ALỌGỌ NA WHẸNDO LẸ
Lehe A Gán Gọalọna Ovi Towe Nado Wazọ́n Ganji to Wehọmẹ Do
E taidi dọ ovi towe ma nọ ylọ wehọmẹ yìyì dọ nujọnu bo nọ dovọ́na wehọmẹ-zọ́n etọn po nupinplọn po. Etẹwẹ yin kọdetọn lọ? Azọ́nwiwa etọn to wehọmẹ jẹ didepo ji bọ walọ etọn fọ́n bo to yinylan deji. Nawẹ a gán gọalọna ovi towe nado wazọ́n ganji to wehọmẹ gbọn?
Nuhe a dona yọnẹn
Nukunvando e na hẹn ninọmẹ lọ ylan deji. Nukunvinvando ovi towe na zọ́n bọ e ma na vò to wehọmẹ podọ to whégbè! Nado mọ kọgbọ, e gán jẹ lalodo ji, whlá owe tẹnpọn he mẹ e ma wazọ́n te lẹ tọn, doalọ kalti wehọmẹ tọn etọn mẹ do otẹn towe mẹ kavi gọ̀n wehọmẹ. Humo, ninọmẹ lọ nasọ vantan.
Nunina de zizedonukọnna ẹn gán sọ hẹn nuhahun wá. Otọ́ de he nọ yin Andrew dọmọ: “Nado whàn viyọnnu mítọn, mí nọ na ẹn nunina lẹ eyin e wazọ́n ganji, amọ́ enẹ zọ́n bọ nunina lọ wẹ nọ duahunmẹna ẹn. To whenue e ma wazọ́n ganji, e nọ jẹflumẹ na nunina he e ma mọyi lọ wutu, kakati nido yin na azọ́n he e ma wà ganji wutu.”
Whẹ̀dido mẹplọntọ lẹ ma nọ hẹn kọdetọn dagbe wá. Ovi towe gán wá mọdọ e ma nọ biọ vivẹnudo nado wazọ́n ganji. E gán sọ plọn nado nọ dowhẹ mẹdevo lẹ na nuṣiwa etọn lẹ bo nọ donukun dọ yewlẹ wẹ na didẹ nuhahun lọ. Do glido, ovi towe gán gbọ onú titengbe de go, ehe e na tindo nuhudo etọn to whenue e whẹ́n—yèdọ nado nọ yigbe nuṣiwa etọn lẹ tọn.
Nuhe a sọgan wà
Dava numọtolanmẹ towe lẹ. Eyin a gblehomẹ, de nado dọhodo azọ́nwiwa etọn to wehọmẹ ji to whedevonu. Otọ́ de he nọ yin Brett dọmọ: “Yẹn po asi ṣie po ko tindo kọdetọn dagbe taun titengbe to whenue mí fahomẹ bo vẹawu ovi mítọn.”
Nunọwhinnusẹ́n Biblu tọn: “Nọ yawu nado dotoai, whleawu nado dọho bo whleawu nado gblehomẹ.”—Jakọbu 1:19.
Dindona fihe nuhahun lọ wá sọn. Nuhe nọ saba zọ́n bọ ovi lẹ ma nọ wazọ́n ganji to wehọmẹ wẹ kọgbidinamẹ hagbẹ lẹ tọn, wehọmẹ didiọ, obu he tẹnpọn wehọmẹ tọn de nọ hẹnwa, nuhahun whẹndo tọn lẹ, amlọn whèdomẹ, awugbopo nado basi tito kavi ayiha ma zedo fidopo. Ma wà tadona lọ kọ̀n poun dọ adidọnọ wẹ ovi towe blo.
Nunọwhinnusẹ́n Biblu tọn: “Mẹhe nọ do zinzin hia to whẹho de mẹ na nọ tindo kọdetọn dagbe.”—Howhinwhẹn lẹ 16:20.
Wleawuna ninọmẹ dagbe he mẹ ovi towe gán plọnnu te. Basi tito na wehọmẹ-zọ́n etọn lẹ po nupinplọn po. Wleawuna nọtẹn de he mẹ ovi towe gán wà wehọmẹ-zọ́n etọn lẹ te matin ayihafẹsẹnamẹnu (ehe bẹ televiziọn po alokan apòmẹ tọn po hẹn). Má wehọmẹ-zọ́n lọ lẹ do adà kleunkleun lẹ ji na ovi towe nido sọgan ze ayiha do fidopo. Hector, yèdọ otọ́ de he wá sọn Allemagne dọmọ: “Eyin tẹnpọn de to nukọn ja, mí nọ gbadopọnna nuhe ovi mítọn ko plọn lẹ hẹ ẹ vudevude kakati nado nọte jẹ ogàn godo tọn mẹ.”
Nunọwhinnusẹ́n Biblu tọn: “Nulẹpo wẹ ojlẹ dide de tin na.”—Yẹwhehodọtọ 3:1.
Na tuli nupinplọn. Lehe ovi towe mọnukunnujẹ ale he wehọmẹ to hinhẹnwa na ẹn todin mẹ do sọ, mọ wẹ e na yin whinwhàn nado nọ plọnnu do. Di apajlẹ, nupinplọn gando nulinlẹn go gán gọalọna ẹn nado yọ́n lehe e na nọ zan apòmẹkuẹ etọn do.
Nunọwhinnusẹ́n Biblu tọn: “Tindo nuyọnẹn, tindo nukunnumọjẹnumẹ. . . . Nọ yí nukun nujọnu tọn do pọ́n ẹn.”—Howhinwhẹn lẹ 4:5, 8.
Ayinamẹ: Gọalọna ovi towe nado wà wehọmẹ-zọ́n etọn, amọ́ ma wà ẹ do otẹn etọn mẹ blo. Andrew yigbe dọmọ: “Viyọnnu mítọn nọ ganjẹ apọ̀n mítọn go bo ma nọ jlo na yí etọn zan.” Plọn ovi towe nado nọ wà wehọmẹ-zọ́n etọn na ede.