“Owhe ṣidopo wẹ viyọnnu mítọn tindo whenue mí dọho hẹ ẹ do ahàn sinsinyẹn ji whla tintan. E paṣa mí dọ e ko yọ́n nususu gandego hú nuhe mí donukun.”—Alexander.

•  Nuhe a dona yọnẹn

•  Nuhe a sọgan wà

•  Nuhe Biblu dọ gando ahàn sinsinyẹn go

 Nujọnu wẹ nado dọhodo ahàn sinsinyẹn ji hẹ ovi lẹ. Ma dọngbàn kakajẹ whenue ovi towe na biọ aflanmẹ blo. “E vẹna mi dọ mí ma dọhodo ahàn sinsinyẹn nùnù po jlẹkajininọ po ji hẹ ovi mítọn sọn ovu whenu,” wẹ Khamit he wá sọn Russie dọ. “Whenue nulẹ ko vantan pete wẹ n’wá mọnukunnujẹ ehe mẹ. N’wá mọdọ visunnu ṣie ko to ahàn sinsinyẹn nù whẹwhẹ sọn whenue e do owhe 13.”

 Naegbọn e dona duahunmẹna we?

•   Klasigbẹ́ lẹ, ajọ́-jijlá lẹ po Televiziọn po sọgan yinuwado pọndohlan ovi towe tọn gando ahàn sinsinyẹn go ji.

•   Sọgbe hẹ dodinnanu azọ́nwhé he nọ hoavùn sọta azọ̀n to États-Unis tọn, 11 to kanweko ji ahàn sinsinyẹn he nọ yin nùnù to États-Unis lẹpo tọn wẹ nọ yin gbọn yọpọvu he ma ko tindo owhe ahàn nùnù tọn lẹ dali.

 Abajọ, ahọluzọnwatọ he nọ penukundo agbasalilo go lẹ do nọ na ayinamẹ mẹjitọ lẹ nado plọnnu ovi yetọn lẹ sọn ovu whenu gando owù he tin to ahàn sinsinyẹn ṣiṣizan mẹ lẹ go. Nawẹ a gán plọn enẹ yé gbọn?

 Lẹnnupọndo kanbiọ he ovi towe sọgan kanse lẹ ji jẹnukọn. Yọpọvu lẹ nọ dín tlintlindo podọ dile yé to whinwhẹ́n mọ wẹ e sọ nọ sinyẹn dogọ do niyẹn. Enẹwutu, e na yọ́n dọ a ni ko wleawuna nuhe a na gblọn lẹ dote. Di apajlẹ:

•   Eyin ovi towe jlo na yọ́n lehe ahàn sinsinyẹn nọ ṣí, a gán dọ dọ ovẹn nọ wle-dẹ́ di yovozẹn he vẹsin bọ bia-hàn uwọ nọ vẹ́.

•   Eyin ovi towe jlo na dọ́ ahàn sinsinyẹn pọ́n, a gán dọna ẹn dọ ahàn sinsinyẹn ma yọ́n na agbasa yọpọvu tọn. Donù nuyiwadomẹji etọn lẹ go: Ahàn sinsinyẹn sọgan hẹn awuvivi wá namẹ, amọ́ eyin yè nù zẹjlẹgo e sọgan múmẹ, hẹnmẹ nado yinuwa po nulú po kavi nado dọ nuhe na wá vẹnamẹ to godo mẹ lẹ.—Howhinwhẹn lẹ 23:29-35.

 Plọn dewe whẹ́. Biblu dọ dọ: “Zinzintọ nọ yinuwa po oyọnẹn po.” (Howhinwhẹn lẹ 13:16) Yọ́n nuhe ahàn sinsinyẹn nùnù bẹhẹn lẹ gọna osẹ́n po dogbó he otò towe zedai gandego lẹ po. Gbọnmọ dali, a na wleawufo nado gọalọna ovi towe.

 Nọ ze afọdide tintan nado dọhodeji. Otọ́ de he nọ yin Mark bo nọ nọ̀ Grande Bretagne dọ dọ “Whẹho ahàn sinsinyẹn nùnù tọn ma nọ saba họnwun na yọpọvu lẹ. N’kanse visunnu ṣie owhe ṣinatọ̀n-mẹvi, eyin e ylan kavi sọgbe nado nù ahàn sinsinyẹn. N’hẹn ẹn voawu bọ ehe whàn ẹn nado dọ nuhe e lẹn po awubibọ po.”

 A na yinuwado ahun ovi towe tọn ji sisosiso eyin a nọ lẹkọwa whẹho ahàn sinsinyẹn nùnù tọn ji sọn ojlẹ de mẹ jẹ devo mẹ. Sọgbe hẹ owhe he ovi towe tindo, nọ dọhodo ahàn sinsinyẹn ji to pọmẹ hẹ whẹho devo lẹ taidi osẹ́n aliji tọn lẹ hihodo gọna whẹho zanhẹmẹ tọn.

 Ze apajlẹ dagbe dai. Dile sekanfun nọ yawu dọ̀n osin do, mọ wẹ nuhe lẹdo ovi lẹ nọ yawu yinuwado yé ji do—podọ dodinnanu lẹ dohia dọ mẹjitọ lẹ wẹ nọ yinuwado ovi lẹ ji hugan. Ehe dohia dọ eyin ahàn sinsinyẹn wẹ a nọ nù nado mọ dewe mẹ kavi de apọṣimẹ pò, ovi towe na nọ mọdọ ahàn sinsinyẹn nùnù wẹ yin pọngbọ na magbọjẹ gbẹ̀mẹ tọn lẹ. Enẹwutu, nọ ze apajlẹ dagbe dai. Hẹn ẹn diun dọ a nọ nù ahàn sinsinyẹn po lẹnpọn dagbe po.