“Na Jiwheyẹwhe he nọ namẹ todido ni yí ayajẹ po jijọho lẹpo po do gọ́ mì mẹ gbọn jidide mìtọn do ewọ go dali, na mì nido sọgan sudeji to todido mẹ gbọn huhlọn gbigbọ wiwe tọn dali.”—Lomunu lẹ 15:13, Lẹdogbedevomẹ Aihọn Yọyọ Tọn.

 “Jiwheyẹwhe otódo tọn ni yí ayajẹ po jijọho lẹpo po do gọ́ mì to yiyise mẹ, na mì nido sù to otódo mẹ, gbọn huhlọn Gbigbọ Wiwe tọn dali.”—Lomunu lẹ 15:13, Biblu Wiwe lọ—Gun Alada.

 Apọsteli Paulu zan hogbe ehelẹ do bayi zẹẹmẹ nue e jlo na yisenọ hatọ etọn lẹ tọn, enẹ wẹ yindọ Jiwheyẹwhe ni na yé “ayajẹ po jijọho” po. Jẹhẹnu dagbe ehelẹ do kanṣiṣa hẹ todido po huhlọn gbigbọ wiwe tọn he Jiwheyẹwhe nọ namẹ po.

 Mí nọ plọnnu gando todido he Jiwheyẹwhe nọ namẹ go to Ohó etọn Biblu mẹ. Dile Lomunu lẹ 15:4 dọ do, “nuhe ko yin kinkandai jẹnukọn lẹpo [to Biblu mẹ] yin kinkandai na oplọn mítọn, na míwlẹ nido sọgan tindo todido gbọn akọndonanu mítọn gblamẹ podọ gbọn homẹmimiọn sọn Owe-wiwe lẹ mẹ gblamẹ.” Biblu dọhodo opà he Jiwheyẹwhe do nado didẹ nuhahun he nọ zọ́n bọ gbẹninọ nọ ṣiapọmẹ lẹ ji, taidi ohẹ́n, mawadodo, azọ̀n po okú po. (Osọhia 21:4) Jiwheyẹwhe na yí Jesu Klisti zan nado hẹn opà ehelẹ di, enẹwutu mí gán donukun sọgodo dagbe de.—Lomunu lẹ 15:12.

 Eyin mí deji do Jiwheyẹwhe go kẹdẹ wẹ mí gán “sudeji” kavi “sù to” todido he e nọ namẹ ehe mẹ. Dile mí to nuplọn gandego sọ, mọ wẹ mí na nọ dejidego dogọ do niyẹn. (Isaia 46:10; Titu 1:2) Mí dopẹ dọ Jiwheyẹwhe na mí todido he go mí gán dejido, todido lọ nọ zọ́n bọ mẹde gán gọ́ na ayajẹ po jijọho po, eyin e tlẹ to pipehẹ ninọmẹ sinsinyẹn lẹ.—Lomunu lẹ 12:12.

 Jijọho, ayajẹ po todido po sọ do kanṣiṣa hẹ “gbigbọ wiwe,” enẹ wẹ huhlọn he Jiwheyẹwhe nọ yizan nado yinuwa. a Jiwheyẹwhe nọ yí gbigbọ wiwe zan do hẹn opà he e do lẹ di, podọ enẹ nọ namẹ todido. Gbigbọ ehe gán sọ gọalọnamẹ nado wleawuna jẹhẹnu dagbe delẹ taidi ayajẹ po jijọho po.—Galatianu lẹ 5:22.

 Wekanhlanmẹ de wẹ owe Lomunu lẹ tọn yin hlan Klistiani he nọ nọ̀ tòdaho Lomu tọn mẹ lẹ. Delẹ to Klistiani lọ lẹ mẹ wá sọn kúnkan Ju lẹ tọn mẹ, bọ mẹhe pò lẹ wá sọn hẹnnu devo mẹ. Paulu na tuli yemẹpo nado nọ nọ̀ kọndopọ mẹ to linlẹn po nuyiwa yetọn lẹ po mẹ mahopọnna dọ hẹnnu po akọ̀ voovo po mẹ wẹ yé wá sọn.—Lomunu lẹ 15:6.

 Paulu flinnu Klistiani he to Lomu lẹ dọ to ojlẹ dindẹn die, Jiwheyẹwhe ko dọ dọdai dọ ojlẹ de na wá bọ gbẹtọ lẹ sọn akọ̀ lẹpo mẹ na nọ sẹ̀n Ẹn to kọndopọ mẹ. Whla ẹnẹ plipli wẹ Paulu yihodọ sọn Owe-wiwe b Heblu tọn lẹ mẹ nado nọgodona nugbo enẹ. (Lomunu lẹ 15:9-12) Nue dọ e te wẹ yindọ: Gbẹtọ lẹ sọn akọ̀ lẹpo mẹ wẹ gán mọaleyi sọn lizọnyizọn Klisti tọn mẹ topọ mẹ hẹ Ju lẹ. Todido dopolọ wẹ Jiwheyẹwhe na Ju po mẹhe ma yin Ju lẹ po. Enẹwutu, mẹhe to agun Lomu tọn mẹ lẹpo wẹ dona “nọ kẹalọyi ode awetọ,” enẹ wẹ yindọ yé dona nọ jọmẹ bosọ nọ hẹjómẹ, mahopọnna fie yé wá sọn.—Lomunu lẹ 15:7.