YETƆƔESEBO ti ba pɔsɛ dekɛ gulesɛ Baabule la, “toroko” ti ba lerege dɛ New World Translation la poan la vuurɛ ta’an dɛna toto n boi to’ore to’ore. (Tm. 8:​28, 29, 38) Ge la ani wuu Etiopia kpɛ’ɛma la toroko la yuun karegɛ gana toroko sɛka ti lengima yuun ni ta kena zaberɛ bii toroko sɛka ti ba yuun ta dɛ’ɛna la. Geele bisɛ yɛla fii n sɔi ti to yele bala.

Etiopia buraa la yuun dela kpɛ’ɛma n keŋɛ sore n za’a. A yuun dela ‘nɛrezure n tari kpe’eŋo bɔna Kandis n de Etiopiadoma pɔɣenaba la nu’usin, eŋa n daa biseri a tuulum lɔɣɔrɔ la woo.’ (Tm. 8:27) Zina beere wa Sudan tiŋa la Egypt zaɣenɔrɛ bɔba sɔ’ɔlum la za’a yuun dela Diimi Etiopia tiŋa. Daanse’ere buraa wa yuun ka tari toroko ayina ma’a a sore kenɛ la poan, se’ere n sɔi la a yuun ta’an tara lɔɣese’a n pakɛ zo’e zo’e. Yuun kɔbesɛka n deŋɛ nɛŋa Y.B. poan, toto se’a ti ba yuun tara vaara nɛreba la yuun tari la nama anaasi. Wuu gɔŋɔ la zuo n de Acts—An Exegetical Commentary n pa’alɛ se’em la, toroko aŋa taaba yuun ta’an vaɛ lɔɣɔrɔ zo’e zo’e, basɛ ti nɛreba ta’an zĩ’a soŋa ge me ta’an kena sarɔwoko.

Etiopia buraa la yuun kaali mɛ se’em ma’a ti Filip paɛ a zɛ’an la. Gulesegɔ la yeti ‘Filip zɔ yibegɛ Etiopia kpɛ’ɛma la ge wum ti a kaala Isaiah gɔŋɔ la.’ (Tm. 8:30) Ba yuun ka maalɛ toto ti ba zɔta kalam kalam. Ban yuun ka keni kalam kalam la zuo n yuun basɛ ti Etiopia buraa la ta’an kaala ge ti Filip me ta’an keŋɛ nama paɛ ba.

Etiopia buraa la ‘yuun yele Filip ti a zom na zi’ire a zɛ’an.’ (Tm. 8:31) Yiiri toto se’a ti ba yuun ta dɛ’ɛna la, yiiri bã’areba la ni zɛ’a la saazuo. Ge yiiri toto se’a ti ba yuun tara kena sore la yuun tari la fole zo’e zo’e ti Etiopia buraa la, la Filip wan ta’an zi’ire bim.

Tooma a zuo 8 n yele sɛla, la diimi yɛla n basɛ ti la niɛ peelumi se’em la zuo, dabesa wa poan to gɔnɔ la tari la fɔɔra ti Etiopia kpɛ’ɛma la zĩ’a toroko n karegɛ zuo ge daɣɛ toroko pika ti ba yuun ta kena zaberɛ bii ba ta dɛ’ɛna la