Lala. Alọnuwe hoho lẹ yiyijlẹdo yede go dohia dọ Biblu ma yin didiọ mahopọnna owhe fọtọ́n susu he yè do bayi vọkan etọn do nuyizan he nọ gble lẹ ji.

 Alọnuwe hoho Biblu tọn fọtọ́n susu lẹ wẹ ko yin mimọ. Delẹ to yé mẹ do vogbingbọn delẹ, he dohia dọ nuṣiwa yin bibayi to vọkan yetọn whenu. Suhugan vogbingbọn ehelẹ tọn ma sinyẹn sọmọ podọ yé ma diọ zẹẹmẹ kandai lọ tọn. Amọ́, vogbingbọn titengbe kleun delẹ yin mimọ, e wá họnwun dọ delẹ to yé mẹ yin nudide he yè basi sọn ojlo mẹ to owhe susu die nado diọ owẹ̀n Biblu tọn. Apajlẹ awe die:

1.   To 1 Johanu 5:7 mẹ, lẹdogbedevomẹ Biblu tọn hoho delẹ bẹ hogbe ehelẹ hẹn: “to olọn mẹ, Otọ́ lọ, Ohó lọ, po Gbigbọ Wiwe lọ po: yé omẹ atọ̀n lẹpo sọ yin dopo.” Amọ́, alọnuwe dejidego lẹ dohia dọ hogbe ehelẹ ma to kandai dowhenu tọn lọ mẹ. Yé wá yin yiyidogọ to nukọn mẹ wẹ. a Enẹwutu, lẹdogbedevomẹ egbezangbe tọn Biblu tọn he go yè gán dejido lẹ de yé sẹ̀.

2.   Yinkọ mẹdetiti tọn Jiwheyẹwhe tọn sọawuhia whla fọtọ́n susu lẹ to alọnuwe hoho Biblu tọn lẹ mẹ. Etomọṣo, lẹdogbedevomẹ Biblu tọn susu lẹ ko yí tẹnmẹ-yinkọ lẹ taidi “Oklunọ” kavi “Jiwheyẹwhe” do diọtẹnna ẹn.

 To ojlẹ mítọn mẹ, alọnuwe susu ko yin mimọ sọmọ bọ e ko bọawu hugan gbede pọ́n nado yawu wle nuṣiwa lẹ. b Etẹwẹ alọnuwe ehelẹ yiyijlẹdo yede go dohia gando gbesisọ-yinyin Biblu tọn go to egbé?

•   To zẹẹmẹ he weyọnẹntọ William H. Green basi do Owe-Wiwe Heblu tọn (he nọ saba yin yiylọdọ “Alẹnu Hoho” lọ) ji lẹ mẹ, e dọmọ: “Mí gán dọ po nujikudo po dọ owe hohowhenu tọn he yè basi vọkan etọn po gbesisọ-yinyin po devo depope ma tin kakajẹ egbehe sọ ehe.”

•   Weyọnẹntọ Biblu tọn F. F. Bruce wlan gando Owe-Wiwe Glẹki tọn, kavi “Alẹnu Yọyọ” lọ go dọ: “Kunnudenu he tin gando owe he to Alẹnu Yọyọ mẹ lẹ go sù taun hugan dehe gando owe wekantọ klogán-klogán paa susu lẹ tọn go, podọ mẹde ma nọ do ayihaawe gando owe omẹ enẹlẹ tọn go.

•   Sir Frederic Kenyon, weyọnẹntọ Biblu tọn de he tindo aṣẹpipa do vọkan alọnuwe Biblu tọn lẹ tọn bibasi ji, dọ dọ mẹde “sọgan ze Biblu blebu do alọmẹ, bo dọ po nujikudo po matin awuwhiwhle dọ Ohó Jiwheyẹwhe tọn, he yè ma diọ nue to e mẹ to owhe kanweko susu lẹ godo sọn whẹndo de ji jẹ devo ji, wẹ e bẹhẹn.”

•   Vọkan-basitọ Juvi lẹ po Klistiani lẹ po ma basi vọjlado na kandai he do nuṣiwa sinsinyẹn he omẹ Jiwheyẹwhe tọn lẹ bayi lẹ hia. c (Sọha lẹ 20:12; 2 Samuẹli 11:2-4; Galatianu lẹ 2:11-14) Mọdopolọ, yé sọ bayi hihọ́na kandai he gblewhẹdo tolivivẹ akọta Juvi lẹ tọn gọna dehe de tamẹnuplọnmẹ gbẹtọ lẹ tọn gbà. (Hosea 4:2; Malaki 2:8, 9; Matiu 23:8, 9; 1 Johanu 5:21) Na yé vọ́ kandai ehelẹ kàn po gbesisọ-yinyin po wutu, vọkan-basitọ lọ lẹ do nugbonọ-yinyin po sisi daho he yé tindo na Ohó wiwe Jiwheyẹwhe tọn po hia.

•   Be e ma sọgbe hẹ lẹnpọn dagbe dọ Jiwheyẹwhe, he gbọdo Biblu nado yin kinkan to tintan whenu nisọ bayi hihọ́na gbesisọ-yinyin etọn ya? d (Isaia 40:8; 1 Pita 1:24, 25) To popolẹpo mẹ, ojlo etọn wẹ yindọ ni hẹn ale wá, e ma yin na mẹhe nọgbẹ̀ to hohowhenu lẹ kẹdẹ gba, ṣigba na mẹhe togbẹ̀ to egbé lẹ ga. (1 Kọlintinu lẹ 10:11) Na nugbo tọn, “nuhe ko yin kinkandai jẹnukọn lẹpo yin kinkandai na oplọn mítọn, na míwlẹ nido sọgan tindo todido gbọn akọndonanu mítọn gblamẹ podọ gbọn homẹmimiọn sọn Owe-wiwe lẹ mẹ gblamẹ.”—Lomunu lẹ 15:4.

•   Jesu po hodotọ etọn lẹ po yihodọ sọn vọkan Owe-Wiwe Heblu tọn lẹ tọn mẹ ṣogan bo ma do ayihaawe gando gbesisọ-yinyin owe hoho enẹlẹ tọn go.—Luku 4:16-21; Owalọ lẹ 17:1-3.