Tigere Zuo Bisegadoma la dela Kristakɔma fii n kãsegɛ ge tara pa’alegɔ bɔ’ɔra Yehowa Sɛɛradoma tingole wa za’a poan. Ba tuuma dela sugumnɔɔrɛ buyi:

•   Bamam n basɛ ti to nyɛta Baabule poan pa’alegɔ to gɔnɔ poan, zamesegɔ zɛ’an la Yehowa Sɛɛradoma sukuudoma poan.​​—Luke 12:42.

•   Bamam n biseri Yehowa Sɛɛradoma tuuma tingole wa za’a poan doose la bamam n pa’alɛ to wan tuna to na’am mɔɔlegɔ tuuma la se’em ge me kelum tara ligeri la ti to laɣesa la tuna tuuma soŋa.

 Tigere Zuo Bisegadoma la tɔɣeseri la sɛla ti “tuuntuneba la, la keendoma la n boi Yerusalem” yuun eŋɛ yuun kɔbesɛka n deŋɛ nɛŋa la. Ba yuun loe la ninmɔ’ɔrɛ loore bo Kristakɔma tansugere la za’a. (Tooma 15:2) Wuu buraasi wa n tari sakerɛ n yuun ani se’em la, Tigere Zuo Bisegadoma la me daɣɛ to tigere wa nɛŋadoma. Ba basɛ ti Baabule la n pa’ala ba ge ti ba sakɛ ti Naayinɛ n loe Yezu Krista ti a dɛna tansugere la Zuodaana.​​—1 Korint 11:3; Epesus 5:​23.

 Tigere Zuo Bisegadoma la dela Kenneth Cook, Jr., Gage Fleegle, Samuel Herd, Geoffrey Jackson, Stephen Lett, Gerrit Lösch, Mark Sanderson, David Splane, la Jeffrey Winder. Ba tuni la to tigere zuo la n boi Warwick, New York, U.S.A la.

 Tigere Zuo Bisegadoma la tari la wɛla ayoobi ti ba bisera to tuuma la. Ba poan ayima woo boi la wele ayima bii wɛla zo’e zo’e poan.

•   Coordinators’ Committee: Ba biseri la kootin yɛla ge me soŋera mabiisi yeledi’ima saŋa, la se’em ma’a ti ba ni mɛlesa Yehowa Sɛɛradoma ba pu’usegɔ tuuma zuo la ninmɔ’ɔrɛ yɛla ase’a n pakɛ Yehowa Sɛɛradoma.

•   Personnel Committee: Bamam n biseri Betel deodoma yɛla soŋa soŋa.

•   Publishing Committee: Bamam n biseri Baabule gɔnɔ maalegɔ yɛla ge tara a tisera. Bamam n biseri ti ba mɛta zamesegɔ zɛ’ɛsi, leregere tuuma zɛ’ɛsi la tigere yila.

•   Na’am Tuuma Bisegadoma: Bamam n biseri to mɔɔli “Na’am la yelesoma la” se’em.​​—Matu 24:14.

•   Pa’alegɔ Bisegadoma: Bamam n bo’ori to vo’osum poan dia dɔla zamesegɔ poan, sukuudoma poan la kɔ̃a la vidiyo yɛla poan.

•   Gulesegɔ Bisegadoma: Bamam n biseri vo’osum poan pa’alegɔ la n boi to gɔnɔ poan la to intanɛt tuuma zɛ’an ge kelum bisera leregere tuuma la.

 Tigere Zuo Bisegadoma la ka yeen dɔla la ba wɛla wa poan tuna tuuma ma’a ge ba ni laɣesɛ taaba mɛ bakwai woo sɔsɛ yelese’a n pakɛ tigere la. Ba sɔsega wa poan, ba ni tɔɣɛ la Baabule la n pa’ali sɛla ge me basɛ ti Naayinɛ zilam vo’osum la soŋɛ ba ti ba laɣum kɔ’ɛ putɛyinɛ.​​—Tooma 15:25.

 Ba dela Kristakɔma n tari nɔŋerɛ ge soŋera Tigere Zuo Bisegadoma wɛla la. (1 Korint 4:2) Ba kumesɛ mɛ ge mina wele sɛka tuuma ti ba tuna la, ba me keni ku bakwai woo poan sɔsega la mɛ. La boi bim ti soŋereba wa ni ka laɣum pa’asɛ sɛba n yeti ba kɔ’ɛ puti’irɛ la poan ge ba ni bo la ka’aŋɔ ge pa’alɛ yelese’a n pakɛ. Wele san kɔ’ɛ puti’irɛ ti ba tum sɛla, ba ni tum la bala ge me bisera puti’irɛ la ti ba kɔ’ɛ la n basɛ ti yɛla ana se’em. Tigere Zuo Bisegadoma la ta’an kelum tum ba ti ba keŋɛ ta bisɛ to mabiisi n boi tingole wa zɛ’ɛsi ase’a bii ba me ta’an ni basɛ ti ba bo yetɔɣum saŋa ase’a, maɣesɛ wuu yuunɛ woo sɔsega poan bii Gilead sukuu ba’asegɔ sɔsega poan.