11 march, 2022
ukraine
report #2 | ukraine par aaye sankat ke dauran bhai-behenon ka pyar saaf nazar aaya
mariupol jaisi jagahon mein yuddh zoron par chal raha hai jis vajah se bijli, heater, telephone aur internet theek se kaam nahin kar rahe hain. kai gharon ki khidkiyaan toot-fut chuki hain. khaane ki cheezen aur paani bhi milna mushkil ho raha hai. hamare 2,500 se bhi zyada bhai-behen mariupol mein fanse huye hain. lekin bucha, chernihiv, hostomel, irpin, kyiv aur sumy jaise shehron mein kuch logon ko shehar chhodkar jaane diya gaya. is vajah se hamare kai bhai-behen kisi surakshit jagah par jaa sake.
chhattees saal ka ek pioneer bhai, jo pracheen bhi hai, hostomel mein rehta tha. yuddh ki vajah se use, uski patni aur uske maata-pita ko shehar chhodkar bhaagna pada. woh batata hai ki jab uske shehar mein yuddh shuroo hua, to kya hua:
“helicopteron ki aavaz aa rahi thi. sadkon par jahaan dekho vahaan din-raat sainikon ki gaadiyaan ghoom rahi thi. ek din kuch sainik achanak hamare ghar mein ghus aaye. hum apne ghar ke basement mein chhipe the. ek sainik ne basement ki taraf danadan goliyaan chalayin. woh to achha hua ki hamein kuch nahin hua. goliyaan meri maa ke aapatkaleen bag par jaa lagin. kareeb teen-chaar ghante tak hum apni jagah se bilkul nahin hile, na hi koi aavaz ki. chaaron taraf bahot bambari ho rahi thi aur lagatar goliyaan chal rahi thi. . . . agli subah hum apna ghar chhodkar jaa hi rahe the ki paas mein ladai chhid gayi. sadkon par tank ya ladakoo gaadiyaan ghoom rahi thi. . . . ghar chhodkar jaana khatre se khaali nahin tha, lekin vahaan rukna zyada khatarnak hota.
in ghatnaon ka hamari zindagi par gehra asar hua hai. hamne seekha ki mushkil ghadi mein hum bible ke siddhanton ko kaise maan sakte hain. jaise, kal ki chinta na karna, hamare paas jo hai usi mein khush rehna aur mushkil-se-mushkil haalaat mein yahova par bharosa rakhna.”
hamara parmeshvar yahova achhi tarah jaanta hai ki ukraine ke bhai-behenon par kya beet rahi hai. hamein poora yakeen hai ki woh unhein sambhaalega aur unki madad karega.—2 patras 2:9.
10 march, 2022 tak ukraine se yah khabar mili hai:
hamare bhai-behenon par kya asar hua hai?
2 pracharakon ki maut ho gayi hai
8 pracharak ghaayal huye hain
25,407 pracharakon ko apna ghar chhodkar bhaagna pada aur unhein ukraine mein hi kisi doosri jagah panah leni padi
25 ghar tehas-nehas ho gaye
59 gharon ko bahot nuksan hua
222 gharon ko thoda-bahot nuksan hua
7 raaj-gharon ko nuksan hua
raahat kaam
ukraine mein 27 vipatti raahat-samitiyaan bhai-behenon ki madad kar rahi hain
in samitiyon ne 10,566 pracharakon ko surakshit jagahon mein thehrane ka intazam kiya
9,635 pracharakon ko doosre deshon mein bhaagna pada aur vahaan ke bhai-behen unki madad kar rahe hain