EYIN mẹhe yè dà doafọgbé, yè nọ jẹflumẹ taun. Nugbo wẹ dọ mẹdelẹ nọ jona mẹlọ eyin e lẹnvọjọ bọ yé nọ vọ́ haṣinṣan yetọn jlado. * Amọ́, vlavo yé gbọṣi pọ́ kavi lala, mẹhe awetọ etọn doafọgbé nọ mọ awufiẹsa janwẹ. Nawẹ omẹ enẹlẹ gán doakọnna awufiẹsa enẹ gbọn?

Mahopọnna awubla he mẹ yé te, susu mẹhe awetọ yetọn doafọgbé lẹ tọn wẹ ko mọ homẹmimiọn sọn Owe-wiwe lẹ mẹ. Yé ko plọn dọ Jiwheyẹwhe nọ mọ dasin yetọn lẹ bọ onú yetọn nọ biọlanmẹna ẹn.—Malaki 2:13-16.

“Whenue magbọjẹ lẹ húagbọ́ mi, hiẹ miọnhomẹna mi bo hẹn kọgbọ wá na mi.”—Salmu lẹ 94:19.

“Eyin n’to wefọ enẹ hia, n’nọ mọdọ Jehovah wẹ to kọgbọ hẹnwa na mi sọn awufiẹsa ṣie mẹ dile otọ́ awuvẹmẹtọ de nọ wà do,” wẹ Bill dọ.

“Na mẹhe yin nugbonọ, hiẹ nọ yinuwa po nugbonọ-yinyin po.”—Salmu lẹ 18:25.

“Asu ṣie ma yin nugbonọ na mi,” wẹ Carmen he asu etọn ma yin nugbonọ na, na osun susu dọ. “Amọ́, n’gán deji dọ Jehovah uwọ na yin nugbonọ na mi. E ma na dowinyan mi gbede.”

“Mì yin magbọjẹnọ na nudepope blo, ṣigba to nulẹpo mẹ, mì nọ yí odẹ̀, ovẹ̀ . . . do hẹn obiọ mìtọn lẹ zun yinyọnẹn na Jiwheyẹwhe; jijọho Jiwheyẹwhe tọn he yiaga hugan nukunnumọjẹnumẹ lẹpo nasọ họ́ ahun mìtọn.”—Filipinu lẹ 4:6, 7.

“N’nọ hia wefọ ehelẹ whlasusu,” wẹ yọnnu de he nọ yin Sasha dọ. “Podọ dile n’to dẹ̀ho sọ, mọ wẹ Jiwheyẹwhe nọ na mi jijọho sọ to gbẹzan ṣie mẹ.”

Mẹhe sin hó mí dọ to aga ehe lẹpo wẹ ko dibla jogbe to ojlẹ de mẹ. Amọ́, yé dejido Jehovah Jiwheyẹwhe go bo mọ huhlọn yí sọn Ohó etọn mẹ. Bill dọmọ: “Todido ṣie zọ́n bọ n’yọ́n nuhewutu n’do togbẹ̀ to whenue e didọ nulẹpo ko gble. Nugbo wẹ dọ n’zinzọnlin ‘gbọn agbàdo zinvlu gọ́ngọ́n tọn mẹ’ to ojlẹ de mẹ, amọ́ Jiwheyẹwhe ma jo mi do.”—Salmu lẹ 23:4.