Jehovah, yèdọ Jiwheyẹwhe ayajẹnọ lọ he jlo dọ whẹndo lẹ ni tindo ayajẹ dè wẹ wẹndagbe lọ wá sọn. (1 Timoti 1:11) Ewọ wẹ yin dowatọ alọwle tọn. Dandannu wẹ e yin nado wlealọ to ahọluwhé, na ehe nọ basi hihọ́na asu po asi po gọna ovi lẹ. Klistiani lẹ dona setonuna osẹ́n otò tọn lẹ gando kandai alọwle tọn bibasi go.—Hia Luku 2:1, 4, 5.

Nukun tẹwẹ Jiwheyẹwhe nọ yí do pọ́n alọwle? Ojlo etọn wẹ yindọ e ni yin kọndopọ tẹgbẹ tọn de to sunnu po yọnnu po ṣẹnṣẹn. Jehovah jlo dọ asu po asi po ni yin nugbonọ na ode awetọ. (Heblu lẹ 13:4) E gbẹwanna gbẹdai. (Malaki 2:16) Ṣigba, e nagbè Klistiani lẹ nado basi gbẹdai bo vọ́ alọwle eyin alọwlemẹ yetọn deayọ.—Hia Matiu 19:3-6, 9.

Jehovah dá sunnu po yọnnu po nado yí adà tangan de wà to alọwle mẹ nado nọgodona ode awetọ. (Jenẹsisi 2:18) Taidi tatọ́ whẹndo tọn, asu de dona yin nukọntọ nado hẹn pekọ wá na nuhudo hagbẹ whẹndo tọn etọn lẹ tọn to agbasa-liho podọ nado plọnnu yé gando Jiwheyẹwhe go. E dona nọ do owanyi matin ṣejannabi hia asi etọn. Asu po asi po dona yiwanna yede bo nọ do sisi hia ode awetọ. To whenuena e yindọ asu po asi po lẹpo wẹ yin mapenọ, yé na tindo ayajẹ to alọwle mẹ eyin yé plọn nado nọ jona ode awetọ.—Hia Efesunu lẹ 4:31, 32; 5:22-25, 33; 1 Pita 3:7.

Eyin mì to nuhahun tindo to alọwle mìtọn mẹ, dopodopo mìtọn dona dovivẹnu nado nọ yí owanyi do yinuwa hẹ ode awetọ. (1 Kọlintinu lẹ 13:4, 5) Ohó Jiwheyẹwhe tọn dohia dọ kinklan ma nọ didẹ nuhahun he nọ saba sọawuhia to alọwle mẹ lẹ.—Hia 1 Kọlintinu lẹ 7:10-13.

Jehovah jlo dọ mì ni yin ayajẹnọ. E nọ na mì ayinamẹ dagbe hugan lẹ do lehe mì sọgan duvivi jọja whenu mìtọn tọn do ji. Ewọ jlo dọ mì ni mọaleyi sọn nuyọnẹn po numimọ mẹjitọ mìtọn lẹ po tọn mẹ. (Kolosinu lẹ 3:20) Jehovah sọ jlo dọ mì ni duvivi ayajẹ he azọ́nwiwa na Mẹdatọ mìtọn po Visunnu etọn po nọ hẹnwa tọn.—Hia Yẹwhehodọtọ 11:9–12:1; Matiu 19:13-15; 21:15, 16.

Mì dona wazọ́n sinsinyẹn nado wleawu núdùdù, adọtẹn po avọ̀ po tọn na ovi mìtọn lẹ. (1 Timoti 5:8) Ṣigba, eyin ovi mìtọn lẹ na tindo ayajẹ, mì sọ dona plọn yé nado yiwanna Jiwheyẹwhe bo nọ plọnnu sọn ewọ dè. (Efesunu lẹ 6:4) Apajlẹ he mì nọ zedai to owanyi didohia Jiwheyẹwhe mẹ sọgan yinuwado ahun ovi mìtọn lẹ tọn ji sisosiso. Ayinamẹ mìtọn lẹ sọgan jla nulẹnpọn ovi mìtọn lẹ tọn do eyin yé nọ sinai do Ohó Jiwheyẹwhe tọn ji.—Hia Deutelonomi 6:4-7; Howhinwhẹn lẹ 22:6.

E na wà dagbe na ovi mìtọn lẹ eyin mì nọ na tuli yé bo nọ pà yé. Yé sọ tindo nuhudo nugbẹnamẹ po mẹplọnlọ po tọn. Azọ́nplọnmẹ mọnkọtọn nọ basi hihọ́na yé sọn walọ he sọgan hò ayajẹ yetọn yí lẹ si. (Howhinwhẹn lẹ 22:15) Ṣogan, mẹplọnlọ ma dona yin po fifiẹ kavi kanyinylan po gbede.—Hia Kolosinu lẹ 3:21.

Kunnudetọ Jehovah tọn lẹ nọ zín owe susu he yin awuwlena nado gọalọna mẹjitọ lẹ po ovi lẹ po jẹgbonu. Biblu ji wẹ owe ehelẹ nọ sinai do.—Hia Salmu lẹ 19:7, 11.