Eyin a yin dopo to Kunnudetọ Jehovah tọn lẹ mẹ, be a sọgan yí nukun homẹ tọn do mọ dewe bọ ponọ de to pinplan we sọn họndekọn jẹ họndekọn dile a to kunnude ya? Numimọ he Joseph tindo niyẹn to Micronésie to 2017. Ewọ po Kunnudetọ atọ̀n devo lẹ po to mahẹ tindo to nujijla vonọtaun de mẹ nado yì dọyẹwheho to lopo he to olá lẹ ji.

 To nudi ogàn wiawe mẹ, Kunnudetọ ẹnẹ lọ lẹ jẹ lopo pẹvi he ji nudi gbẹtọ 600 nọ nọ̀ de kọ̀n. Ogán lopo lọ tọn dokuavọna Kunnudetọ lọ lẹ to huto lọ. Joseph basi zẹẹmẹ nuhe jọ bọdego tọn dọmọ: “Ogán lọ dọ dọ mọto ponọ lẹ tọn sọgan ze mí gbọn owhé lọ lẹpo gbè. Obiọ etọn jiawu na mí taun, amọ́ mí gbẹ́ nuzedonukọnnamẹ etọn po sisi po. Mí jlo na dla mẹlẹ pọ́n sọgbe hẹ aṣa mítọn nado nọ yì sọn họndekọn jẹ họndekọn.”

 Enẹgodo, wẹnlatọ lọ lẹ bẹ zọnlin dedo, po gbemima lọ po nado dọhona mẹsusu dile e gán yọnbasi do. Kunnudetọ lọ lẹ dọmọ: “Mẹlọ lẹ yí mí ganji bosọ tindo ojlo to owẹ̀n mítọn mẹ. Taidi kọdetọn de, mí yí whenu susu zan to owhé dopodopo gbè hú lehe mí lẹn do.”

 Sẹpọ whèjai, mọto ponọ lẹ tọn de zẹ̀ Joseph go whla awe bo nọte to whenue e jlo na zẹ̀ e go whla atọ̀ntọ. Ponọ lọ lẹ kanse Joseph eyin e jlo dọ yé ni ze e yì owhé he pò bọ e na dlapọn lẹ gbè. Joseph dọmọ: “N’dọ eyeo. Amọ́ to ojlẹ ehe mẹ, yé tẹkudeji bo dọ dọ, ‘Whenu vude wẹ pò na we nado yì, enẹwutu mí na ze we gbọn owhé he pò lẹ gbè.’ N’masọ sọgan gbẹ́ obiọ yetọn ba, na owhé he pò bọ n’na dlapọn lẹ gbẹ́ sù. Eyin mí sẹpọ owhé de gbè, ponọ lọ lẹ nọ dọ yinkọ whẹndo lọ tọn na mi bo nọ dọ eyin n’húhú ohọ̀n bọ mẹde ma tọ́n, emi na kúnván nado ylọ mẹhe to owhé lọ gbè lẹ.

 “Po alọgọ enẹ po, mí penugo nado dla owhé lẹpo pọ́n to gbenẹgbe. Mí do owe susu gbonu bo basi tito nado lẹkọwa pọ́n mẹhe do ojlo hia lẹ.”

 Ponọ lọ lẹ dọna Joseph dọ emi “duvivi wẹndagbe lọ lilá tọn taun.” Whenue Kunnudetọ lọ lẹ jei whégbè to whèjai, ponọ he to huto lọ lẹ hẹn owe sinai do Biblu ji lẹ to alọmẹ bo yí ayajẹ do to alọ mimí dọ e yì whedenu.