daya ka ek bahot bada saboot tha.

• yeeshu kab mara?

  yahoodi log jis din fasah ka tyohar manate hain, us din sooraj ugne ke baad “nauvein ghante” mein yaani dopahar ke kareeb 3 baje, yeeshu ne dam tod diya. (markus 15:33-37, footnote) aaj ke zamane ke calendar ke mutabik woh din tha, shukravar, 1 aprail eesvi san 33.

• yeeshu ki maut kahaan hui?

  yeeshu ki maut jis jagah hui use “khopdi sthan kaha jaata hai. woh jagah ibrani mein gulguta kehlati hai.” (yuhanna 19:17, 18) yeeshu ke zamane mein woh jagah yarooshalem “shehar ke faatak ke baahar” thi. (ibraniyon 13:12) shaayad woh jagah ek pahadi par thi kyonki bible kehti hai ki kuch logon ne yah ghatna ‘door khade’ hokar dekhi thi. (markus 15:40) lekin aaj woh jagah kahaan hai ise pakke taur par nahin bataya jaa sakta.

• kya yeeshu ki maut kroos par hui?

  zyadatar log maante hain ki yeeshu ko kroos par chadhaya gaya tha. magar bible kehti hai, “us yeeshu ko hamare poorvajon ke parmeshvar ne mrityu se fir jilakar khada kar diya hai jise ek ped  par latka kar tum logon ne maar daala tha.” (preriton 5:30, hindi easy-to-read version) yeeshu ko kis par latkaya gaya tha, yah batane ke liye bible ke lekhakon ne jo do yoonani shabd istemal kiye woh the, stauros aur xylon.  kai vidvan batate hain ki in shabdon ka matlab hai, lattha ya lakdi ka seedha khambha.

• yeeshu ki maut ke din ko kab yaad kiya jaana chahiye?

  har saal yahoodi fasah ka tyohar manate the. usi raat yeeshu ne apne shishyon ke saath ek chhota-saa samaroh manaya. fir usne unhein aagya di, “meri yaad mein aisa hi kiya karna.” (1 kurinthiyon 11:24) yah aagya dene ke kuch ghanton baad yeeshu ko maar daala gaya.

  bible ke lekhakon ne yeeshu ki tulna fasah ke tyohar mein bali kiye jaanevale memne se ki. (1 kurinthiyon 5:7) jis tarah fasah ka tyohar israeliyon ko yaad dilata tha ki unhein gulami se chhudaya gaya hai, usi tarah yeeshu ki maut ke din ko yaad karne se maseehiyon ko ehsas hota hai ki unhein paap aur maut se chhudaya gaya hai. yahoodi log chaand par aadharit calendar se tulna karke nisan maheene ke 14vein din fasah ka tyohar manate the. yah saal mein ek hi baar manaya jaata tha. shuroo ke maseehi bhi saal mein ek baar isi din yeeshu ki maut ki yaadgar manate the.

  aaj bhi duniya-bhar mein laakhon log aisa hi karte hain. har saal hamare calendar ke hisab se nisan 14 jis din padta hai, woh us din yeeshu ki maut ko yaad karte hain.