Biblu ma yí hogbe lọ “hòdide” zan tlọlọ gando aliho depope he yè gán yizan nado de ovi he ṣẹṣẹ to whinwhẹ́n to homẹ de tọ́njẹgbonu go. Etomọṣo, wefọ Biblu tọn susu do nukun he Jiwheyẹwhe nọ yí do pọ́n ogbẹ̀ gbẹtọ tọn hia, etlẹ yin ogbẹ̀ ovi he ma ko yin jiji de tọn.

 Nunina de wẹ ogbẹ̀ yin sọn Jiwheyẹwhe dè. (Jenẹsisi 9:6; Salmu lẹ 36:9) Ogbẹ̀ mẹlẹpo tọn wẹ họakuẹ to nukun etọn mẹ, kakajẹ ovi he gbẹ́ to adọ̀mẹ de tọn ji. Enẹwutu, eyin mẹde yọnẹn fẹẹ bo hù ovi he gbẹ́ to adọ̀mẹ de, mẹlọ hùmẹ wẹ.

 Osẹ́n Jiwheyẹwhe tọn dọna Islaelivi lẹ dọmọ: “Eyin mẹde to ahidi hẹ mẹdevo bọ yé gbleawu yọnnu hohonọ de bọ e jivi azán mapemape, ṣigba bọ awugble lọ ma hẹn okú wá, mẹhe gbleawunamẹ lọ dona suahọ he asu yọnnu lọ tọn gbò na ẹn; podọ ewọ dona sú i gbọn alọ whẹdatọ lẹ tọn mẹ. Ṣigba, eyin awugble lọ hẹn okú wá, whenẹnu hiẹ dona yí ogbẹ̀ na ogbẹ̀.”—Eksọdusi 21:22, 23. a

•  Whetẹnu wẹ ogbẹ̀ gbẹtọvi de tọn nọ bẹjẹeji?

•  Be Jiwheyẹwhe na jona mẹhe ko dehò pọ́n de ya?

•  Be hòdide ylan eyin ogbẹ̀ onọ̀ lọ kavi viyẹyẹ lọ tọn tin to owù mẹ wẹ ya?

 Jiwheyẹwhe nọ mọdọ ogbẹ̀ gbẹtọ de tọn bẹjẹeji, tlolo he yọnnu de mọhò. To Ohó etọn Biblu mẹ, Jiwheyẹwhe nọ saba dọho ovi he ma ko yin jiji de tọn taidi dọ gbẹtọ tlọlọ wẹ. Lẹnnupọndo apajlẹ delẹ ji he dohia dọ Jiwheyẹwhe ma nọ mọ vogbingbọn de to ogbẹ̀ viyẹyẹ he pò to adọ̀mẹ de po ehe ko yin jiji de po tọn ṣẹnṣẹn.

•   To anademẹ gbigbọ wiwe tọn glọ Ahọlu Davidi dọna Jiwheyẹwhe dọmọ: “Nukun towe lẹ tlẹ mọ mi to whenue n’gbẹ́ pò to adọ̀mẹ.” (Salmu lẹ 139:16) Jiwheyẹwhe ko mọ Davidi taidi gbẹtọ gbẹ̀te de whẹpo ewọ tlẹ do yin jiji.

•   Humọ, Jiwheyẹwhe yọnẹn jẹnukọn dọ azọ́ndenamẹ vonọtaun de wẹ emi na zedo alọmẹ na yẹwhegán Jelemia whẹpo Jelemia tlẹ do yin jiji. Jiwheyẹwhe dọna ẹn dọmọ: “Whẹpo yẹn do wleawu towe do adọ̀mẹ wẹ yẹn ko yọ́n we, podọ whẹpo hiẹ do yin jiji wẹ yẹn ko klan we do wiwe. Yẹn sọ hẹn we zun yẹwhegán de na akọta lẹ.”—Jelemia 1:5.

•   Biblu-kantọ Luku, he sọ yin dotozọ́nwatọ de yí hogbe Glẹkigbe tọn dopolọ zan nado dlẹnalọdo ovi he ma ko yin jiji de podọ nado dọho gando ovivu he ko yin jiji de go.—Luku 1:41; 2:12, 16.

 Mẹhe ko dehò pọ́n lẹ sọgan mọ jonamẹ Jiwheyẹwhe tọn yí. Eyin yé ko kẹalọyi pọndohlan Jiwheyẹwhe tọn gando ogbẹ̀ go todin, yé ma dona sọ nọ to owhẹ̀ do yedetiti ba. “Jehovah yin lẹblanunọ podọ awuvẹmẹtọ . . . Dile whèzẹtẹn dẹn do whèyihọ do, mọ wẹ ewọ hẹn sẹ́nhẹngba mítọn lẹ dẹn do mí do.” b (Salmu lẹ 103:8-12) Jehovah na jona mẹhe yí ahundopo do lẹnvọjọ sọn ylando yetọn he wayi lẹ mẹ lẹpo, kakajẹ hòdide ji.—Salmu lẹ 86:5.

 Sọgbe hẹ nuhe Biblu dọ gando ogbẹ̀ ovi he ma ko yin jiji de tọn go, owhẹ̀ mẹde tọn ma na whẹ́n nado dehò, na whẹho agbasalilo tọn he vlavo sọgan ze ogbẹ̀ onọ̀ de kavi ovi de tọn do owù mẹ wutu.

 Etẹwẹ lo eyin to vijiji de whenu, ninọmẹ okú po ogbẹ̀ po tọn de wá aimẹ, dile ehe ma tlẹ nọ yawu jọ, bọ yè dona basi dide to niyaniya mẹ gando mẹhe dona yin whinwhlẹngán go vlavo onọ̀ lọ kavi viyẹyẹ lọ? To ninọmẹ mọnkọ de mẹ, mẹhe go whẹho lọ gando lẹ wẹ na basi nudide mẹdetiti tọn, eyin vlavo onọ̀ lọ kavi viyẹyẹ lọ wẹ na yin whinwhlẹngán.