Liligere gɔŋɔ la poan, 666 dela kãlɛ bii yu’urɛ ti ba dekɛ bo goo duŋa la n tari zuto tuyopɔi la iila pia, ze’ele ateko ko’om poan dɔɔra la. (Liligere 13:​1, 17, 18) Goo duŋa wa ze’ele bo la tingɔŋɔ wa za’a waabi nalɛɣereba n sɔi “buuri woo la nɛreba woo la yetɔɣum woo la tisi woo” bisera la. (Liligere 13:7) Kãlɛ la n de 666 la pa’alɛ la nalɛɣereba la yɛla n ba’ɛ sa’am gaam be’ero se’em Naayinɛ nɛŋan. Wani wani?

  Yu’ura daɣɛ sɛla ti ba yeen yi’ira. Yu’ura tari vuurɛ mɛ yele yele wuu, Naayinɛ san siɣɛ yu’urɛ. Makerɛ, Naayinɛ siɣɛ buraa ayima yu’urɛ ti, Abram ti la pa’alɛ ti “Sɔ Sɛka N Gani Za’a.” Abraham me vuurɛ dela “Nɛrekuuŋɔ (Nɛrebɔbegɔ) Sɔ.” Naayinɛ yuun yeti, Eŋa wan basɛ ti Abraham dɛna ‘tisi zo’e zo’e sɔ.’ (Pin’ileŋɔ 17:5) Bala mea nɔɔ ti Naayinɛ siɣɛ goo duŋa la 666 ti la pa’alɛ kan tari halese’a.

  Kãlɛ buyoobe pa’alɛ la sɛla n ka di mi’a. Saŋa zo’e zo’e Baabule la san tɔɣɛ kãlɛ yele, la ni ze’ele bo la sɛla. Buyopɔi ze’ele bo la sɛla n di mi’a bii sɛla n ani kasi, ti buyoobe me ta’an ze’ele bo sɛla n ka di mi’a bii sɛla n de be’em Naayinɛ nɛŋan. La me ta’an ze’ele bo Naayinɛ dindoma.​​—1 Yelebiŋ’a 20:6; Daniel 3:1.

  Sugumnɔɔrɛ butã la pa’alɛ la taɣesegɔ. Saŋa ase’a, Baabule la san taɣesɛ yele, a ni tɔɣɛ de yele la sugumnɔɔrɛ butã. (Liligere 4:8; 8:​13) Bala la, yu’urɛ la n de 666 la kɔ’ɔn pa’alɛ la Naayinɛ n geele nɛresaaleba nalɛɣereba yɛla n gaam be’ero se’em. Ba ka ta’an basɛ ti suma’asum la fai bɔŋa bɔna. Naayinɛ Na’am la ma’a n wan basɛ ti la bɔna.

Goo duŋa la dãalesum

 Baabule la yeti, nɛreba n na’aseri ge me pu’usa goo duŋa la zuo, ba tari ‘ka dãalesum la mɛ.’ (Liligere 13:​3, 4; 16:2) Ba ni na’asera la ba tiŋa la tuuta bii ka lengima la. The Encyclopedia of Religion gɔŋɔ la yeti: “Nɛra n nɔŋɛ amea tiŋa dela pu’usegɔ n boi zina beere wa.” a

 La wan eŋɛ la wani ti goo duŋa wa dãalesum bɔna nɛra zuɔ nu’o bii a gbe’ere zuo? (Liligere 13:16) Naayinɛ yuun bo Israel tiŋa la nɔɔrɛ ti: ‘Lu ya a dãalesum la ya nu’usin ge lu ya a tabelɛ ya gbɛ’ɛra zuto.’ (Tɛɛnhegɔ 11:18) Bala ka pa’alɛ ti la yuun dela Israeldoma la kɔ’ɔn dãalɛ ba nu’usin la ba gbɛ’ɛra. Ge la dela ba basɛ ti Naayinɛ yelesum la soŋeri ba ti ba ta’an ti’isa ge tuna ba tuuma soŋa. Bala mea nɔɔ ti kãlɛ 666 la yeen daɣɛ kɛkɛ kɛkɛ. Goo duŋa dãalesum la dela sɛba n basɛ ti tingɔŋɔ wa nalɛɣereba la sɔna ba bisera la. Sɛba n tari goo duŋa la dãalesum la ka nam bo la Naayinɛ.​​—Liligere 14:​9, 10; 19:19-​21.