Sɛla san bɔna to suuren bii to eŋɛ la sɛla bii ti’isɛ sɛla n ka makɛ la Naayinɛ pa’alegɔ, la dela be’em. La pa’alɛ la to giisɛ la Naayinɛ lɔɔ ge tum sɛla n ka ani soŋa. (1 Yon 3:4; 5:​17) Baabule la le pa’alɛ ti to me san zaɣesɛ ti to tum sɛla n ani soŋa, la dela be’em.​—Yames 4:​17.

 Ba yuun gulesɛ Baabule la yetɔɣum sebo poan la, yelebɛa se’a ti ba lerege ti be’em la vuurɛ dela nɛra n “nyɔsegɛ sɛla”. Makerɛ, daami Israeldoma soogɛpa yuun mi la kalɔbega lɔbega ge “ka nyɔhegera.” Ho san yeti ho lerege yelesum wa wuu la yele se’em Hebru yetɔɣum poan la nɔɔ, la vuurɛ wan dɛna la “ka tuni be’em.” (Kema 20:16) Bala, nɛra san tum be’em la pa’alɛ ti a nyɔsegɛ mɛ bii a eŋɛ la sɛla n ka makɛ la Naayinɛ pa’alegɔ n di mi’a la.

 Naayinɛ n de to Naaŋɔdaana la zuo, eŋa n nari ti a pa’alɛ asaala sɛla n ani soŋa. (Liligere 4:​11) To wan eŋɛ kãlɛ bo en la to itigɔ.​—Arom 14:12.

To wan ta’an li’isɛ be’em za’a za’a?

 Aayi. Baabule la yeti “nɛra woo ton la be’em, ge ka paara Yenɛ zen’en.” (Arom 3:23; 1 Nadoma 8:46; Pa’ala 7:20; 1 Yon 1:8) Beni n sɔi ti la ana bala?

 Pɔsega la, yia buraa la ka pɔɣa Adam la Hawa yuun ka tari be’em se’ere n sɔi la, Naayinɛ yuun naam ba la a wɔ̃sum poan ti ba ana kasi. (Pin’ileŋɔ 1:​27) Ge ba yuun ka nam Naayinɛ nɔɔrɛ la zuo, ba yuun ka le ana kasi. (Pin’ileŋɔ 3:​5, 6, 17-​19) Ba yuun ta dɔɣɛ kɔma la, ba yuun dekɛ la be’em laŋɛ ba ti ba kɔma la me ka ana kasi. (Arom 5:​12) Naba David yuun yeti, “ba dɔgɛ mam mɛ la tuure.”​—Yooma 51:5.

Be’em basɛba dela ninmɔ’ɔrɛ gana basɛba?

 Ɛɛ. Makerɛ, Baabule la yeti daami Sodom teŋa buraasi yuun tuni la “toonfɛn’ɛha ta ba gaŋɛ” ti ba be’em la “ba nyiira la suunre.” (Pin’ileŋɔ 13:13; 18:20) Geele yɛla atã n wan pa’alɛ ti nɛra tum la be’em n de ninmɔ’ɔrɛ.

1.   La de ninmɔ’ɔrɛ se’em. Baabule la ka’am tɔ ti to zaɣesɛ ninmɔ’ɔrɛ be’em n de wuu yalumtuuma, baɣa kaabegɔ, nayiɣum, daambuka, nɛreba fãa, nɛreba kua la kolekpatuuma. (1 Korint 6:9-11; Liligere 21:8) Baabule la pa’alɛ ti yele ana boi la de to’ore la to ka mi ge tum be’em se’a n de wuu to yetɔɣum poan bii to eŋɛ la sɛla ti la sa’am nɛra suure. (Magaha 12:18; Epesus 4:​31, 32) La bala za’a, Baabule la kpemese to giila ti to da bisera zɛɛna be’em woo se’ere n sɔi la, la ta’an basɛ ti to ta tum be’em kãtɛ giisɛ Naayinɛ lɔɔ.​—Matu 5:​27, 28.

2.   Sɛla n sɔi. Nɛra ta’an tum be’em eŋa n ka mi Naayinɛ n boti sɛla la zuo. (Tooma 17:30; 1 Timoti 1:​13) La boi bim ti Baabule la ka zeem be’em kuna taaba ge ku pa’alɛ ti de boi la de to’ore la nɛra n mi fii ge tum be’em giisɛ Naayinɛ lɔɔ la. (Kanlɛ 15:30, 31) Putɔpa “sunya” n ni basɛ ti ba mina fii ge tuna be’em.​—Yeremia 16:12.

3.   Sugumnɔɔrɛ se’em. Baabule la pa’alɛ ti nɛra n tum be’em buyina boi la de to’ore la nɛra n kɔ’ɔn tuna be’em ti la yue. (1 Yon 3:​4-8) Naayinɛ wan gãkɛ nɛresɛba n puɣum zamesɛ sɛla n ani soŋa ge “mina ge kelom tona be’em” la.​—Hebru 10:26, 27.

 Sɛba n tum be’em n de ninmɔ’ɔrɛ giila ta’an kɔ’ɔsɛ ba tuure la zuo. Makerɛ, Naba David yuun yeti: “Mam zi n tuure la mɛ n zuin, te bo tebegɛ velegera mam sigera teŋa.” (Yooma 38:4) Ge Baabule la buɣelɛ to suure yeti: “Bahɛ pototooma la potɛn’be’ero la ge ŋmɛregɛ lebe Na’ayenɛ zen’an na, a wan zɔ ho ninbɔn’ɔn. Ŋmɛregɛ lebe Yenɛ zen’an na, a wan di suguru bo ho.”​—Isaiah 55:7.