“Din wẹ ojlẹ lọ nado johodo bosọ nọ jijọho mẹ. Din wẹ ojlẹ lọ nado dovivẹnu jẹ obá godo tọn mẹ nado duto mẹdetiti ji,” nuhe António Guterres dọ niyẹn, yèdọ Agbagogán Daho Pipli Akọta lẹ tọn gando mẹgbeyinyan tlọlọ Iran tọn sọta Israël to samedi 13 avril 2024 go.

 Awhàn he to yìyì to Ṣẹnṣẹn Whèzẹtẹn tọn lọ yin apajlẹ nuhe to jijọ lẹdo aihọn pé de tọn.

 “Sọn Wẹkẹ-Whàn awetọ lọ whenu gbọ́n, sọha awhànfunfun tọn he yiaga hugan wẹ to yìyì lẹdo aihọn pé, podọ gbẹtọ liva 2, yèdọ mado ẹnẹ mẹhe to aigba ji lẹpo tọn go wẹ e gando.”—Pipli He Nọ Penukundo Whẹho Hihọ́ Tọn lẹ Go Na Plidopọ Akọta lẹ Tọn, 26 janvier 2023.

 Lẹdo delẹ he mẹ awhàn ylankan mọnkọ lẹ to yìyì te wẹ Israël, Gaza, Syrie, Azerbaïdjan, Ukraine, Soudan, Éthiopie, Niger, Birmanie, gọna Haïti. a

 Whetẹnu wẹ awhàn lọ na doalọte? Be togán lẹ gán hẹn jijọho wá ya? Etẹwẹ Biblu dọ?

 Awhàn he to yìyì lẹdo aihọn pé lẹ dohia dọ awhàn lẹpo na wá vivọnu to madẹnmẹ. Awhàn ehelẹ to dọdai Biblu tọn gando ojlẹ mítọn go lẹ hẹndi. Biblu ylọ ojlẹ enẹ dọ, “vivọnu titonu lọ tọn.”—Matiu 24:3.

•    “Mì na sè awhàn zingidi po awhàn linlin lẹ po. . . . Akọta na fọ́n do akọta ji podọ ahọluduta do ahọluduta ji.”—Matiu 24:6, 7.

 Hia hosọ lọ “Etẹwẹ Yin Ohia ‘Azán Godo Tọn lẹ,’ Kavi ‘Ojlẹ Opodo Tọn’ lọ Tọn?” nado mọ lehe awhàn egbezangbe tọn lẹ to dọdai Biblu tọn lẹ hẹndi do.

 Biblu ko dọ jẹnukọn dọ awhàn he gbẹtọvi lẹ nọ fùn lẹ wá vivọnu. Nawẹ enẹ na jọ gbọn? E ma yin gbọn vivẹnudido gbẹtọvi lẹ tọn gblamẹ gba, amọ́ gbọn Amagẹdọni gblamẹ, enẹ wẹ “awhàn azán daho Jiwheyẹwhe Ganhunupotọ lọ tọn.” (Osọhia 16:14, 16) Awhàn ehe na hùnali na Jiwheyẹwhe nado hẹn opà etọn na gbẹtọvi lẹ di, enẹ wẹ nado duvivi jijọho tọn kakadoi.—Salmu lẹ 37:10, 11, 29.

 Nado plọnnu dogọ gando awhàn Jiwheyẹwhe tọn he na doalọtena awhàn lẹpo lọ go, hia hosọ lọ “Etẹwẹ Awhàn Amagẹdọni Tọn Zẹẹmẹdo?”