BA NAAM KU MƐ?
Sakua Zɛleŋa
Yire poan sakuusi nɔŋɛ la ba lɛɛla ba inya. Ba san ka gĩsera, ba ta’an dekɛ ba saŋa zo’e zo’e lɛɛla ba inya. Sɛla n soŋeri sakuusi ti ba ta’an duusa ba inya la soŋa soŋa dela ba zɛleŋa la n de yelekirega la.
Ti’isɛ bisɛ: Sakua zɛleŋa la tari la bundoma n ani wuu gɔ̃’ɔsi ti ba yi’ira papillae n paɛ 290. Lɔɣɔrɔ wa n ani wuu gɔ̃’ɔsi la delege lebe la pooren ge kpe’em wuu asaala nu’ɛa. Bu me wan ta’an ma’alɛ sakua la zɛleŋa la nɔtuurum se’em ma’a ti sakua la mum a nɔɔrɛ la. Sakua la san lɛɛla a kɔ̃berɔ la, bundoma la n ani wuu gɔ̃’ɔsi bɔna a zɛleŋa la ni doose la a kɔ̃berɔ la poan ukɛ nɔtuurum ma’alɛ a ingɔŋɔ la.
Daarewoo, sakua zɛleŋa ta’an ukɛ nɔtuurum n paɛ wuu desontɔ batã ma’alɛ a ingɔŋɔ la kɔ̃berɔ. Nɔtuurum la tari la sɛla n kuuri bunyooro. Leyɛ’ɛsa, nɔtuurum la san ku’ura, la ta’an ni basɛ ti sakua la inya ma’ara. Wana me dela sɛla n pakɛ se’ere n sɔi la, sakuusi ka ba’ɛ tara yoɣɔrɔ zo’e zo’e ba inya poan ti ba wan sɔɔra muregere dɔla bim.
Sakua la kɔ̃berɔ san girɛ, bundoma la n ani wuu gɔ̃’ɔsi la ni vilege si mɛ la paŋa ti la lorege kɔ̃berɔ la. Sakua la san lɛɛla a inya, bundoma la n ani wuu gɔ̃’ɔsi la ni sige paɛ a ingɔŋɔ la mɛ. Viisegɔdoma tɔɣesɛ la sakua zɛleŋa n ani se’em la dekɛ maalɛ saasega. Nɛra san dekɛ saasega wa saasera a zuo, la kan wuna en wuu saasega basɛba la. Saasega wa duusego ka kpe’em ge me ta’an lɔregera zonto la soŋa. Viisegɔdoma wa mi ti sakua zɛleŋa n ani se’em la wan soŋɛ ba ti ba ta’an baŋɛ ba wan duusa zɛse’esi n ani vugam se’em soŋa soŋa. La me wan ta’an soŋɛ ba ti ba baŋɛ sarɔse’a poan ti ba wan ta’an dekɛ kaam bii tiim sɔ̃ inya la zɛse’esi n tari zonto.
Hon puti’irɛ dela bem? Sakua zɛleŋa la ze’ele la lebege lebege poan? Bii ba naam ku mɛ?