Mímẹpo wẹ tindo nuhudo akuẹ tọn nado penukundo whẹndo mítọn lẹ go. (Howhinwhẹn lẹ 30:8) To popolẹpo mẹ, “agbó” kavi hihọ́ de wẹ akuẹ yin. (Yẹwhehodọtọ 7:12) Taidi asu po asi po, e sọgan nọ vẹawuna mì nado dọhodo akuẹ ji, ṣigba mì ma dike akuẹ ni hẹn nuhahun lẹ wá alọwle mìtọn mẹ blo. (Efesunu lẹ 4:32) Asu po asi po dona nọ dejido ode awetọ go bo nọ kọngbedopọ to whenue yé to nudide basi gando lehe akuẹzinzan yetọn na nọ yì do go.

NUHE BIBLU DỌ: “Mẹnu to mì mẹ wẹ na jlo nado gbá atọ̀họ̀ de he ma na sinai bo lẹn akuẹ etọn whẹ́, nado pọ́n eyin e tindo nuhe pé nado dotana ẹn?” (Luku 14:28) Dandannu wẹ e yin dọ mì ni nọ basi tito lehe mì na nọ yí akuẹ mìtọn zan do tọn dopọ. (Amọsi 3:3) Mì nọ dọhodo nuhe sin hudo mì tindo lẹ po akuẹ he mì tindo to alọnu po ji. (Howhinwhẹn lẹ 31:16) E ma yindọ mì tindo akuẹ nado họ̀ nude wẹ zọ́n bọ mì dona họ̀ nulọ dandan gba. Mì nọ dapana ahọ́dudu. Mì ma nọ zankuẹ zẹ̀ dehe mì tindo go blo.—Howhinwhẹn lẹ 21:5; 22:7.

NUHE A SỌGAN WÀ:

• Eyin akuẹ de nọ pò sọn akuẹzinzan sunmẹsunmẹ tọn mìtọn mẹ, mì nọ nọpọ́ do de nuhe mì na yí akuẹ lọ do wà

• Eyin mì masọ nọ mọ akuẹ di dai ba, mì basi tito tangan delẹ nado de akuẹzinzan mìtọn pò. Di apajlẹ, mì sọgan nọ dà núdùdù to whégbè kakati nado nọ họ̀ núdù to gbonu

NUHE BIBLU DỌ: “Yí ahundopo do penukundo onú lẹpo go, e ma yin to nukun Jehovah tọn kẹdẹ mẹ gba, ṣigba to nukun gbẹtọ lẹ tọn mẹ ga.” (2 Kọlintinu lẹ 8:21) Nọ dọ nugbo na alọwlemẹ towe gando akuẹ nẹmu he a nọ mọ po nẹmu he a nọ zan po go.

Nọ dọhodopọ hẹ alọwlemẹ towe to whedepopenu he a jlo na basi nudide titengbe delẹ gando akuẹzinzan mìtọn lẹ go. (Howhinwhẹn lẹ 13:10) Eyin mì nọ dọhodopọ do akuẹ ji, enẹ na gọalọ nado hẹn jijọho dote to alọwle mìtọn mẹ. Ma nọ pọ́n akuẹ he a nọ mọ lẹ hlan taidi towe kẹdẹ blo, ṣigba taidi whẹndo lọ tọn.—1 Timoti 5:8.

NUHE A SỌGAN WÀ:

• Mì kọngbedopọ do akuẹ he dopodopo mìtọn sọgan zan matin gbebibiọ sọn omẹ awetọ si lẹ ji

• Mì ma nọte dọ nuhahun ni fọ́n whẹpo mì nido dọhodo akuẹ ji blo