Babilon Kãtɛ La ti ba tɔɣɛ de yele liligere gɔŋɔ la poan la, dela pumpɔreŋɔ pu’usegɔ za’a n laɣum taaba. Naayinɛ zaɣesɛ pu’usegɔ ana wa woo mɛ. a (Liligere 14:8; 17:5; 18:21) La boi bim ti pu’usegɔ ana za’a sakerɛ yɛla boi la to’ore to’ore ge ba kan ta’an basɛ ti nɛra pu’usɛ yelemɛŋɛrɛ Naayinɛ Yehowa soŋa soŋa.​​—Tɛɛnhegɔ 4:​35.

Yelese’a ti to wan ta’an dekɛ baŋɛ Babilon Kãtɛ La

1.   Babilon Kãtɛ La dela dãalesum. Baabule la pa’alɛ ti a dela “pɔka” la “pɔɣeyalema kãtɛ,” tara yu’urɛ “bɔkerɛ n kpe’em ti la dɛna: ‘Babilon Kãtɛ La.’” (Liligere 17:​1, 3, 5) Liligere gɔŋɔ la pa’alɛ yele wa la ‘wɔ̃sum poan,’ bala la, yɛm boi bim ti to yeti, Babilon Kãtɛ La dela dãalesum ge daɣɛ pɔɣemɛnka. (Liligere 1:1) Leyɛ’ɛsa, a ‘zĩ la ko’om zo’e zo’e zuo’ ti la ze’ele bo “nɛreba la nɛrekuuŋɔ la tisi la yetɔɣum buuri buuri.” (Liligere 17:​1, 15) Pɔɣemɛnka kan ta’an eŋɛ bala.

2.   Babilon Kãtɛ La ze’ele bo la tingɔŋɔ wa za’a tigere. Ba yi’iri a yu’urɛ ti “tinkãtɛ la n tari na’am sɔna tingɔŋɔ wa nadoma bisera.” (Liligere 17:18) Bala la, a tari paŋa mɛ tingole wa za’a waabi poan ge ti nɛreba me nana en.

3.   Babilon Kãtɛ La dela pu’usegɔ tigere ge daɣɛ nalɛɣerɛ bii leebego tigere. Diimi Babilon tiŋa yuun dela pu’usegɔ tiŋa bala la, nɛreba yuun mi ba ‘tiim tuuma’ la ba ‘baɣa bibisi yɛla’ mɛ. (Isaiah 47:​1, 12, 13; Yeremia 50:​​1, 2, 38) Yelemɛŋɛrɛ, pumpɔreŋɔ pu’usegɔ n yuun boi bim la yuun ka nani bɔ’ɔra yelemɛŋɛrɛ Naayinɛ Yehowa. (Pin’ileŋɔ 10:​8, 9; 11:​2-4, 8) Babilon nadoma la yuun zɛ̃kɛ bamea mɛ hali zɛregera Yehowa la a pu’usegɔ la. (Isaiah 14:​4, 13, 14; Daniel 5:​​2-4, 23) Bala mea nɔɔ, ba mi Babilon Kãtɛ La ti a tuni la “kolekpatuuma.” Bala pa’alɛ ti a dela pu’usegɔ tigere.​​—Liligere 18:23.

    Babilon Kãtɛ La kan ta’an dɛna nalɛɣerɛ tigere se’ere n sɔi la, “tingɔŋɔ wa nadoma” la wan kaasɛ la sa’aŋɔ seko n yeti la paɛ en la. (Liligere:​​1,​2; 18:9) A me daɣɛ leebego tigere se’ere n sɔi la, a dela tigere n boi de to’ore la “lɛɛbereba la n boi tiŋa la poan la.”​​—Liligere 18:11, 15.

4.   Babilon Kãtɛ La kɔ’ɔn makɛ mɛ la pumpɔreŋɔ pu’usegɔ. Ban tuɣum wan pa’alɛ ni nɛreba ba wan eŋɛ se’em ta’an vurege lɛm yelemɛŋɛrɛ Naayinɛ Yehowa la, pumpɔreŋɔ pu’usegɔ pã’aseri ba mɛ ti ba kaabera baɣa. Baabule la yeti a ‘yaalɛ amea mɛ la ba.’ (Malema 20:6; Yɛhega 34:15, 16) Diimi Babilon tiŋa poan, nɛreba yuun puɣum sakɛ Trinitaasoŋa pa’alegɔ la sia n ka kiiri la mɛ ge me tara wɔ̃sum lɔɣɔrɔ pu’usa. Pumpɔreŋɔ pu’usegɔdoma me kɔ’ɔn ita la yele ana mea nɔɔ. Pu’usegɔdoma wa me le dekɛ la lɔɣɔbɔrɛ pa’asɛ ba pu’usegɔ poan. Baabule la yi’iri ba pumpɔreŋɔ yɛla wa la pɔɣedire sa’aŋɔ.​​—Yames 4:4.

    Pumpɔreŋɔ pu’usegɔdoma n kɔ’ɔn ɛɛra taresum ge me pa’ala bamam n tari sɛla la makɛ mɛ la Baabule la n tɔɣɛ Babilon Kãtɛ La yele se’em ti, a yɛ la “fumɔlega n subege la fumɔlega n mɔ’ɛ” ge “baɣɛ amea la salema la tuulum kuga la kugesaalesi.” (Liligere 17:4) “Tingɔŋɔ wa yelegaasa lɔɣɔrɔ” bii pa’alegɔ la itigɔ seto n zeeni Naayinɛ, ze’ele la Babilon Kãtɛ La zɛ’an na. (Liligere 17:5) “Nɛreba la nɛrekuuŋɔ la tisi la yetɔɣum buuri buuri” n boi pumpɔreŋɔ pu’usegɔ poan la n soŋeri Babilon Kãtɛ La.​​—Liligere 17:15.

 Babilon Kãtɛ La n ta’asɛ ti ba ku ‘sɛba woo n boi tingɔŋɔ wa zuo la.’ (Liligere 18:24) Kɔ’ɔn pɔsɛ diimi sa ti pumpɔreŋɔ pu’usegɔ ta’asɛ zaberɛ, kuura nɛreba yoo yoo. Ba me kɔ’ɔn parena mɛ bɔ’ɔra nɛreba ti Yehowa Naayinɛ ka tari nɔŋerɛ. (1 Yon 4:8) Yele dena wa basɛ ti ba ku la nɛreba zo’e zo’e. Wana wa zuo la, sɛba woo n boti ba pu’usa Naayinɛ la nari ti ba ‘yese pɔka la zɛ’an,’ ti la pa’alɛ ti ba yese bamea pumpɔreŋɔ pu’usegɔ poan.​​—Liligere 18:4; 2 Korint 6:​14-​17.