Baabule la tɔɣɛ kɛkɛ kɛkɛ yele la buyina ma’a ti la bɔna Malema 19:28, bilam yeti: “Da . . . kehera ya iŋa.” Naayinɛ yuun dekɛ nɔɔrɛ wa bo la Israeldoma, ti bala yuun basɛ ti ba bɔna ba to’ore la ba kpɛ’ɛsi la n yuun ŋmɛ’ɛri ba yu’ura, la ba yina wɔnɛ ita ba inya poan la. (Tɛɛnhegɔ 14:2) La boi bim ti Kristakɔma ka doli Lɔɔ la ti Israeldoma yuun dɔla la ge naresum yele la n boi lɔɔ wa poan la dela ninmɔ’ɔrɛ ti la nara ti to ti’isɛ de yele soŋa soŋa.

La nari ti Kristabia ŋmɛ kɛkɛ kɛkɛ bii dɔreŋɛ sɛla eŋɛ a inya poan?

 Baabule kaalegɔ zɛ’ɛsi wa wan soŋɛ hɔ ti ho ta’an ti’isɛ yele wa poan soŋa:

•   “Pɔɣesi sonti ba yɛɛra lɔɣɔrɔ . . . ti la pa’alɛ ti ba siregeri bamesi.” (1 Timoti 2:9, New American Bible) Naresum yele wa tɔɣeri la pɔɣesi la buraasi yele. La nari ti to ti’isa nɛreba yele ge da pa’ala tomesi.

•   Nɛreba basɛba ni ŋmɛ’ɛra kɛkɛ kɛkɛ ti la basɛ ti ba bɔna la ba to’ore bii ba ita bamesi n boti se’em ge ti basɛba me ni ŋmɛ’ɛri kɛkɛ kɛkɛ ti la pa’alɛ ti bamam n sɔi bamesi inya. Ge Baabule yele Kristakɔma yeti: “Basɛ ti ya iisi la dɛna kaabegɔ bunɔ n vɔi, ana zilam ge nara bɔ’ɔra Naayinɛ ge tara ya puti’irɛ pu’usa en.” (Arom 12:1) Dekɛ ho “puti’irɛ” geele bisɛ sɛla n sɔi ti ho bɔta ti ho ŋmɛ kɛkɛ kɛkɛ. La san dɛna ti ho boti la ho eŋɛ yelepaalɛ ti nɛreba ita bii ho boti la ho ana wuu nɛreba basɛba n ani se’em n sɔi it ho ŋmɛ’ɛra kɛkɛ kɛkɛ, tɛra ti pooren ho puti’irɛ ta’an kan le bɔta kɛkɛ kɛkɛ la ti ho ŋmɛ la. Ho san baŋɛ sɛla n sirum boi ho suuren, bala wan soŋɛ hɔ ti ho ta’an kɔ’ɛ ho puti’irɛ soŋa.​—Magaha 4:7.

•   “Ninmɔ’ɔrɛdaana puti’ira tari en yɛ’a la kekeko poan, ge kãbi kãbidaana yeere la nɔŋɔ poan.” (Magaha 21:5) Nɛreba ni eŋɛ la kãbi kãbi ŋmɛ kɛkɛ kɛkɛ eŋɛ ba inya poan ge la ta’an sa’am hon la nɛreba tiŋasuka bɔŋa la ho tuuma mɛ. Ho san bɔta ti ho yese kɛkɛ kɛkɛ basɛ, la wan wuŋɛ ho inya la ge ti ho me wan sa’am laɣehɔ. Viisegɔ yɛla la nɛreba n saaleni kɛkɛ kɛkɛ nɛra inya poan yeti, nɛreba zo’e zo’e n ŋmɛ kɛkɛ kɛkɛ eŋɛ ba inya poan ni ta yeti ba daa san baŋɛ ni ba kan eŋɛ ni.