“Da zɔta dabeem ge mam boi mɛ la hɔ. Da fabela ge mam n de ho Naayinɛ. N wan bo ho paŋa ge me wan soŋɛ hɔ. N wan gurɛ hɔ kankaŋi la n zuɔ nu’o la.”​—Isaiah 41:10, New World Translation.

 “Da zɔta dabeem ge mam boi mɛ la hɔ. Da gbe’era ge mam n de ho Naayinɛ. N wan eŋɛ ho ti ho kpe’em, n wan sirum tara hɔ kankaŋi la N zuɔ nu’o la.”​—Isaiah 41:10, New King James Version.

 Yehowa a Naayinɛ basɛ ti nɛresɛba n tari yelemɛŋɛrɛ pu’useri en la tara suure lua ti, a wan soŋɛ ba la ka pakɛ la yeledaaŋɔ se’a n paari ba la.

 “Mam boi mɛ la hɔ.” Yehowa yele nɛresɛba n pu’useri en la ti ba da zɔta dabeem ge ba ka boi ba ma’a. Eŋa n nyɛti yelese’a n paari ba ge kɛlesa ba zusega la zuo, la ani me wuu a kɔ’ɔn bɔna mɛ la ba la.​—Yooma 34:15; 1 Peter 3:12.

 “Mam n de ho Naayinɛ.” Yehowa basɛ ti nɛresɛba n pu’useri en la suya gã la maasumi la eŋa n tiiseri ba ti eŋa kelum dɛna la ba Naayinɛ ge me sakɛ ti bamam me dela eŋa nɛreba. Ba tari suure lua ti, bɔŋa woo poan Naayinɛ wan soŋɛ ba.​—Yooma 118:6; Arom 8:32; Hebru 13:6.

 “N wan bo ho paŋa ge me wan soŋɛ hɔ. N wan gurɛ hɔ kankaŋi la n zuɔ nu’o la.” Yehowa n tɔɣɛ yele wa taɣesɛ sugumnɔɔrɛ butã la pa’alɛ ti a wan sirum soŋɛ a nɛreba. A dekɛ la makerɛ pa’alɛ eŋa n ni eŋɛ sɛla a nɛreba san ɛɛra soŋerɛ. Nɛra san lui, Naayinɛ wan tiɛ a zuɔ nu’o gurɛ en ti a isige.​—Isaiah 41:13.

 Naayinɛ tari la Baabule la soŋera ge bɔ’ɔra sɛba n pu’useri en la paŋa. (Yosua 1:8; Hebru 4:12) Makerɛ, Naayinɛ Yetɔɣum la tari la ka’aŋɔ n soŋeri sɛba ti nɔŋɔ kɛ̃ ba, sɛba n bɛ̃’ɛri bii ba suɔ n ki ti ba mina ba wan tara bamea se’em. (Magaha 2:6, 7) Naayinɛ wan ta’an le dekɛ a zilam vo’osum la soŋɛ a nɛreba ti ba tara putɛsonɛ ge ta’an ŋmibe yeledaaŋɔ woo poan.​—Isaiah 40:29; Luke 11:13.

 Yelesum wa yuun buɣelɛ la Yudadoma la ti ba yuun tari ba keŋɛ yamenɛ Babilon teŋa poan la suya. Yehowa yuun yeti Yudadoma yamenɛ saŋa la san ta pɔ̃ra ba’asegɔ, ba wan wum ti nɛreba n yeti ba sa’am teŋse’ese n lɛm ba la ge me zabɛ la Babilondoma la. (Isaiah 41:2-4; 44:1-4) Yele wa yuun basɛ ti dabeem sãɛ Babilon la teŋse’ese n lɛm ba la mɛ ge Yudadoma la kan fabela se’ere n sɔi la Yehowa n wan te’ele ba. Sugumnɔɔrɛ butã ti a buɣelɛ ba suure ti ba “da zɔta dabeem.”​—Isaiah 41:5, 6, 10, 13, 14.

 Yia la, gulesegɔ wa yuun tɔɣeri la Yudadoma n boi yamenɛ Babilon poan la yele ge Yehowa Naayinɛ basɛ ti Isaiah 41:10 yelesum la kelum bɔna ti la ta’an buɣelɛ a nɛreba suya. (Isaiah 40:8; Arom 15:4) A soŋeri a nɛreba zina beere wa mɛ wuu eŋa n yuun soŋeri a yamesi se’em diimi sa la.