¿Ikatúpa peteĩ testígo de Jehová odesidi oheja irrelihión?

REPRODUCIR EN

Si, ikatu. Peteĩ testígo de Jehová ohechauka orrenunsiaha koʼã mokõi hendáicha:

Haʼe voi ojerurérõ. Peteĩ persóna ikatu heʼi porã ojeiseha umi testígo de Jehová rrelihióngui térã oskrivi peteĩ kárta heʼihápe upéva.
Umi mbaʼe ojapóvare. Umi testígo de Jehová oparupigua ojotrata oñoermánoicha, péro peteĩ persóna ikatu ohechauka noimeseveimaha ijapytepekuéra umi mbaʼe ojapóvare (1 Pedro 5:9). Por ehémplo, ikatu oho ótro rrelihiónpe ha ohechauka opytaseha upépe (1 Juan 2:19).

¿Ha mbaʼe oiko peteĩ testígo de Jehová ndopredikavéirõ térã ndohovéi umi rreunionhápe? ¿Petratápa chupe ndahaʼeveimarõguáicha Testígo?

Nahániri. Peteĩ persóna ikatu ou ijerovia kangy, péro upéva ndeʼiséi katuete orrenunsiamaha térã ojeisemaha umi testígo de Jehová rrelihióngui. Heta oĩ oñedesanima rupínte oúva naikyreʼỹvéi Ñandejára servísiope térã ndoservivéi chupe. Ore noromboykéi umichaguápe, síno roñehaʼãmbaite roipytyvõ ha rokonsola chupekuéra (1 Tesalonicenses 5:14; Judas 22). Ha oimérõ haʼe oipota oñepytyvõ chupe, umi ansiáno kongregasionpegua primeroite voi ohóta omokyreʼỹ hag̃ua chupe (Gálatas 6:1; 1 Pedro 5:1-3).

Péro upéva ndeʼiséi umi ansiáno ikatuha ojopy térã oovliga peteĩ persónape ani hag̃ua orrenunsia. Káda uno odesidi vaʼerã mbaʼe rrelihiónpepa ohóta (Josué 24:15). Ore roguerovia umi oadoráva Ñandejárape ojapo vaʼerãha upéva ipyʼaite guive, haʼete odesidi rupi (Salmo 110:3; Mateo 22:37).